Talu mai le aso ananafi, ua oo atu nei le aitalafu a le malo i le ASPA mo le pili o le uila ma le suavai i le $7.2 miliona, ma e i ai le talitonuga o le Taitaifono o le Komiti Faafoe ia Asaua Fuimaono, ana totogi e le malo lana aitalafu tele lenei, atonu o le a maua se fesoasoani tele mo le atunuu i tulaga o pili.Na faamaonia e le Pulega a le ASPA i se iloiloga ma le Komiti o le ASPA/TEO a le Senate i le taeao ananafi, e na o pili lava o loo totogi i tupe lotoifale o loo aitalafu a le malo ia latou, ae o pili o loo totogi i tupe feterale, o loo tulaga lelei pea lona totogiina atu i le taimi nei.O se tasi lenei o mataupu na fesiligia e le taitaifono o le komiti o le ASPA/TEO a le Senate, le afioga i le alii Senatoa ia Velega Savali Jr, i le iloiloga lea na valaauina e lana komiti i le taeao ananafi, se’i fesiligia ai le pulega a le ASPA i nisi o mataupu o lo’o faalogoina ai le faasea o le atunuu, e pei o le siitaga i pili o le uila ma le suavai, tulaga o ponesi a tagata faigaluega, mataupu i le suauu, atoa ai ma le ripoti e uiga i le latou tupe faasili e silia ma le $8 miliona.Ina ua fesiligia e Velega tulaga o le aitalafu a le malo, na faamanino mai ai e Susana Faivae lea o loo vaaia tupe a le ASPA, o le aitalafu e $7.2 miliona a le malo ua toese mai ai le $200,000 lea na totogi atui le vaiaso na tea nei.Na toe fesili Velega i le ASPA, pe faamata e i ai se latou fesoasoani mo le atunuu i pili uila ma le suavai, pe ana faapea e totogi atu e le malo le latou aitalafu lea, na tali Asaua, e tele le fesoasoani e mafai ona tuuina atu e le ASPA i totonu o lana tautua, pe ana faapea e totogi e le malo le latou aitalafu lea.E ese mai i le aitalafu o le uila ma le vai, e silia i le $10 miliona le isi aitalafu a le malo i le ASPA, mai tupe ua maea ona faatulafono e tatu ona totogi atu e le malo i le ASPA (subsidy), e fesoasoani ai i faagaioiga a le ASPA i tausaga taitasi.Saunoa Velega, e foliga mai ua faalua ona faaee le avega i luga o tauau o le atunuu ina ua tulai mai aitalafu a le malo ma siitaga o pili, ma o se tasi lea o itu e lagona ai lona faanoanoa.“O lea e totogi e le atunuu a latou lafoga e fesoasoani ai i le faatupeina o le malo, a’o lea foi ua toe tuu atu i ai ma siitaga o le uila ma le suavai latou te totogiina, ua matua pagatia ma oi le atunuu i nei faiga, ae o ni faiga e le talafeagai,” o le saunoaga lea a Velega.Na taua foi e Velega le le talafeagai o le faaiuga a le Kovana Sili i le tuuina atu o tupe tului i tagata faigaluega a le malo, ae o lea e alu pea i luga aitalafu a le malo e le o totogiina.O le finagalo foi lea o le afioga i le alii Senatoa ia Mauga T. Ausega na te lagolagoina ai le finagalo o Velega, i le faaauau pea lea o le pagatia o le atunuu i nei faiga.“E moni lava o loo totogi uma e tatou pili a le ASPA, ae o tagata o loo pito sili ona pagatia, o le atunuu e vaivai ma maualalo le tamaoaiga, o i latou ia o loo pito sili ona ou alofa i ai i lenei mataupu, ma ua tatau foi i le malo ona tulai mai e faatino ona tiute, totogi ana aitalafu ua pagatia le atunuu”, o le saunoaga lea a le afioga Mauga.Saunoa Asaua, o loo lagona foi e le ASPA tulaga pagatia o loo saunoa i ai sui o le komiti, peitai o le faafitauli o loo tulai mai, e le o galulue faatasi latou ma le malo, ona e le o totogiina e le malo ana aitalafu.E le gata i le ASPA o loo aitalafu ai le malo, ae faapena foi i le falemai ma le kolisi tuufaatasi e pei ona saunoa Velega, ma o se tasi lea o tulaga pagatia o loo feagai ma le atunuu i le taimi nei, o le tele o aitalafu ae le o lelei ona faasoasoa e le malo ana tupe i auala talafeagai.Ua i ai le maliliega o le a faaauau pea ona galulue le ASPA ma le Fono i ni auala e maua ai se fesoasoani mo le atunuu o loo pagatia, ona o le tulaga i le maualuluga lea o totogi o ana tautua ua i ai i le taimi nei.O sui o le komiti sa i ai i lenei iloiloga e aofia ai le afioga i le alii Senatoa ia Mauga T. Asuega, Seui Laau Sr, Lemanu Peleti Mauga ma Fonoti Aufata.