Ads by Google Ads by Google

Fagogo: Salu Vale le Lau Ta’amu a A’opo

[Malo le faitau, malo fo’i le onosa’i, ae alo mai loa o le toe soso’oina lenei o la tatou tala fa’asolo, lea na gata mai i le vaiaso na te’a nei i le taimi lea ua fautua ai le fafine o Felila i lona to’alua o Iose, tusa lava po o a fesili a leoleo ia te ia, e tasi lava lana tali na te le iloaina le mafua’aga na oti ai Pulusi, e le o ia fo’i na mafua ai ona maliu.]

Ua le iloa e Iose pe tagi pe fefe i tala ia ua fai atu e Lumepa ia te ia, ona o lea ua ‘ese lava ona lagona i le tulaga ua o’o i ai su’esu’ega o le mata’upu, ui o lea, sa ia fa’ailoa i lona to’alua, o ia lea o le a sauni e fo’i mai i Apia i le vaiaso lava lea, ina ia taofia ai le o atu o leoleo e sa’ili o ia ma su’esu’e, o le aso To’onai lea na atoa i ai le vaiaso na tu’utala ai leoleo ma le fafine o Lumepa na taunu’u mai ai loa Iose i lo latou aiga. Sei o tatou liliu atu lava i le tamaitiiti o Fatu ma le tulaga lea ua i ai lona nofo to’atasi ai i lo latou aiga. O le vaiaso lea na maua ai le tino maliu o Pulusi i totonu o le fale, na toe tapena ai loa le malaga a le tamaitiiti o le a toe fo’i i Amouta e momoli le tala fa’anoanoa o le maliu o Pulusi i si ona tina fai o Pauline, lea o lo o fa’amuli mai ma nai ona tei i Savai’i. O le va’a mulimuli o le aso To’ona’i o le vaiaso lea lava na ti’eti’e ai loa Fatu i Savai’i ma lona oso o mea’ai a nai ona tei, fa’apea ai ma mea uma na te iloa o lo o mana’omia e le aiga, o le tupe na maua mai e le tamaitiiti i lana taega fagu i le vaiaso atoa lea ua tapena ai lana malaga i Savai’i.

“Sole, makua vave fo’i ali’i au malaga, o ai oulua ga lua o mai,?” o le fesili fiafia atu lea a le ali’i ‘ave pasi o Maliko i le tamaitiiti o Fatu lea ua oso atu nei i totonu o le pasi. “Na o a’u lava la’u malaga, na ou sau fo’i e asi mai si ona tina ma nai o’u tei,” e fai lava tala ia a Fatu ma tago tu’u atu le pepa panikeke o lo o u’u i lona lima i le ‘ave pasi, ma lana fa’a’upuga, “pau lava lea o le oso o le malaga,” ona ata lea o Maliko ma tago atu lona lima ua u’u mai le pepa panikeke.

“Sole, ua e misia le laugakogi a le Aoga Aso Sa lea ga fai i le vaiaso ga ke’a nei, siamu uma ai lau au gigi’i ali’i Faku, kou ke so’o uma lava i le kou kama le akamamai sole,” o le faitatala atu lea a le ‘ave pasi ia Fatu ma amata loa ona ai lana pepa panikeke, ae o Fatu i le taimi lea, ua maligi lemu ifo  lava i lalo ona loimata, ona o le fiafia o lona loto i le tala lea ua fa’ailoa ane e Maliko e uiga i taumafaiga a nai ona tei laiti i su’ega a le Aoga Aso Sa. Ua alu ‘ese atu le pasi a Amouta ma le uafu i Salelologa, ae o loimata o le tamaitiiti ua maligi fa’atimuto, ina ua manino i lona loto, ua leai se lumana’i mo ia ma lana a’oga, ona o lea ua le toe taliaina o ia i le a’oga, talu ai ua ova tele aso e le a’oga ai, talu ai o lea ua toe malaga e momoli le poloa’i i Savai’i i le maliu o Pulusi, ma o se itu na tagi ai le fatu ma le ‘ele’ele i lagona faivavale o le tamaitiiti o Fatu, aua e ui i sona naunau e fia avea o ia ma Minisita i totonu o le Palemene a lona atunu’u, ae paga lea, ua na o se foe e fa’ae’e i le tau ona fa’anaunauga, ina ua le toe talia o ia i le aiga, ma ua moni ai ‘upu a le atunu’u, ua salu vale le lau ta’amu o le nu’u o A’opo.