Ads by Google Ads by Google

FAGOGO: O KATI LE LEOLEO NANA

[Sosoo ane loa lau faitau i le tatou tala faasolo mo lenei vaiaso, lea na gata mai i le vaiaso na tea nei i le taimi lea ua maea ai le fonotaga a Konesula a aai eseese o le malo o Italia ma le tama o Kati, ma o lea ua alo atu i le ‘aiga fiafia.]

 

Na maea le fono faapitoa sa faia a Konesula o aai eseese i totonu o Italia ma le tama o Kati, ona alo atu loa lea i le ‘aiga faapitoa e aloaia ai le isi tofiga fou lea ua sauni le malo e faaee atu ia te ia. O le tama o Kati, ua silia ma le 30 tausaga le umi o lana tautua i le galuega faaleoleo nana, ma ua masani i soo se gaioiga atoa ai ma foliga o tagata i nofoaga eseese ma sauniga tumutumu faapea. A’o faia le fono, sa maitauina e Kati alii leoleo e toalua ia na faafeaoa atua o ia i totonu o le fale tele sa faia ai le fono, e pei lava e i ai ni o la uiga e faaali atu ia te ia, e le gata e ese lava o la foliga ae pei foi o ni tagata o lo o taupulepule e faatino se gaioiga e faavevesi ai se nofoaga ma le fonotaga. E nofo fua Kati i le laulau ae o lona mafaufau lea ua taamilo solo i se gaioiga e ao ona ia faia pe afai ae tula’i mai se faalavelave faafuase’i i le nofoaga lea.

 

I luga o le uati o lo o i le lima o Kati, e i ai le tama’i masini e mafai ona oo ona otomeki lea ona taunuu le valaau i le Ofisa o Leoleo e faatatau i ni faalavelave e tutupu faafuase’i, ma o le gaioiga lena sa faia e Kati, na ona oomi lava e le tama o le ki o lo o i tafatafa o le pito i luga o lana uati, ona fesootai loa lea o lana valaau ma le Ofisa o Leoleo, ona ia toe faaaoga lea o numera faapitoa e faaaoga i taimi o faalavelave e faailoa atu ai le mea lea o le a tupu. O le taavale na sau ai le tama, o lo o paka i luma tonu lava o le fale ma o luma o le taavale e i ai se tama’i mea pu’eata e faaaoga i taimi o suesuega a le tama o Kati, ma o le mea pu’eata lea o lo o fesoota’i ma le tama’i masini o lo o faapipi’i aga’i i lana uati. Ina ua ki e le tama le masini sa ia maitauina ai gaioiga uma o lo o faia i fafo atu o le fale faapea ai luma o le faitoto’a, ae na faateia le tama ina ua ia vaaia i gaioiga a alii leoleo o lo o tiute i le pa lea e ulufale mai ai taavale ma tagata i totonu o le lotoa, e i ai fana ia ua tufa atu i isi leoleo ma e foliga mai e i ai le faalavelave o le a tupu.

 

Na faateia uma Amapasa a’o faia la latou meaai ina ua tula’i Kati ma faanoi se’i alu atu i le faletaele. Na ona taunuu lava o le tama i totonu o le fale taele, pei loa o le emo o le mata lana gaioi i le faafesoota’i lea o le ofisa o leoleo mo se fesoasoani, peitai e vili atu le tama ua leva ona si’o uma e leoleo le nofoaga lea o lo o faia ai le fono, ma ua latou iloa mai fo’i gaioiga o lo o faia i totonu o le lotoa e pei o fana ia ua tufa atu i isi leoleo faitoto’a, e faliu loa le tama o le a toe savali aga’i atu i le fono o lo o faia ai le taumafaga ae ona vaaia loa tagata ofu uli e to’afa o lo o tofu ma fana i o latou lima ua ulufale faamalosi i totonu o le potu, ma e foliga mai o ia lea o lo o saili e le au alii ia.