O le ali’i e 42 tausaga mai Samoa lea na malaga mai i se pemita e 30 aso ma nofo fa’asolitulafono ai lava i le atunuu, ua taofia nei i le toese i Tafuna mo le 28 masina, o se tasi lea o tuutuuga o lana nofova’ava’aia e 7 tausaga, ona o le fa’alavelave lea na ia faia ai uiga mataga i se teineititi e 15 tausaga le matua.

O Falani Afoa, na ulua’i tu’uaia o ia i moliaga mamafa e aofia ai le faiaiga i se teineititi e laititi i lalo o le tulafono; faia o uiga mataga fa’afeusuaiga, atoa ai ma lona tagofia o itutinosa o se tama’ita’i e le i fa’aipoipo i ai, ae i lalo o se maliliega na latou sainia ma le malo ma talia e le fa’amasinoga, na ia tali ioe ai i moliaga o le faia o uiga mataga faafeusuaiga, ae solofua e le fa’amasinoga isi moliaga sa totoe ai i le pepa o tagi na fa’aulu e le malo.

E talitonu le fa’amasinoga, ana fa’amalosia e le Ofisa o Femalagaaiga a latou tulafono e ala i le toe fa’afo’i o Afoa ina ua mae’a le pemita na malaga mai ai, atonu e le tula’i mai le fa’alavelave e pei ona a’afia ai le teineitiiti na faia fa’asaga i ai le solitulafono.

Na fa’ailoa e Afoa i leoleo ina ua fesiligia o ia, sa ia iloaina lava e 15 tausaga o le teineititi, ae lei avea lea ma itu na mafai ai ona taofi ona lagona tu’inanau, ae sa ia manatu pea e fa’atino ona lagona sa i ai e ala i le la feusua’i ma le tama’ita’i.

Na fa’atoese le ua molia e tusa ai o lana solitulafono sa fai, ma ia talosagaina ai se isi avanoa e toe fo’i atu ai i tua i lona aiga e tausi lona tama. Na taua e Afoa i le fa’amasinoga, e na o laua lava ma lona tama le aiga, e leai fo’i se isi e fa’amoemoe i ai lona tama i le faiga o ana meaai aemaise ai o le totoina o le fa’atoaga o lo o fa’alagolago i ai le tausiga o le la aiga.

Sa ia fa’atoese fo’i i le tama’ita’i na a’afia ma lona aiga, e alolofa e fa’amagalo o ia e tusa ai o le solitulafono sa ia faia, ua ia lagona fo’i lona salamo i le leaga o le mea sa ia faia.

Na finau le loia a Afoa ia Joel Shiver i le fa’amasinoga e fa’apea, o le sese o le filifiliga sa faia e le ua molia, na mafua ai ona tula’i mai le fa’alavelave e pei ona nofosala ai. Na finau Shiver i le fa’amasinoga ina ia fa’asala Afoa i se fa’asalaga nofovaavaaia, ona ua salamo o ia ma ua toe fia fo’i i lona aiga e tausi lona tama, ae na taua e le loia a le malo ia Tiffany Oldfield e fa’apea, e leai se mea e fai ai ma alofaga le sese o le filifiliga sa faia e Afoa, aua e matua tele le eseesega o ona tausaga ma tausaga o le tama’ita’i laititi na a’afia.

Na finau Oldfield e fa’apea, o tausaga e 42 a Afoa ma le 15 o tausaga o le teineititi na a’afia, ua manino ai le lava o lona matua e mafai ai ona ia faia se filifiliga tatau ma le sa’o, peita’i, sa ia filifili lava la te faiaiga ma lenei tama’ita’i laititi.

Na fa’ai’u le fa’afinauga a le tama’ita’i loia i lona fautuaina o le fa’amasinoga ina ia fa’asala Afoa i se fa’asalaga e talafeagai ma le tulafono.

E 7 tausaga na manatu le fa’amasinoga e fa’asala ai Afoa i le falepuipui, atoa ai ma lona totogiina o le salatupe e $5,000, peita’i o le a fa’amalumalu lona tuliina o le fa’asalaga fa’a falepuipui, ae o le a nofova’ava’aia o ia mo le 7 tasuaga i lalo o poloaiga a le fa’amasinoga.

O ni isi o poloaiga e aofia ai lona tuliina o masina e 28 i le falepuipui, a mae’a, ona ia tuua lea o le teritori ae toe fo’i atu i le atunu’u na malaga mai ai.

Ua poloaina fo’i o ia na te totogi le salatupe e $2,000, ae fa’amalumalu le isi $3,000 o lo o totoe ai, fuafua lava i lona usita’i i poloaiga a le fa’amasinoga.