E ‘ese mai le tele o latou tapenaga mo ta’aloga basketball fa’avaomalo a le  ‘au fili o le Under 19 mo Fiti, ua a’oina fo’i a latou fa’afiafiaga fa’a-Samoa i pesega ma siva.  O le aso Tofi nei, le Aso Faafetai e malaga ai le au taalo mo Fiti, ae toe taliu mai i le aso 7 o Tesema.

“O le mea masani lava, ina ia lava tapena fo’i i matou mo le feiloa’iga fa’apea ma le fa’amavaega mai lea so’otaga matagofie ma isi atunu’u uma o le Oceania o le a matou fa’atasi, ta’a’alo ma fa’amasani a’o i ai i Fiti,” o se tala lea a le ali’i ta’ita’i malaga mo lea ‘au ta’a’alo, Milton Taufa’asau o le Peresetene o le American Samoa Basketball Association.

O se tasi o vaega patino mo lenei aumalaga ua fa’amanino mai, e faia le po fiafia e fa’aalia ai tu ma aga a le atunu’u e masi’i atu ai i latou. O le ala fo’i lea o le faia o nei a’oga siva ma pese.

O nei a’oa’oga uma e fa’atautaia i le lotoa a Tafuna High School i afiafi ta’itasi, ma sa molimauina le ma’ulu’ulu ma le sasa o siva ia na pu’eina ata a’o a’oina. I le fa’atasiga lea, o le sailiga siamupini o le Oceania i le Pasiketipolo, ma e 10 atunu’u e tauva ai: Fiti, Ausetalia, Niu Sila, Papua Niu Kini, Solomona, Samoa, Niu Kaletonia, Guam, Tahiti ma  Amerika Samoa.

O ta’aloga uma ua lautogia mo lenei vaega o le Oceania ua fa’atautaia lea i le Vodafone Arena i Suva, Fiti, ma o le ta’amilosaga lenei e mafai ai ona ausia le agava’a e tauva ai i le Olimipeka e ‘au siamupini.

O le nofoaga o le a nonofo ai a tatou ‘au nei fa’atasi ma ‘au ta’a’alo mai isi atunu’u, o le Iunivesite o le Pasefika i Saute i Laucala Bay. O le tatou ‘au ta’a’alo, na fili fa’apitoa ai lava tama fanau a le tatou atunu’u, e tusa ai o aiaiga fa’atulaga mai e le FIBA mo ‘au a malo e tauva i le Oceania.

I le ‘au a tama o lo’o avea ai le susuga Diehl Langkilde ma latou faiaoga, ae o le ‘au a tama’ita’i o lo’o avea ai Forest Duldulao ma faia’oga. Taitai o le aumalaga o Milton Taufa’asau ma sui tofia mo ta’aloga o Paulo Pua’auli [Failautusi /Teutupe] o le ASBA ma Jacklyn Forsgren.

I se fa’amatalaga a Taufa’asau, sa ia fa’ailoa ai, “Ua sauni fo’i a tatou fanau e o atu mo lea fa’amoemoe, ua mae’a a’otauina i latou. Ou te iloa, ua lava tapena o latou mafaufau, o latou tino ua malolosi, ae o le mea sili lava ua latou iloa fo’i le ituaiga ta’alo e tauva ai mo le fa’amoemoe e maua le siamupini.”