Ads by Google Ads by Google

Faamoemoe amata galuega mo e aafia gasegase o le mafaufau i le tausaga fou

Na faamanino e le tamaitai sui loia sili, o Mitzie Jessop, i luma o le Faamasinoga Maualuga i le taeao ananafi e faapea, o le masina o Ianuari, 2014 lea ua fuafua e amataina ai le galuega, mo le fausia o le fale mo i latou e a’afia i gasegase o le mafaufau (mental health facility).

 

Na saunoa le afioga i le faamasino sili ia Michael Kruse e faapea, i tausaga ua mavae a’o fa’agasolo mai iloiloga o lenei mataupu, sa fai lava ma fesuia’i fuafuaga ma talanoaga sa faia, peitai e foliga mai o le taimi nei, o lea fo’i ua i ai isi suiga ma ua fia iloa e le faamasinoga po o fea tonu lea ua taoto i ai lenei mataupu.

 

Ae na taua e Mitzie e faapea, i le iloiloga mulimuli lava e faatatau i lenei mataupu i ni nai masina e le’i mamao atu, na folafola ai e le Faatonusili fou o le Matagaluega o le Soifua Maloloina ia Motusa Tuileama Toatolu Nua e faapea, o le a galulue faatasi i latou ma le pulega o le falemai o le LBJ i Fagaalu, mo se avanoa e fa’atula’i ai se potu e valu moega e faaaoga e i latou e aafia i le gasegase o le mafaufau, ae se’i fa’agasolo gaioiga o lenei mataupu.

 

Na faailoa fo’i e Mitzie i luma o le faamasinoga ananafi e faapea, ua tele a latou fonotaga ua maea ona faia e faatatau i lenei mataupu, ma ua i ai le faamoemoe o le masina o Novema 2013 e tatau ona faasalalau ai le tauofoga mo le galuega, ae o le masina o Ianuari 2014 o lo o fuafua e tatau ona amata aloaia ai le galuega.

 

Sa ia taua foi e faapea, o lo o latou galulue vavalalata pea ma le Ofisa o le Initeria mo lenei mataupu, aua o i latou lea o lo o faatupeina le galuega, ma ua maea fo’i ona tuuina atu le lagolagosua a le kovana sili ia Lolo Matalasi Moliga mo le faanatinati o lenei galuega taua.

 

Na pau le popolega na faaalia e le loia fautua ia Douglas Fiaui e faatatau i lenei mataupu, ina ne’i avea fesuiaiga o lo o faia i le taimi nei ma itu e aafia ai gaioiga sa faataoto mai e le malo ma le Initeria i tausaga ua mavae, peitai na faamaonia e Mitzie i luma o le faamasinoga, o lo o tumau pea le tupe mo le fausiaina o le galuega i le $1.2miliona, o lo o tumau fo’i feutanaiga sa faia i tausaga ua mavae e pei o le mautinoa lea o le saogalemu o tagata e nonofo i le fale i le taimi e faaaoga ai.

 

Na taua e le alii faamasino sili ia Michael Kruse e faapea, ua tatau ona faagasolo le faatinoina o le galuega, ona o le tele o faaiuga o vaiaso taitasi, e avea ai le faapaologa o le fale faamasino maualuga ma nofoaga e faamautu atu i ai le to’atele o i latou o lo o aafia i le gasegase o le mafaufau, ma o le isi lea popolega tele o lo o i ai i le faamasinoga, o le saogalemu o tagata lautele atoa ai ma i latou nei.

 

O ni isi o i latou o lo o aafia i gasegase o le mafaufau e masani ona vaaia i luma o faleoloa, o ofisa o le malo po o isi fo’i vaega o le alatele, ae o isi e savavali solo i luga o le alatele.

 

I le talitonuga o le faamasinoga, o le faatonusili o le Soifua Maloloina o lo o i ai le tiute tauave e pei ona faatulaga mai e le tulafono, mo le fausiaina lea o se nofoaga mautu e tuu ma tausi ai i latou nei.