Ads by Google Ads by Google

Fa’aaoga le otaota e gaosi mai ai le eletise mo aiga

Ua mae’a nei ona sainia se konekarate i le va o le Pulega o le Eletise ma le Suavai a Amerika Samoa (ASPA) ma le kamupani a le ICRC Solution LLC i le setete o South Carolina i Amerika, mo le fa’aoagaina o le otaota po o lapisi e gaosi le eletise ma fesoasoani ai i le fa’asoaina o tupe o lo o alu e fa’atau mai ai le suau’u mai fafo e gaosi ai le eletise mo Amerika Samoa.

 

O lea tulaga na mafai ona fa’ailoa e le Pulesili o le ASPA i luma o le fonotaga a le kapeneta i le vaiaso nei, le afioga i le matua ia Utu Abe Malae, ina ua tuu atu i ai le avanoa e fa’asoa ai fuafuaga a le ASPA mo ni isi o ana atina’e i le lumana’i.

 

Na taua e Utu i lana folasaga e fa’apea, o le tele o le fa’alapisi o tagata o le atunu’u i so o se vaega o le taulaga ma le atunu’u atoa, o le isi lea fautuaga sa mafai ona tu’uina mai i tagata turisi o lo o tafafao maimoa mai i le atunu’u i le tele o taimi, o le fa’aotaota tele lea o tagata Samoa.

 

“O le fesili po o fea e la’u i ai le tele o le lapisi o lo o ao mai i vaega eseese o le atunu’u, o le tali, o lo o la’u i le nofoaga lafoa’i i Futiga, ae ua maitauina fo’i le tau leai o se avanoa o totoe i lea nofoaga”, o le isi lea saunoaga a Utu.

 

O le fa’aaoga o le otaota e gaosi mai ai le eletise mo Amerika Samoa, o le autu lea o se konekarate na taua e Utu ua mae’a ona sainia i le va o le ASPA ma le ICRC Solution lea e tusa ma le $20 miliona le tupe ua fa’amoemoe lea kamupani e inivesi mai i Amerika Samoa mo le fa’atinoina o lenei galuega tele.

 

 O le itu lelei o le galuega lenei e pei ona saunoa Utu, e le gata e sefe mai ai le tupe o lo o alu e fa’atau mai ai le suauu, ae o se avanoa lelei fo’i lea e fa’aitiitia ai le otaota i Amerika Samoa, ona ua leai fo’i se vaega o le nofoaga i Futiga e lafoa’i i ai ni isi lapisi se tele.

 

O le isi itu lelei o le mataupu lenei e pei ona faamanino e Utu i luma o le kapeneta, e le gata e leai ma se tupe mai le feterale o fa’aalu, ae ua maitauina fo’i le to’atele o isi matagaluega a le malo ua fa’aalia lo latou lagolagoina o le fuafuaga a le ASPA, ma ua sauni fo’i latou te galulue fa’atasi mo le fa’amautuina ma le fa’amalosia o lenei taumafaiga.

 

O le mataupu e pei ona faamanino e Utu, ua mae’a fo’i ona ia faamalamalamaina i luma o sui o le komiti o le ASPA/TEO a le Senate i se taimi e le i mamao atu, lea na ia faamalamalama ai le taua o lenei poloketi mo Amerika Samoa, i le fa’aaoga lea o le lapisi e gaosi mai ai le eletise mo le atunu’u, e le gata e fa’asao ai tupe o lo o fa’aalu e le ASPA e fa’atau mai ai le suauu, ae o isi fo’i vaega, ae leai fo’i se tupe mai le feterale o fa’aalu ai.

 

Saunoa fo’i Utu e fa’apea, ua leva tele taimi o latou galulue mai ma le kamupani mai fafo e fa’atatau i le mataupu lenei, peita’i o lea fa’atoa ia fa’alauiloaina i luma o le kapeneta ona o lea ua maea ona saini le konekarate, o le mafua’aga fo’i lena sa musu ai e vave faia sana tala i luga o le vaega fa’asalalau, la te le o iloa po o a ituaiga fa’amatalaga e mananao le kamupani e tu’uina atu i tua i le atunu’u.

 

Na taua e Utu e fa’apea, e tele isi auala sa vaavaai i ai mo le tau sailia o metotia e gaosi mai ai le eletise mo le teritori, ae o se auala lelei fo’i lea e fa’asao ai le soona faaalu o tupe e faatau mai ai suauu i fafo, o lea o lo o pagatia le atunuu i le taugata o le suauu.

 

Na faafetaia e le alii kovana ia Lolo Matalasi Moliga le fuafuaga na faataoto e Utu, atoa ai ma le tuuina atu i ai o ana faamanuiaga, ina ia vave ona tula’i mai lea atina’e ma manuia ai tagata uma Amerika Samoa.