Ads by Google Ads by Google

“E le o matou o ni fa’afafine, o matou o fa’a fafine ....”

TETE’E FA’AFAFINE MATAUPU I LE ‘SAME SEX MARRIAGE’

 

Na togi i fafo e Shevon Matai, o se sui mai se tasi o Faalapotopotoga o Fa’a-Fafine i Amerika Samoa, le SOFIA,  le mataupu e faatatau i le toe faaipoipo lea o tagata tutusa e to’alua, po’o le “same sex marriage” ina ua fesiligia e le Samoa News i le vaiaso nei.

 

Na taua e Shevon e faapea, “O le ‘same sex marriage’ e le taliaina i Amerika Samoa, e le oo mai fo’i i Amerika Samoa.”

 

E ui e le i tuuina mai se finagalo o ta’ita’i o le atunuu faapea ai Faalapotopotoga a Ekalesia i totonu o le atunuu e faatatau i lenei mataupu, ae na taua e ni isi i le Samoa News e faapea, ua i ai ulugalii ‘tama’ita’i’ ua vaaia o lo o nonofo faapouliuli solo i vaega eseese o le atunuu.

 

Na taua e Shevon e faapea, o le mataupu i le toe faaipoipo lea o tagata e ituaiga tutusa, o se mataupu e le taitai ona latalata mai i laufanua o Samoa, ona o le malosi o tapuaiga faalelotu aemaise ai o lana tu ma agaifanua o lo o aoaoina ai ona tagata.

 

“Afai e manatu tagata o matou nei o faa-fafine e ono ofi mai ai le same sex marriage i Amerika Samoa, ou te faapea atu, e le sa’o lena manatu, leaga o faa-fafine Amerika Samoa o lo o ave le tele o matou taimi i le atina’eina lea o aiga, mafutaga, ekalesia ma faalapotopotoga, ae leai so matou taimi e naunau ai i tu’inanauga ma ituaiga olaga faapena,” o le saunoaga lea a Shevon.

 

Na faamatala auiliili e Shevon e faapea, o le faamatala sa’oina o ituaiga tagata o lo o i ai i latou, e le o ni ‘faafafine’, ae o i latou o faa-fafine (way of a woman), ua tuu atu uma ia te i latou le fatu aiga tausi o lo o faia e fafine Samoa i totonu o latou aiga.

 

“A e vaai i faa-fafine uma a Amerika Samoa, o le 99% o i matou e tu lelei, maua galuega toe lelei atina’e o lo o matou faia, o le mau faamaonia lena o a matou tiute tauave i totonu o matou aiga, aua matou te talitonu o i matou o tama’ita’i i totonu o aiga, e le gata matou te teu i teuga a tama’ita’i, matou te ola o i matou o tama’ita’i, matou te gagana ai ae matou te amio ai fo’i,” o le isi lea saunoaga a Shevon.

 

I lana fautuaga i tupulaga ma le atunuu, o le aumaia o tu ma amioga mai fafo i totonu o Amerika Samoa, o se auala o le a liliu ai tu ma agaifanua a Samoa.

 

“Ou te faapea atu, ou te le lagolagoina le toe faaipoipo o le alii ma le isi alii, poo se tamaitai foi ma le isi tamaitai, o le finagalo o le Atua, ia faaipoipo le tane ma le fafine,” o le saunoaga lea a Shevon, o se tasi o faiaoga i le Kolisi Tuufaatasi.

 

I se ripoti mai Samoa, ua faalauiloa ai foi e le Asosi o Faafafine lo latou teena malosi o le oo atu o nei ituaiga amioga i laufanua o Samoa, o le lagona foi lea o le alii Palemia, susuga Tuilaepa Lupesoliai Sailele Malielegaoi ina ua fesiligia e tusitala e uiga i lenei mataupu.

 

Fai mai Tuilaepa, o le umi e avea ai o ia ma Palemia o Samoa, o le umi foi lena na te le taliaina ai nei ituaiga mea faavalevalea.

 

E 14 atunuu eseese o le lalolagi ua faataga ai le toe faaipoipo o ituaiga tagata e tasi, ma o ni isi o ia atunuu e aofia ai Farani lea na faatoa latou pasia le tulafono lea i le vaiaso nei, o Kanata, Denmar, Sweden, Uruguay ma Amerika i ona setete e 9 lea ua pasia ai lenei tulafono.