O le taumafai ina ia taofia faiga tau fa’asese ma faiga fa’alilolilo o lo o faia i fa’amaumauga tau pisinisi, o le autu lea o se tulafono taufa’aofi na fa’aulu i luma o le maota o sui i le vaiaso nei, e avea ai ma solitulafono le faia e se tasi o lenei ituaiga gaioiga.

Talu ai taumafaiga fai fai pea a le malo e fa’aitiitia ai faiga tau fa’asese atoa ai ma uiga le taupulea o lo o faia i pisinisi, ua manatu ai ia faia se suiga i le tulafono, e le gata ia aofia ai le faia o amioga le taupulea fa’asaga i le malo, a ia a’afia ai fo’i tagata le alolofa o lo o faia nei amioga fa’asolitulafono, o se vaega lea o fa’amatalaga i totonu o le pili mo lea tulafono tau faaofi.

Ua le gata i lea, ua silafia lelei e le Fono Faitulafono le fa’atupulaia pea o faiga tau fa’asese o lo o faia i pisinisi tua, ma ua avea ai fo’i o se tulaga e atugalu i ai le finagalo o le Fono.

O se tasi o itu o lo o taua i le tulafono tau fa’aofi lenei o lo o pito sili ona matuia ai amioga le lelei nei, ona o lo o a’afia ai ma tagata fa’atau o lo o aga’i atu ma fa’atau mai oloa i pisinisi tua nei, ma e ono oo atu ai lava i le tulaga o le totogi lea e tagata fa’atau o le afaina o lo o maitauina i totonu o pisinisi.

E talitonu le Fono, ua alaga tatau ona faia e le malo se aiaiga e fa’amuta ai le fa’aauau pea o nei faiga le alofa, a o le i o o atu i se tulaga e pito sili ai ona matuia ma a’afia atu ai le atunu’u atoa.

O le Maga 46.4131 o le Tulafono Toe Teuteu a Amerika Samoa lea ua suia nei e fa’apea, so o se tasi na faia ni fesuiaiga i fa’amaumauga lautele i tulaga tau pisinisi, e ala i lona faia o nei suiga ma lona iloa lelei, aemaise ai lona aveese mai, toesea, fa’aleaga, taumafai e nana po o le faia fo’i o ni tusitusiga le sa’o e fa’asese ai ulua’i fa’amaumauga sa faia, o le a molia o ia i le solitulafono mamafa o le Tulaga O (D).

So o se tasi na te faia ni tusitusiga sese ina ia suia ai fa’amaumauga ua mae’a ona fa’amauina mo pisinisi tua, o le a nofosala o ia i le solitulafono lenei.

O pisinisi tua o lo o aofia i lalo o le suiga lenei o le tulafono, e aofia ai pisinisi o lo o faia fefaatauaiga tau pisinisi, pisinisi e faia galuega faapolofesa, pisinisi o lo o ofoina atu galuega ma tautua i le atunu’u, ma so o se ituaiga pisinisi tua o lo o pulea e se tagata se to’atasi po o ni tagata se to’atele.

O lenei tulafono na fa’aulufaleina e le afioga i le ali’i faipule ia Larry Sanitoa, o ia fo’i lea o le ta’ita’ifono o le Komiti o le Tamaoaiga a le maota o sui, ma le afioga i le ali’i faipule ia Vailoata Eteuati Amituana’i.

O le tele o pisinisi latou te tu’uina atu fa’amaumauga sese i le malo e tusa ai o tulaga o tupe maua aemaise ai o fa’amaumauga o lo o mana’omia mai e le malo, o se tasi lea o mafua’aga ua fa’aulu ai lenei tulafono, ina ia taofia ai faiga tau fa’asese ua masalomia i pisinisi tua.