Ua va’aia ataata o ta’uleleia, ina ua sulugia le lalolagi i ave o le la, ua sulugia fo’i le foga’ele’ele ua fa’ailoa mai ai le alofa ma le agalelei o lo tatou Matai oi le lagi, e ala i Lana tausiga alofa mo i tatou e le mavae. E ao ai ona o tatou fa’apea ifo, “Le Tama e, ia E alofa, ma toto i o matou loto le fa’atuatua i Lau Afio, aua o Oe o lo  matou malosi’aga ma lo matou maluapapa i taimi o faigata ma puapuaga o le soifuaga nei, ia tumau atu pea i Lau Afio le vi’iga ma le fa’ane’etaga e fa’avavau, fa’avavau lava, Amene.”

Na muta mai la tatou tala, ina ua faia le talatalanoaga mulimuli a Jerry Jaxx, o Gene Johnson ma Fitafita a le Ami lea o le a feagai ma le tapeina o manuki o lo’o totoe i totonu o le nofoaga i Reston. Ua fa’ailoa manatu ae maise o fesili e pei ona mana’o i ai Jaxx ina ia fesiligia ai i la’ua, mo se malamalama’aga a i latou nei, aua le galuega o le a feagai ai.

Na tau mafaufau nei le tama’ita’i o Nicole Berke, pe e maua sona avanoa e alu ai i totonu o le fale, ma na i’u ai ina fesili, “O le a le umi o le a faia ai le galuega lenei.?” Na tali Jerry Jaxx e fa’apea, “Se i iloga lava e mamate uma manuki.”

E faselau limasefulu (450) manuki o lo’o i totonu o le fale lenei, ma o manuki uma nei e tatau ona ta pe uma, o le galuega lea o le a feagai ma le vaega a Jerry Jaxx. Na fa’apea le manatu o Nicole, “Oka, oka e, e faselau lima sefulu manuki, oka, oka e,  lona uiga e o’o mai le fa’avavau e le uma.” E le i to’atele ni Fitafita na fai ane ni fesili, aua ua tete’i uma i le fa’amatalaga a Gene Johnson e uiga i tagata faigaluega e to’alua lea ua a’afia i le fa’ama’i.

Ua uma ona fai suti o Jerry Jaxx ma lana paga le ali’i Satini o Thomas Amen, ua o nei i totonu o le potu fa’apitoa, e toe fai ai isi tapenaga ae le i o i totonu o potu o lo’o i ai manuki. ina ua ulufale Jaxx ma Amen, na la va’aia ai le fa’aleagaina o mea uma i totonu o potu nei. O manuki ua na o le pupula mai i a la’ua, ma luelue mai le pa u’amea lea e i ai i totonu. O nisi o manuki ua na o le pupula mai, ae ua mamate. O nisi o lo’o tafetafe mai le toto i o latou isu, ma nofonofo ua le gaioi. Na alu nei le solo a Jerry ma Thomas i le pito i tua o lo’o i ai fo’i isi potu. Na o la va’aia ai le tulaga lava lea e tasi ua o’o i ai manuki, o le tafe mai o le toto mai i o latou isu, fa’apea ma le tafe mai o latou faua.

Na va’aia e Jerry ma Thomas le fia a’ai o manuki, aua ua tolu aso e le i toe fafagaina, ona ua alu le solo a tagata faigaluega i o latou aiga, ua le toe fo’i ane. O le isi itu, na fai le fa’atonuga a le ali’i foma’i manu o Dan Dalgard, ia ‘aua ne i toe alu ane se isi i le fale o lo’o i ai manuki, ma tapunia loa.

O lea la ua o’o ane le vaega a le Ami a le Malo Tele e fa’afoe le galuega i le tapeina  o manuki o lo’o i totonu o le nofoaga lenei. Fai mai, ua so’o le fale atoa o feoa’i ai Jerry ma Thomas ma matamata i totonu o pa o lo’o i ai manuki. Na iloa atu nei, o lo’o to’a le toto i totonu o ‘apa o lo’o i lalo o pa o manuki. O le isi va’aiga sa o la iloa, o lo’o tafe isu o manuki e foliga mai ua maua i le fu lu (flu).

Fai mai na avea lea ma tulaga ua te’i lava ua nenefu atoa le pulou o Jerry, ua tau le iloa atu se mea, ae na o leo o manuki o lo’o ia lagona pea. E ui lava i lea tulaga, ae sa fa’ato’ato’a pea lona loto ma lona mafaufau, ina ia sao ma uli le la galuega ma le ali’i Satini o Thomas.

O le isi itu sa manatu i ai le ali’i o Jerry Jaxx, o le sogalemu lea o Fitafita, ona o lea ua va’ai atu nei, o mea masei mea ia ua tutupu mai. Na fa’alogo fo’i i le tala a lona to’alua o Nancy na fai ane i a te ia, a’o le i tu’ua lo la fale i lea aso.

Na fai ane Nancy, “Jerry, ia e fa’aitete lava, ma ia e mataala i taimi uma, ‘aua e te fefe pe e te popole, aua a o’o loa oe i le tulaga lea, o lona uiga, o le a a’afia Fitafita o lo’o i lalo o lau va’ava’aiga. ia e loto tele ma faifai malie, ‘aua fo’i le fa’anaitnatia la outou galuega, ae ia e mataala i taimi uma, ou te le fia fa’alogo atu lava ua tupu mai se fa’alavelave i a te oe. O lau va’aiga muamua lava, o tagata o lo’o i lalo o lau pule’aga, ia e manatu i ai, o lo latou saogalemu ma o latou ola, ua i ou lima, i le taimi lava tou te ulufale ai i totonu o le nofoaga o lo’o i ai manuki.”

E faia pea…

Fa’aliliu: Akenese Ilalio Zec