Ads by Google Ads by Google

Fagogo: Salu Vale le Lau Ta’amu a A’opo

[Malo le faitau, malo fo’i le onosa’i, ae alo mai loa o le toe soso’oina lenei o la tatou tala fa’asolo, lea na gata mai i le vaiaso na te’a nei i le taimi lea ua fesili atu ai le olomatua o Vineta ia Iose po o a leoleo ia sa ia lagona atu o ta’u i lana telefoni ao la talanoa ma lona to’alua.]

Na umi se taimi o tu Iose e le tali i le fesili a le olomatua o Vineta lea ua togi atu ia te ia, po o a leoleo ia sa ta’ua i le taimi na la talanoa ai ma Lumepa lona to’alua. Na avea le le mautonu o Iose atoa ai ma le leai o sana tali na toe oso atu ai le isi fesili a le olomatua, “O i ai se mea o kupu ia koe oe Iose ua mafua ai oga e gofo umi iigei? Afai e i ai se mea o kupu, e kakau oga kakou kalagoa gagei ma le koeaiga ina ia malamalama ai le maka’upu ma kaumafai aku ai se fesoasoani ia ke oe.” E fai lava tala ia a le olomatua o Vineta ma a’apa atu lona lima ua toe fa’aauau le saluina o le fale komiti o lo o leoleo ai, ma fa’asolo atu ai loa le fa’amamaina o le otaota i fafo o le fale, a o Iose o lo o tu ai lava i luma o le laulau lea o lo o i ai le telefoni sa talanoa ai ia Lumepa ua le mautonu lona mafaufau.

E le’i umi se taimi na tu tu ai le tamaloa i le ogatotonu o le fale komiti, ona ia a’apa atu loa lea i lona mitiafu lea o lo o ta’atia i luga o le nofoa ua toe fa’atautau i lona tau’au, ona ia savali ‘ese loa lea ma le fale ma toe fo’i atu i lo latou fale. “Sole Iose, aua ge’i galo sau gagei kakou kalagoa ma le koeaiga, ua e fa’alogo mai,” o le vala’au ane lea a Vineta i le tamaloa, ona toe punou lea i lalo ma toe fa’aauau le saluina o le otaota i lalo o le ulu lea e i tua o le fale komiti. O le olomatua o Vineta, o le to’alua lea o le tu’ua o le nu’u o Amouta  lea o lo o nofo ai Iose, o le toeaina foi lea e faia uma tonu ma fa’aiuga a le nu’u, o le Sa’o o le aiga a Iose, ma, talu lava ona taunuu Iose i le nu’u e le misi umu ma taumafataga e momoli i le toeaina i afiafi uma ma aso Sa. O le afiafi lava o le aso lea na malaga atu ai loa leoleo fa’apitoa e to’afa i le va’a moe mo Salelologa mo le sa’ilia lea o Iose i lona nu’u ona o le su’esu’ega o lo o fa’agasolo e uiga i le maliu o Pulusi. Na ona taunu’u lava o le va’a moe i le uafu i Salelologa, agai sa’o atu loa lea o ali’i leoleo i le Ofisa autu i Tuasivi mo le pikiina lea o le ta’avale e fa’atinoina ai la latou galuega ma le fa’amoemoe, o le po lava lea e tatau ona latou aga’i atu ai i Amouta e sa’ili mai Iose ina ia latou toe maua le va’a usu mo Apia i le aso e soso’o ai. O le mae’a ai o leoleoga o le sa i le afiafi lea, na savali sa’o atu ai loa Iose i le fale o le Sa’o o lo latou aiga ma latou fai’aiga ai i le afiafi ona o le fa’amoemoe e fia faia se talanoaga e tusa ai o le mata’upu o lo o tula’i mai, ae o le afiafi lava fo’i lea na taunu’u ai loa ma leoleo i le nu’u ma tu’u fesilisili solo pe i ai se isi na te iloa se tamaloa e igoa ia Iose.