Ads by Google Ads by Google

Faafetaia Togiola sao fanau ma le atunuu pesepesega kerisimasi

Na fa’afetaia e le afioga i le kovana sili, le sao a fanau aoga, autalavou, aufaipese ma fa’alapotopotoga eseese i le atunu’u, i lo latou sao mo le faamatagofie lea o pesepesega o le kerisimasi, tauala mai i le polokalama a le Arts Council lea na tatalaina i le po o le aso Sa na tea nei, ma le faamoemoe e tapunia i le po nanei.

“E faafetai atu ia te outou uma lava o le a tofu sao mo le faamatagofieina o lenei faamoemoe, i fanau laiti, o aoga, aufaipese, autalavou atoa ai vaega eseese mai le atunuu, ia avea lo outou sao o se meaalofa sili lea mo le faamanatuina o le fanau mai lea o le pepe fou,” o se vaega lea o le saunoaga a le alii kovana, ina ua ia tatala aloaiaina Pesepesega o le Kerisimasi a le Arts Council i le po o le aso Sa na tea nei.

Saunoa le alii kovana, o le lolofi mai o vaega faafiafia nei e ofo mai la latou sao mo le polokalame i lenei tausaga, ua manino ai lo latou naunau e fia fai mea sili mo le atunuu ma tagata uma.

“Ia avea pesega ma faafiafiaga o le kerisimasi o lenei tausaga, o se auala e faailoa mai ai lo tatou lagolagoina o le fanau mai o le Mesia, ina ia faatumauina ai le fiafia e faamanatu nei aso,” o se vaega lea o lana saunoaga.

Sa faapea foi ona faafiafia ai le aufaipese mai le Aufaigaluega a le kamupani i’a o le StarKist Samoa mo le uluai taimi.

Ina ua fesiligia e le Samoa News nisi o le aufaipese a le StarKist Samoa, na o latou taua ai lagona o le fiafia ina ua maua lenei avanoa e fai ai so latou sao i le polokalame o pesepesega o le kerisimasi i lenei tausaga.

O nisi o i latou e le o se taimi muamua lea ua pepese ai i lenei polokalame, tauala mai i aufaipese a ekalesia ma autalavou, peitai o le uluai taimi lenei ua fai ai latou ma sui o le kamupani i’a e momoli mai pesega mo le kerisimasi.

O se tasi o vaega sa maitauina i aufai pese sa faafiafia i le uluai po, e amata atu lava le matutua o fanau na aofia ai i faafiafiaga nei mai le 4 tausaga seia oo atu lava i tagata matutua.

Na matua  faatumulia le malae i Fagatogo i le mamalu o le atunuu, uo ma aiga sa molimauina lenei faamoemoe, lea foi sa faatasi ai nisi o taitai o le atunuu.

Saunoa le afioga i le faatonusili o le Arts Council ia Leala Pili ina ua fesiligia e le Samoa News, o le agaga autu o pesepesega ma faafiafiaga mai aufaipese ua lautogia mo lenei tausaga, ia faailoa i a latou pesega ma faafiafiaga le agaga o le kerisimasi.

“O le itu taua ia mafai ona o latou momoli mai le feau o le kerisimasi e ala i pesega, ina ia siitia maualuga ai lagona o lea aso taua,” o le saunoaga lea a Leala.

E ese ai i pesega o le kerisimasi mai aufaipese eseese, ae sa aofia ai i faafiafiaga a nisi o aufaipese pese e aualoa ai i Toa o Samoa o loo tautua i soo se vaega o le lalolagi.

E 14 aufaipese na faafiafia i le uluai po o lenei faamoemoe, toa 13 na faafiafia i le po anapo ma le toa 12 lea ua faamoemoe e taualuga ai le polokalame i le afiafi na nei, ma tapunia ai loa lenei polokalame i se saunoaga mai le afioga i le Lutena Kovana ia Faoa A. Sunia.