Ads by Google Ads by Google

Fa’aaoga Samoa ta’amilosaga TMO fili ai lana Manu Samoa

O lo o fa’aaoga e le Iuni Lakapi a Samoa (SRU) le ta’amilosaga fa’avaomalo a le TMO Marist American Samoa o lo o fa’agasolo i le taimi nei, e fili ai sui o le au ta’ito’a 7 a le Manu Samoa, fa’apea ai ma sui o le Manu Samoa ta’ito’a 15.

 

O le to’atele o sui o le Iuni Lakapi a Samoa e pei o i latou e filia tama ta’aalo mo ‘au ta’itasi (selectors), fa’apea ai le pulega a le Iuni o lo o i ai uma i le ta’amilosaga a le TMO o lo o fa’agasolo i le taimi nei.

 

Na taua e le faiaoga tuai a le au ta’ito’a 7 a le Manu Samoa, susuga Tauasa Fa’amaoni Lalomilo i le Samoa News e fa’apea, o le malaga mai o sui o le Iuni Lakapi a Samoa faapea ai faiaoga ma i latou e filiina au a le atunuu, o le fa’amoemoe ina ia mata’ituina le tulaga o le a i ai taumafaiga a tama ta’aalo, mo le filiina o se isi au a Samoa i vae e lua o lo o totoe a le IRB, i Sikotilani ma Enelagi i le masina o Me ma Iuni o lo o lumana’i nei.

 

Na taua e le afioga a Lilomaiava Taufusi Salesa e fa’apea, o ni isi o auala o lo o vaavaai i ai faiaoga mo le filiina o ni isi e fa’aopoopo i le au a le atunuu, o le tulaga i le malosi ma le fa’aaogaina o le polo.

 

Sa ia taua e faapea, ua 100% le faatinoina o le taaloga e tama taaalo, pau le itu o lo o tulimata’i i ai faiaoga ma i latou o lo o filiina ‘au o metotia e mafai ona fa’aaoga e le tama taalo i totonu o le malae e fesoasoani ai i le au ina ia malo.

 

“E i ai metotia o lo o aoaoina ai tama i le taimi o le taaloga, ae i ai lava fo’i metotia a le tagata lava ia e mafai ai ona fesoasoani i le faatinoina o le taaloga, ma lifi atu ai le au ina ia manumalo,” o le saunoaga lea a Lilomaiava, o se tasi ua iloga i le taaloga lakapi i aso ua mavae.

 

E pei ona silafia e le atunuu, e le i tulaga lelei taumafaiga a le au taitoa 7 a le Manu Samoa i le ta’amilosaga a le IRB i Iapani fa’apea ai ma Hong Kong, ina ua le manuia lana taumafaiga mo au e 8 pito i luga e saili ai le Ipu autu o le ta’amilosaga.

 

O le tele o taamilosaga ua mavae atu, e aofia lava Samoa i au e 8 pito i luga e saili ai le Ipu Autu.

 

Saunoa Lilomaiava, o le maea ai o le taamilosaga lenei a le TMO, ona toe taliu atu loa lea o sui o le Iuni i Apia mo le fa’atulagaina o isi fuafuaga mo le faamaeaina o vae e lua a le IRB o lo o totoe, ma toe fa’atulaga ai le ‘au a le atunuu.

 

Na taua e le Taitaifono o le Iuni Lakapi a Samoa, o ia fo’i lea o le Palemia, susuga Tuilaepa Lupesailele Malielegaoi i se faatalatalanoaga ma tusitala i Samoa i le vaiaso na te’a nei, ina ua fesiligia o ia i le tulaga na oo i ai taumafaiga a le tau taitoa 7 a Samoa, sa ia talosagaina ai le atunuu ina ia onosa’i ona o le toatele o le ‘au a fou uma, ae tonu lava e le o toe mamao se taimi ona vaaia lea o tulaga lelei o le ‘au a le atunu’u.