FALEPUIPUI LE ALI’I NA FA’AO’OLIMA I LONA TO’ALUA

E fa fa’aiuga o vaiaso lea ua poloaina e le fa’amasinoga fa’aitumalo, e taofia ai se ali’i e faigaluega i le malo, ina ua ta’usala o ia i le moliaga mama o le fa’aoolima i le tulaga tolu, e mafua mai i le fa’alavelave lea na ia fa’ao’olima ai i lona to’alua.

O le itula e 6:00 o le aso Faraile e tatau ona taunuu ai i le toese mo le tuliina o lona taimi, ae toe tatala mai o ia i tua i le itula e 6:00 i le afiafi o le aso Sa.

O isi tuutuuga o le nofovaavaaia a le ua molia e aofia ai lona totogiina o le salatupe e $200, ae faamalumalu le $800 fuafua lava i lona usitai i poloaiga a le fa’amasinoga.

Ua faasa ona ia toe tagofia le ava malosi i totonu o le umi lea ua nofovaavaaia ai, ua faasa foi ona ia toe taumafai e faafefe pe faamata’u lona aiga, a ia auai i ni aoaoga e fesoasoani ai i aafiaga o le ava malosi atoa ai ma le tulaga o le ita.

FERNENDEZ EUINI MA PESEFA TUIGAMALA

O le taeao ananafi na amata aloaia ai taualumaga o le fa’amasinoga autu a Fernendez Euini ma Pesefa Tuigamala i luma o le fa’amasinoga maualuga, e ala i le tau sailia lea o ni alii ma ni tamaitai faamasino latou te iloiloina se faaiuga o lana faamasinoga.

O Euini ma Tuigamala o lo o tuuaia e le malo i ni moliaga mamafa lea e aofia ai ma le moliaga o le fa’aoolima, ona o le fa’alavelave lea na la fa’aoolima ai i se ali’i e 17 tausaga le matua.

O lo o teena malosi e i laua ua molia tuuaiga a le malo, o le mafuaaga lena o le la faamasinoga autu lea na amata.

O lo o tuuaia e le malo ia Euini ma Tuigamala e faapea, i se taimi o le aso 3 Ianuari 2014 na la faaoolima ai i se alii e 17 tausaga le matua ma manu’a tigaina ai lea ali’i, ina ua alu Euini i totonu o le fale a le ali’i na a’afia, talepe le faitoto’a o le fale ae ulufale ma fasi le na a’afia, e ala i lona fa’aaoga o se ma’a ae tu’i ai lona ulu.

O lo o tuuaia foi e le malo ia Tuigamala i lona togiina lea o le alii na aafia i se ma’a ma manu’a ai lona ulu. Na matapogia le alii na aafia, mulimuli ane ina ua toe maua lona malosi sa ave ai loa o ia i le falema’i mo togafitiga, lea na manaomia ai ni filo se tolu e tau pupuni ai se manu’a sa i lona ulu.

Na taua e le alii na aafia i leoleo e faapea, o ia na alu e vaai lona tina i le falesa, ae latou fetaui ai ma Euini ma Tuigamala ma la fa’aoolima ai loa ia te ia.