Ua lua nei vaiaso ua mae’a o le ta’amilosaga soka a le Oceania lea e fa’atautaia, o lo’o talimalo fa’atasi ai Amerika Samoama Samoa.

O Niu Sila lea e tula’i mai le uiga ese o lana au soka U17 ua fa’aofi mai ma ua auai i le vae o le ta’amilosaga o lo’o tauva ai Samoa Tuto’atasi. A’o i tatou iinei, o Tahiti ma Vanuatu lea e a’asa nei i le tatou vaega o le ta’amilosaga soka U17 a le OFC.

I le aso To’ona’i ua te’a nei sa fetaui ai Vanuatu ma Solomona, o le tasi lea ‘au malosi o lo’o i Amerika Samoa ma na iloga le fita o le ta’aloga. I le faaiuga o lea taaloga Vanuatu, 2-1 a Solomona.

O le ‘ai e tasi o Solomona sa fa’asikoa e le tama ta’uta’ua a le latou ‘au o Larry Zama, ma na maua lea sikoa i le lona 43 o minute talu ona faia le ta’aloga, ona tutusa ai lea o ‘ai, peita’i, o le sikoa na toe fafao a le tama o Ronaldo Wilkins ona o le kiki o le sala, sa toe maua ai le isi ‘ai o Vanuatu i le lona 62 minute talu ona faia le latou ta’aloga.

O le ta’aloga lona lua o le aso To’ona’i lava sa fetaui ai Tonga ma Tahiti, ma na amata mai lava le fa’asologa o sikoa a Tahiti i le amataga o le fetauiga se’ia o’o i le toe minute, lea na latou maua ai ‘ai e 13 sikoa i le 0 a Tonga.

O le ali’i umi o Michel Maihi na ia faia sikoa e lima a Tahiti i minute nei talu ona amatalia le latou ta’aloga: 38,41,48, 54 ma le 57. O se va’aiga atu i ai, e faigofie tele ona toe fo’i mai Michel ma toe fa’asoa atu le isi ana sikoa ma sa le mafaia fo’i ona puipuia e Tonga le latou laina sikoa mai lea ali’i fa’atini a Tahiti.

I le vae o le ta’amilosaga soka a le U17 OFC i Samoa, ua fa’ailoa mai ai, o lo’o tau amo mai fo’i le ato lava e tasi lea  tatou te taumafaia i lenei itu. O Samoa e tasi lava lo latou malo o i ai, mai le latou fetauiga ma Cook Islands, lea e tulaga ono mai le fa’asologa o manumalo ma faia’ina.

Peita’i i ta’aloga lava o le aso To’ona’i na te’a nei, na matua soloia fo’i e Papua Niu Kini se fa’amoemoe o Samoa e malo ai, ina ua latou maua sikoa e 5-0 a Samoa. I le ta’aloga lona lua na malo ai Fiti ia Cook Islands i ‘ai lava e tasi, 5-0.

E le’i faigofie ia Niu Sila le latou ta’aloga fita ma le Niu Kaletonia. I se va’aiga i ai na matua fuli Niu Sila e tatala a latou pusa o metotia eseese e finau ai ma se latou ‘ai fa’asili e malo ai ia Niu Kaletonia.

Na ulu lelei fo’i le kiki o le sala na kiki e le ali’i mata’utia i le soka a Niu Kaletonia o Joris Kenon, peita’i, na taofiofi mai lava e Niu Sila le latou manumalo, aua ua fai fo’i si leva o fetaui mai i ta’amilosaga soka malo nei e lua.

I le aso Gafua, sa fetaui ai Tahiti ma Solomona mo le taimi muamua talu mai lenei ta’amilosaga. Ua le maua e Solomona se to’a aua, o lea fo’i, ua faia’ina mai ia Vanuatu, ae soso’o ma le taia atu ia Tahiti, e tali tutusa lelei lava le maoa’e o latou ta’a’alo i le soka.

Peita’i, e tolu sikoa a Tahiti i le leai a Solomona i le latou ta’aloga lea. O le ta’aloga o le afiafi sa fetaui ai loa le ‘au a Tonga ma Amerika Samoa ma sa manumalo ai Tonga i le tatou ‘au i ‘ai e 2-0.

Ua le o toe tele ni ta’aloga o totoe mo le tatou vae iinei, fa’apea fo’i ma le isi i Samoa.

O ta’aloga o totoe o le a fetaui ai ‘au nei e sili ona malolosi o tatou talimalo ai, Tahiti ma Vanuatu i le ta’aloga mulimuli i le itula e 3:30 i le afiafi. E muamua mai fo’i le ta’aloga a Solomona ma Amerika Samoa i le itula e 1:00 i le aoauli.

O nei ta’aloga uma e faia i le malae soka i Gagamoe, peita’i, e ono faia suiga i lenei vaega po’o le vaega  o ta’aloga lea e sailia ai le siamupini, e tu’ufa’atasia mai iinei. O le tau masalo i ai oni fa’aletonu e ono tula’i mai, ona o suiga i le tau.