E 22 tausaga o se ali’i ua tu’uaia nei e le malo i le moliaga o le fa’ao’olima i le tulaga tolu, atoa ai ma le fa’atupu vevesi i nofoaga faitele, e mafua mai i le fa’alavelave lea o lo o tu’uaia ai o ia i lona fa’ao’olima lea i lana uo tama’ita’i, i le mae’a ai o se la tafaoga i le fa’aiuga o le vaiaso na te’a nei.

Ina ua fesiligia e leoleo le ali’i ua molia i le mafua’aga o manu’a tuga sa maitauina i foliga o lana uo teine, e le gata sa ia tete’e na te le i fa’ao’olima i ai, ae sa ia fa’ailoa fo’i i leoleo, o manu’a i foliga o lana uo teine na mafua mai ina ua fufusu ma isi tama’ita’i i le fale kalapu a le Bowling Alley.

E tusa ai o fa’amaumauga a le fa’amasinoga, sa fa’ao’olima fo’i le tama’ita’i i le ali’i ua molia e ala i lona fa’aaoga o lona seevae mulimuli e sasa ai le pito i tua o lona ulu, ina ia taofi ai le fasiga o ia.

O le mataupu lenei na tofu atu i le Ofisa o Leoleo i Tafuna, pe tusa o le itula e 2:45 i le vaveao o le aso To’ona’i, ina ua logo e se leoleopo o le fale talimalo a le Tradewinds le ofisa o leoleo mo se fesoasoani, ina ua masalomia se ali’i o lo o ia fasia se tama’ita’i i totonu o se ta’avale o lo o paka i le vaega e paka ai ta’avale a le faletalimalo.

Ina ua taunu’u leoleo i le vaega sa ripotia atu ai le fa’alavelave, e le gata sa vaaia ai e leoleo le ua molia ma lana uo teine o lo o saofafa’i mai i le itu o le vaega e paka ai ta’avale, ae sa molimauina fo’i e leoleo ni manu’a fou lava i foliga o le tama’ita’i na a’afia, e aofia ai le fufula uma o ona mata e lua, ae o le isi mata ua toeititi lava a le mafai ona pupula i le fula o lo o i ai, o ona laugutu fo’i o lo o unaoa, atoa ai ma ni maosia i lona ua.

E faapena fo’i i le ali’i ua molia, sa vaaia fo’i e leoleo ni manu’a i lona tino, e pei o ni maosia i ona foliga atoa ai ma se ta’e i le pito i tua o lona ulu.

Na taua e le ali’i leoleopo na fa’afeso’ota’iina leoleo ina ua fesiligia o ia e leoleo e fa’apea, na faafuase’i ona afe atu se ta’avale a se ali’i ma valaau atu ia te i latou ma isi leoleopo, o lo o i ai se ali’i o lo o ia fasia lana uo teine i totonu o le ta’avale, na mafua lea ina ua ia fa’alogo i le ee mai o le tama’ita’i, ma ia manatu ai loa e vili leoleo mo se fesoasoani.

E le i manana’o le ali’i ua molia ma lana uo teine e fa’aauau togafitiga mo i laua i le falema’i, ina ua mae’a ona siaki e sui o le EMS i laua i le taimi na auina atu ai i laua e leoleo i le ofisa i Tafuna mo le fa’atalatalanoaina o lenei mataupu.

Na fa’amaonia e le tama’ita’i na a’afia i leoleo, sa la inu uma ma lana uo i le taimi na la tafafao ai i le Sadies by the Sea i se fiafia sa faia ai, lea fo’i sa inu ai ana ipu uaina, fagu Champagne ma ni nai fagu pia, ae o lana uo sa inu ana fagupia ua galo ia te ia pe fia le aofa’i.

Na mae’a le tafaoga a le ua molia ma lana uo tama’ita’i i le Sadies by the Sea, ona fa’ai’u ai loa i le Bowling Alley, ma o iina na amata mai ai le la vevesi ina ua fiu le tama’ita’i e valaau lana uo e sau ia la te o, ae o lo o talanoa pea lava o ia i ana uo e fa’ata ga le lagona lana valaau, ae ina ua toe valaau fa’atele atu i ai, sa ia lafo atu se tala e le i manaia i lana fa’alogo, o lea na ia savali ai loa i le la ta’avale o lo o paka i fafo o le vaega e paka ai ta’avale a le fale kalapu.

Na taua e le tama’ita’i na a’afia i leoleo lona lagona o le valaau a se tama’ita’i fa’apea, “se onosa’i”, ae fetaui loa lona faliu atu i tua ae tau loa ma le tu’i a lana uo i ona foliga, ma ia fa’alogoina ai lona niniva, toeititi lava a mata pogia.

Na toe fa’aauau le fasi e le ua molia o lana uo teine ina ua la taunu’u i le vaega e paka ai ta’avale a le fale’aiga a le McDonalds i Tafuna, ma ta tu’i ai e le ua molia foliga o lana uo, a o taumafai le tama’ita’i e fa’aaoga ona lima e tali ai gaioiga a le ua molia, e pei ona taua i fa’amaumauga a le fa’amasinoga.

Ae ina ua taunu’u fo’i i le vaega e paka ai ta’avale a le Tradewinds, sa toe fa’aauau ai fo’i ona fa’ao’olima le ua molia i lana uo tama’ita’i, ma fa’aaoga ai loa e le tama’ita’i lona seevae mulimuli uumi e ta ai le pito i tua o le ulu o le ua molia, ina ia taofi ai lana gaioiga o lo o faia.

Ua toe tatala i tua le ua molia e aunoa ma se tupe sa totogi i le fa’amasinoga, e fa’atali ai le aso 17 Mati lea ua fa’atulaga e toe tula’i ai i luma o le fa’amasinoga fa’aitumalo.