Ads by Google Ads by Google

E mumusu lava ‘au tetele e faiaina i ‘au laiti

I le taga’i atu i le tulaga ua i ai le tatou ta’amilosaga o le Liki Kirikiti o le Sisiga Fu’a 2012, e foliga mai e matua’i mumusu ia ‘au matutua e faiaina i se ‘au laititi.  A fai atu i le ‘au matutua se’i tu’u tasi se malo i nai fanau talavou, ae fai mai, "E le valea fo'i gei fagau…alii kama."

Ua o'o lava i le Peresitene o le Maota Maualuga, le afioga i le Tama'ita'i ia Gaoteoate Palaie, ua fa'aalia fo'i lona agava'a ma le taleni ina ua toe va’aia ua toe ta'alo mai i lana 'au o le Manu'ula mai Vatia.

E fa’apea foi i le ali’i kapeteni o le ‘au mai Faleniu, le afioga Muasau ma le afioga Maui’a Sai, lea o lo o ta’ita’ia maia le ‘au matutua a Faleniu.

O le tofa Asiata Sale lea fo’i o lo o fa’atama i ai le ‘au kirikiti a le Sinapati, o se ‘au ua leva ona fai ma latou lenei fa’agatama, lea na lima tausaga soso’o o umia le ipu, va i le tausaga e tasi, ae toe soso’o isi tausaga e lua, o siamupini.

E fa'apena fo'i si tama o Fred o lo o ta'alo mai nei i le 'au a le latou afioaga, Pago Paga 'Aeto', o le tama tuai a le Mosi'ula, ia ma Lome Lavata'i, lea o lo o toe sau e aumai le 'au o le aumaga a Masefau, o le Mosi'ula, i vaitaimi ia sa avea ai ma siamupini.

Ae maualuga ai lava le tapua’iga a ni isi o auauna pa’ia a le Atua, i susuga i fa’afeagaiga, ia Manuele mai i Poloa, Filoiali’i mai Faleniu, Patele Aselemo fa’apea le susuga i le ali’i Epikopo ia Maui’a, lea o lo o va’aia pea lo latou  fiafia mai i lenei fa’agatama.

PISISAMI #2, 72 'ai -19 pe (0-2) ma le MANU'ULA  73 'ai - 8 pe (1-1)

Sa toe va’aia i le fa'ate'a a le Manu'ula, le ali’i o Pili, ua toe fo'i i lona lelei na i ai, i le lua tausaga talu ai, i le ta'aloga ma le Pisisami #2 lea na iva ana 'olo. Na fa'apea lava le 'au matamata ai ua fati, ae na matua’i sioa le mamalu, ina ua toe va’aia le toe vave manatua e le ali’i o lana te’a tuai.

Ma o i'ina fo'i na 'ai silia ai le Peresitene o le Maota Maualuga, Gaoteote Palaie, i ana ‘ai e 25.

E fai fai a mea a tamaiti ae a o'o ina toe fo'i mai tama matutua, e sa'o ai le tala a le isi toeaina, "E pisi pisi fo'i kamaiki ai fo'i e aumaiga e le fa'alifuiga lega saka, ae a fai mai lava e kama makukua e malie loka loko i le pe'epe'e."

O Dave o le Pisisami e 16 ana 'ai ma o ia lea na faia 'ai, a’o le to'atele lava na o e ta'u feau, toe o mai ai i lalo.

MANU'ULA (2-1) 100 'ai - 8 pe ma le PISISAMI (1-1) 76 'ai - 19 pe

O le mea lea ua va’aia nei, pei ua ita le Manu'ula i le latou faiaina i le Tama o le Mua'au i le vaiaso lea ua te'a, o le va'ai a le Manu'ula e mana'o lava e toe su'e siamupini lava ma Tama o le Mua'au.

E fai o le lelei o ta, a'o le taimi fo'i la na o ifo ai e talitua ‘a, sole o le mea ua leva ona taumafai ai, ae lea fa'atoa toe fo'i lea i ai.

Manaia le 'au a le Pisisami ae o le leai o ni fa'ate'a e fai i ai le fuafuaga o le kapeteni, lea e manaia te'a a o le pona e le taitai ona gafatia, lelei fo'i ta ona e pau lava e le o se tou aso lena aso na tou faiaina ai. E le'i taitai le ta'amilosaga, fa'amalosi.

MOSI'ULA (2-0) 100 'ai pe 8. vs AETO #2 (0-2) 56 'ai, 19 pe.

Ia e sa'o lava, e le tai tai ona manana'o nei 'au e fa'amalo nai 'au laiti, e iloa loa o le a fetaui ma ni ‘au laiti, ua so’ona fai fo’i a latou mea.  E le mafai lava ona tu’u se avanoa se’i malo ai nai ‘au laiti, se'i tali ai fo'i lo latou tautiga.

E tele mea o le ta o le Afioga i le Patele o Asalemo 32 ona 'ai i lena aso, ae fai fo'i le ta le mafaufau mai o le ali’i o JR Sitau lea na maua ‘ai silia o le ta’amilosaga, i ‘ai e 48.

E pe pe mai le to'alua nei ua toe itiiti atoa le 100, a'o le te'a fo'i a le tama o Elvis lea na maua 'olo e 10 i lena ta'aloga.

E faigata ona o aga lava o le ta'aloga, a maua loa le taimi e te ta ai, ia fai lava oe ia, se'i e pe, ma le fai atu lava e so so ese tamaiti laiti ia, ae se'i fai lava na'o tama matutua.

TAMA O LE LEGA #1, (3-0) 79 'ai - 12 pe, ma TAMA O LE MUA'AU #2, (1-1) 78 'ai 19 pe

Fa'apea lava e tutusa le faleaitu ma le malosi, ia ua alu atu lava ia, ua matutua fo'i tagata, e i ai le aitu lea o Pili, tasi lava lana te'a mao na te'a mai ma pe ai le isi tama o le Lega, (ha ! ha !), a'o le mea ia o le mea sili ua pe se tagata i lana te'a.

Fai se lelei tele o le 'au o le Lega #1, ua leva ua tau su'e mai e fa'ate'a a le Lega ni fa'ate'a e tau soloia ai le lelei fo'i a ta o Tama o le Mua'au #2, na ona maua lava i le te'a a Feo ma Tony pei o le toliga vi, ae na o'o lelei i le 51 'ai a le Tama o le Mua'au #2, i le 5 pe.

Na pei o le ta'avale fo'i lea puni (tulou) lona afi, i le alu ane i le sau 51 'ai i le 5 pe, i le vave ona maua mai e Tama o le Lega, fa'ate'a e tape ai le 'au ta a Faleniu.

Le mea na ona maua lava o le fa'ate'a o le Lega, pei o le a le taofiina o 'ai, na'o o le 27 'ai na maua e le to'a 14 ia na o atu i luga.  Na le'i tai tai le 'au ta o le Lega ae maua ia 'ai.

TA'ALOGA I LE VAIASO NEI:

Aso Gafua, Fepuari 13         Lupelele #1 ma le Pisisami #2

Aso Lua, Fepuari 14         Aeto #1 ma le Lega #2

Aso Lulu, Fepuari 15         Sinapati ma le Fetulele #2

Aso Tofi, Fepuari 16         Mosi’ula ma le Fetulele

Aso Faraile, Fepuari 17         Mea’ese ma le Pisisami

Aso To’ona’i, Fepuari 18         Pago Eagle #1 ma le Lega #1

    Manu’ula ma le Sinapati

    Pisisami ma le Lupelele #1

E momoli atu pea le fa'amalo i le GHC Reid & Co. “Oloa a Leala”, ma le pia o le Vailima i le lagolagoina o tala i ta'aloga kirikiti i vaiaso ta’itasi.