Ua fa’aalia e ni isi o tama ma tina matutua i le atunu’u lo latou fa’afetaia o le Matagaluega o le Soifua Maloloina ma le latou tautua ua mafai ona o o atu i tua i aiga, lea ua latou maua ai le avanoa mo auaunaga e na o le falema’i e mafai ona maua ai.

O ni isi o ia auauna e pei ona taua e Anarosa Mauga o Pago Pago e fai ai o ia ma sui o lona tina matua na mafai ona asia e sui o le Matagaluega o le Soifua Maloloina i le vaiaso ua tuana’i, e aofia ai le siakiina o lona tino, siaki le toto, ma fai tautua uma e manaomia mo tagata matutua.

“O se auaunaga taua mo si o o’u tina matua ua faigata ona oo atu i le falema’i ona o gasegase o le tino, ae ua ia lagona le fiafia ma fa’afetai i le Matagaluega ma le malo, ona o le avanoa ua mafai ona latou asia ai lo matou aiga”, o le molimau lea a Anarosa e fai ai o ia ma sui o lona tina matua o lo o fa’ataotolia i le aiga ona o gasegase o le tino.

Na taua fo’i e Anarosa e fa’apea, o le aoga o le auaunaga lenei, ua mafai ai ona silafia e foma’i le ituaiga togafitiga o lo o moomia e si ona tina, ma ua maea ona faia tuutuuga mo le umi e toe asia ai lo latou aiga e foma’i, ina ia mautinoa e le toe misi talavai mo si ona tina matua.

Na fa’amaonia mai e le Fa’atonusili o le Matagaluega o Soifua Maloloina ia Motusa T. Nua i le vaiaso na te’a nei i le Samoa News, le toe amata ai o le auaunaga lenei a le mtagaluega, e pei o le asia e foma’i ma sui o le matagaluega o aiga i nuu taitasi o lo o fa’ataotolia ai matua tausi, ina ia maua e i latou nei auaunaga o lo o maua i totonu o le falema’i.

“O le taua o le tautua lenei a le Matagaluega, e le gata e oo atu ai togafitiga mo nai tagata matutua, ae maua ai fo’i le avanoa e asia ai i matou ina ia mautinoa latou te maua tautua uma o lo o latou mana’omia”, o le saunoaga lea a Motusa.

O le tausaga na te’a nei na amata mai ai le auaunaga lenei a le Matagaluega o le asia lea o aiga i tua i nu’u, ina ia mafai ai ona maua e tama ma tina matutua o lo o aafia i gasegase o le tino le aunoa mo talavai eseese.

Na taua e le Fa’atonusili o le Ofisa o Tagata Matutua, le tofa Ale Tifimalae e fa’apea, o le to’atele o tama ma tina matutua o lo o agava’a i le latou polokalame, e faigata ona maua le avanoa e malaga atu i le ofisa mo a latou faagaioiga, ona o ni isi o i latou e aafia i gasegase o le tino e pei o le faigata lea ona savavali aemaise ai fo’i tulaga vaivai o le tino, ae o le taua la o le asiasiga a le Soifua Maloloina, o le a mafai ai ona maua e i latou nei le avanoa e maua ai togafitiga e faigata ona latou ausia.

Saunoa Motusa, o nei tautua uma o lo o faia fua e le Matagaluega mo tagata matutua ma i latou o lo o fa’ataotolia i gasegase o le tino i tua i aiga.