Ads by Google Ads by Google

Fagogo: O le ‘Au Uso ma le Purinisese mai Initia

[Soso’o ane loa lau faitau i le toe soso’oina o la tatou tala fa’asolo, lea na gata mai i le vaiaso na te’a nei i le taimi lea ua tula’i mai ai le tagata lea sa nofo i le nofoali’i ma ana a’upega ma ia osofa’ia loa le fitafita fa’apitoa a Iasoni lea o lo o tu atu i le faitoto’a.]

E le’i toe fa’atali le fitafita a Iasoni i le taimi na osofa’ia ai o ia e le aloali’i ae ua a’apa atu fo’i o ia i ana a’upega ma la fetaui loa. Ua le ‘iloga se tulimanu o le potu e oso solo i ai le fetauiga a le to’alua lea ae o le taimi lea o lo o pulu mai fo’i isi fetauiga i fafo atu o le potu, lea o lo o tau ai le isi fo’i fitafita e tasi a le tama o Iasoni ma isi fitafita e to’alua a le tupu, fa’atasi ai ma manu fe’ai ia na o latou osofa’ia fitafita e to’alua ia ua maliliu. O le lelei tele o le tau a le aloali’i lea o lo o tau ma le isi fitafita fa’apitoa i totonu o le potu na i’u ina manu’a ai le ali’i fitafita ina ua lavea lona tau’au i se tasi o osofa’iga malosi ma fa’avaivai ai loa ua si’ilima. E le’i fa’atali le aloali’i i lona fa’ataalise atu ma saisai vae ma lima o le ali’i fitafita ma ia fa’atonuina ai loa isi ana fitafita e auina atu o ia i le falepuipui. E o’o fo’i i le isi fitafita e to’atasi a Iasoni lea na fetaui i fafo atu o le potu ma isi fitafita a le malo o Initia, ua si’ilima fo’i ina ua ia iloa ua fa’avaivai lana paga.

Se’i o tatou liliu atu lava i le tama’ita’i purinisese o Lorina po o fea lea ua o’o i ai lana faigamalaga i le taimi nei. Na ona taunu’u lava o fitafita fa’apitoa a le tama o Iasoni lea o lo o latou aveina atu le tama’ita’i purinisese i le matafaga lea o lo o fa’atali mai ai le isi o latou va’a fa’apitoa, tu’u ai loa ma le purinisese i totonu o le va’a ma aga’i atu loa i le moana i le vaega o lo o taula mai ai la latou fuava’a tau, ae toe aga’i atu fitafita i uta mo le fa’aauauina o le osofa’iga, peita’i e le’i umi na alu ‘ese atu le va’a pa’u lea o lo o malaga atu ai Lorina ma isi fitafita e to’afa ae o latou va’aia loa le osofa’i atu e ni isi o fitafita a le fili lea o lo o i le isi itu o le motu, ae ui i ia osofa’iga, na fai si televave ma le saoasaoa o le alu a le va’a pa’u lea ma faigata ai loa e le vaega a le fili ona o latou toe osofa’ia. Na ona taunu’u lava o fitafita i le vaega o lo o i ai le fuava’a tele i tai, tu’u mai loa i lalo ma le mae’a e avatu ai le purinisese i luga, o le taimi lava na taunu’u ai purinisese Lorina i luga o le va’a na fa’anatinati ai loa togafitiga a foma’i o lo o i ai mo lona saogalemu, ae maise ai ina ia mautinoa o lo o tulaga lelei pea le malosi o lona tino. E pisi foma’i i a latou togafitiga ae o le taimi lea ua toe aga’i mai ai le va’a pa’u i uta i le pa’u matu mo le toe siakiina atu lea o isi a latou fitafita o lo o i ai pea i totonu o le a’ai i le taimi lea.