O le pili taufaaofi lea na fa’aulufale i luma o le maota maualuga i le taeao ananafi e sii ai alauni mo senatoa ma faipule, ua fa’aigoaina e ni isi o senatoa e fa’apea, “e le fai mo i latou o lo o nofoia nofoa a Itumalo i le taimi nei, ae fuafua mo fanau o le lumana’i”.

O le tulafono taufaaofi e pei ona fa’aulufaleina e le afioga i le Peresetene o le Senate ia Gaoteote Palaie Tofau, o lo o talosagaina ai le toe fa’aopoopo o le ta’i $10,000 i alauni o Senatoa ma Faipule.

E ta’i $30,000 i le tausaga alauni o senatoa ma faipule o lo o i ai i le taimi nei, peita’i o le tulafono taufaaofi lea ua i luma o le maota maualuga, ua talosagaina ai le sii atu i luga i le ta’i $40,000 i le tausaga.

Mo le Peresetene o le Senate ma le Fofoga Fetalai o le maota o sui, e ta’i $40,000 i le tausaga alauni o lo o i ai, ae o le pili fou e si’i ai i le ta’i $50,000 i le tausaga.

E lei atoa se 5 minute na fetufaa’i ai afioga i senatoa i le taeao ananafi e fa’atatau i le tulafono lenei, i se iloiloga puupuu na valaauina e le taitaifono o le Komiti o le Paketi ia Lagolagi Fonoti Savali Vaeao ina ua mae’a le tauaofiaga a le maota maualuga, ae tasi loa le finagalo o afioga i senatoa e pasia le pili taufaaofi, ma sauni loa e tuuina atu i luma o le maota mo le palotaina.

Saunoa Laolagi i le taimi o le iloiloga e faapea, o lo o i ai se vaega tupe fa’aopoopo a le Fono Faitulafono i totonu o le Paketi mo le tausaga tupe 2015, o lo o fa’amoemoe e fa’atupe ai le pili taufaaofi lenei mai se vaega o le tupe fa’aopoopo lea a le Fono, ua mae’a fo’i ona la feutana’i ma le alii peresetene o le Senate, ma ua fa’ailoa fo’i lona lagolagoina o lenei fuafuaga.

Na vave ona saunoa le afioga i le alii senatoa ia Soliai Tuipine Fuimaono ma ia faatu le mau ina ia faamuta felafolafoaiga a le komiti, ae sauni loa e tuu atu le pili i luma o le maota mo le faapasiaina.

Na taua e Soliai e fa’apea, e leai ma se senatoa na te fesiligia le taua o le tulafono taufaaofi ma le agaga na mafua ai ona fa’aulu i luma o le maota.

“Tatou sapasapaia lenei tulafono taufaaofi, o nei lava mea e aoga mo nai a tatou fanau i le lumana’i”, o le saunoaga lea a Alo Faauuga e lagolago ai le mau na fa’atu e Soliai e fa’amuta loa le talanoaina o le tulafono taufaaofi.

A o lei saunoa le sui peresetene ia Nuanuaolefeagaiga S. Nua le tulafono e fa’atolu le mau, sa ia talosagaina le vaega tupe lea na ‘veto’ e le alii kovana mo le tausaga tupe lenei 2014 e le o faaaogaina, pe le mafai ona tuu atu e fa’aopoopo i le alaga tupe e fa’atupe ai le pili taufaaofi, ae na saunoa Laolagi e fa’apea, e le tatau ona aafia le vaega tupe lea ina nei faigata ai le tulafono, ae o le alagatupe a le fono mo le tausaga tupe 2015, o iina lea ua faamoemoe e faatupe mai ai le pili.

Saunoa Gaoteote e fa’apea, e le o talosagaina e le Fono se isi vaega tupe faaopoopo mo le pili taufaaofi lenei, ae o le tupe lea ua maea ona tuu i totonu o le paketi a le fono mo le tausaga tupe fou, o se vaega o lea tupe ua faamoemoe e faatupe ai siitaga o alauni a senatoa ma faipule.

“E mafai lava fo’i ona tatou fa’aaogaina le vaega tupe lea ua fuafua e faatupe ai siitaga i alauni a senatoa ma faipule, e fa’atupe ai ni isi gaioiga a le fono, peita’i ua manatu, e sili pe a aumai le tupe lea e fa’atupe ai siitaga i alauni, aua e le mo tatou o lo o i ai i le taimi nei, ae aoga mo a tatou fanau o lo o aga’i mai i nofoa a itumalo o le atunu’u”, o le saunoaga lea a Gaoteote na lagolagoina e le afioga i le Sa’o ia Magalei Logovii.

A o le i fa’aulufale i luma o le senate le pili lenei e sii ai alauni a senatoa ma faipule, o le isi lea mataupu na aofia i felafolafoaiga a afioga i faipule ina ua latou toe talanoaina le pili a le maota o sui, e faatulaga ai siitaga i totogi o le kovana ma le lutena kovana.

Ua fa’atolu ona talanoaina e faipule le pili e sii ai totogi o le kovana ma le lutena kovana ae le i maua lava so latou finagalo autasi.

Na taua e ni isi o faipule i le taimi o le latou iloiloga ananafi lo latou lagolagoina o le tulafono e sii ai totogi o le kovana ma le lutena kovana, e tatau fo’i ona fa’apena ma totogi o senatoa ma faipule, e tatau fo’i ona sii i luga, aua o i latou o ta’ita’i o le atunuu.

Saunoa le Sui Fofoga Fetalai ia Faafetai Talia I’aulualo e fa’apea, o totogi o le fono faitulafono faapea ai le kovana ma le lutena kovana, o totogi ua fa’atulafono, e le mafai foi ona faia i ai ni siitaga sei vagana ua sui le tulafono.

Translation of this story can be found in today’s issue of Samoa News: “Senate moves forward with bill to increase Fono office allowances”