Ads by Google Ads by Google

Fa’ai’u i le falepuipui vevesi va o ni ali’i ave pasi

Na fa’ai’u i le falepuipui i Tafuna se vevesi na tula’i mai i le va o ni ali’i ave pasi se to’alua, ina ua fautuaina e le loia a le malo le leoleo sa suesueina le vevesi, e taofia faapagota le ave pasi lea na faaoolima i le isi ave pasi.

 

O le vevesi na tula’i mai i le taeao o le aso Lua o le vaiaso na te’a nei i se vaega o le nuu o Fa’ilolo pe tusa o le 8:45 i le taeao, ina ua faaoolima le alii ave pasi o Foemua Taveuveu i le alii ave pasi na aafia, ma alu ai loa le alii ave pasi na aafia ma faila lana tagi i le ofisa o leoleo.

 

Na taua i faamaumauga a le fa’amasinoga e fa’apea, na fa’afuase’i ona oso fa’alava ane le pasi a Taveuveu ma poloka ai le pasi a le ali’i na a’afia, toe poloka atu ai ma le feoa’i o ta’avale i luga o le auala.

 

O lo o tuuaia Taveuveu i lona savali atu i totonu o le pasi a le alii na aafia, ua uu le kola o lona ofu ma toso ese mai o ia mai le nofoaga o lo o nofo ai, ma taumafai e toso aga’i i fafo o le pasi, ma avea ai ma mafua’aga o le manu’a o se vaega o foliga o le alii ave pasi na aafia.

 

Ina ua maea ona faia e Taveuveu le gaioiga e pei ona taua, sa ia fa’afefe le alii ave pasi na aafia ma fai i ai, o le a ia vaai i lana mea e fai ia te ia pe a fo’i atu i le fale.

 

Na taua e leoleo i le latou ripoti e fa’apea, ana le tulioso atu le pasese ma vaovao le alii o Taveuveu e le uma lana gaioiga sa fai.

 

Sa togafitia le alii ave pasi na aafia e le EMS ma toe te’a ai o ia i tua, ae i suesuega sa faia na iloa ai, e tuaoi alii ave pasi na vevesi, o le to’alua o le ali’i ave pasi na a’afia e tausoga ma le alii ave pasi o Taveuveu.

 

Na fesiligia e le alii leoleo sa gafa ma le suesueina o le mataupu se fautuaga a le tamaitai loia sili lagolago ia Tiffany Oldfield e tusa ai o lenei mataupu, ina ua mautinoa e le saogalemu le toe fo’i atu o le ali’i ave pasi na a’afia i le fale, ona o lea ua maea ona faia i ai folafolaga a Taveuveu, ma faia ai loa le faaiuga e taofia faapagota Taveuveu ina ia puipui ai le ono tula’i mai o se isi fa’alavelave matuia.

 

O lo o tuuaia Taveuveu i moliaga mama e lua o le faaoolima i le tulaga tolu ma le faatupu vevesi i nofoaga faitele.