Na fa'afetaia e ta'ita'i o le atunu'u le mamalu o le aufai fa'atoaga sa mafai ona auai i le fa'aaliga o lenei tausaga, i le tulaga mataina ma le manaia o le latou taumafaiga, lea fo'i sa molimauina e le atunu'u i le taeao o le aso Lulu.

Na matua faatumulia le malae o le Su'igaula o le Atuvasa i Utulei i le mamalu o le aufai fa'atoaga, le atunuu na maimoa aemaise ai ta'ita'i o le malo ma le atunu'u, na lolofi atu latou te fia molimauina le fa'aaliga lona tolu a le aufai fa'atoaga mo lenei tausaga.

O vaega sa molimauina i le fa'aaliga e aofia ai fua o fa'aeleeleaga, fualaau 'aina, aemaise ai, lafu manu atoa ai ma taumafa vela.

Sa fa'apea fo'i ona i ai fualaau 'aina mai Samoa ma Tonga, lea na taua e le fa'atonusili o le Ofisa o Fa'atoaga ia Lealao M. Purcell e fa'apea, o le maua o le avanoa e aumai ai fua o fa'aeleeleaga mai Samoa e fa'alauiloa i le tauvaga a le aufai fa'atoaga, o se auala lelei lea e fa'ailoa atu ai i le aufai fa'atoaga a le atunu'u, e mafai fo'i e le aufai fa'atoaga a Samoa ona toto fualaau 'aina o lo o manatu le to'atele e le mafai ona ola iinei.

O se tasi o itu na taua e Lealao ua maitauina le fa'ateteleina i le tauvaga o lenei tausaga, o tulaga i fualaau aina taumafa mata, lea sa unaia malosi le aufai fa'atoaga i tauvaga e lua ua tuana'i atu ina ia fa'amalolosi e toto.

"O fualaau 'aina taumafa mata le isi vaega ua maitauina le fa'ateteleina i le tausaga lenei, ae sa tau le maua i tauvaga ua mavae, o le agaga atoa e mafua ai ona una'i le aufai fa'atoaga e toto fualaau 'aina nei, o isi nei taumafa e fesoasoani malosi i le soifua maloloina o le tino, aemaise o lo o vaaia le to'atele o tagata i le atunu'u o lo o a'afia i gasegase le pipisi", o le saunoaga lea a Lealao.

"O le isi tulaga ua maitauina le tulaga lelei mai i lenei tausaga, o tulaga i taumafa e pei o le fa'i, talo ma le ta'amu, o taumafa nei e fa'alagolago i ai aiga i le itu tau tupe pe a fa'atau, ae fa'alagolago ai fo'i le fofoga taumafa o le atunu'u, e fa'apena fo'i i lafu manu ma isi lava vaega eseese o fua o fa'aeleeleaga i lenei tausaga, ua maitauina le siitia o le tulaga ua i ai tapenaga a le aufai fa'atoaga", o le isi lea saunoaga a Lealao.

I le itu o taumafa vela, sa maitauina le tele o taumafa Samoa eseese na mafai ona kukaina ma tofo ai fo'i le mamalu o le atunu'u, e aofia ai ma ta'ita'i o le malo sa maua le avanoa latou te molimauina ai le fa'aaliga a le aufai fa'atoaga.

"O le taua o le supoesi lea ua ou kukaina, e toe fa'amanatu ai taumafa sa sili ona pele i tuaa i aso ua mavae, o taumafa fo'i sa leai se ma'i na maua ai, o le supoesi e gaosi i le aano o le esi ma le pe'epe'e, leai lava ma se isi mea e toe fa'aopoopo i ai", o le saunoaga lea a le tina ia Nema Lafaitele, o se tasi o tina sa fa'alauiloa ana kuka i le taeao ananafi.

Na taua e le susuga a Logotaeao Ifopo, o se tasi o alii fai fa'atoaga mai Pava'ia'i e fa'apea, o le taua o fa'aaliga fa'apenei a le aufai fa'atoaga, e mafai ai ona feiloa'i le aufai fa'atoaga ma fa'amasani le isi i le tasi, ae maise ai fo'i, o se avanoa lelei lea e mafai ai ona molimauina e le atunu'u galuega o lo o fita i tuga ai le aufai fa'atoaga, o le tapenaina lea o le fofoga taumafa a le atunu'u i aso uma.", o le saunoaga lea a Ifopo.

Na fa'ai'u le faaaliga a le aufai fa'atoaga i lenei tausaga i fa'afiafiaga ma tufatufa ai loa fa'ailoa mo i latou ua fa'amanuiaina.