Ads by Google Ads by Google

Pili fa’aopoopo ai siaki e maua a le tagata ua malolo litaea

Ua i luma nei o le maota o sui se pili mo se tulafono taufa’aofi e fa’aulutalaina e fa’apea, “o se tulafono e fa’atu ai le aofa’i aupito maualalo o siaki fa’alemasina mo tagata litaea”.

 

I le tino o le tulafono e pei ona taoto atu nei i le Komiti o le Litaea a le maota o sui mo lona iloiloina, o lo o taua ai le suiga ia le itiiti ifo i le $100 le siaki a le tagata litaea e maua i le masina e tasi.

 

O le isi suiga o lo o talosagaina i totonu o le tulafono, o le fa’aopoopo lea o le penefiti e maua e le aiga o le tagata litaea pe a maliu, mai le $1,500 o lo o i ai i le aofaiga fou e $3,000.

 

E ui e le i fa’atulagaina se aso e faia ai se iloiloga a le komiti mo lenei mataupu, peita’i na fa’amanino e le loia a le Litaea a le malo ia Faoa A. Sunia i le aso Tofi na te’a nei le mataupu lea, ina ua fesiligia o ia e le afioga i le ali’i faipule ia Vesi Talalelei Fautanu Jr i le taimi o le iloiloga a le maota ma sui o le Litaea.

 

Saunoa Vesi e fa’apea, o se tulafono, e mafai ai ona si’i i le $100 siaki a nai tagata litaea, nai lo le ta’i $65 ma ona tupu o lo o maua i le masina e tasi, ae ua fai lava fo’i si maualuga o le tau o le soifuaga ua i ai.

 

Saunoa Faoa e fa’apea, e ui o lo o i ai lava le fomula a le malo o lo o fuafua i ai siaki a tagata litaea e maua, e afua mai lea i le maualuga o le totogi sa ia maua i le taimi ao faigaluega, ae mafai lava ona fai suiga pe afai o le finagalo lea o le Fono Faitulafono.

 

Na fa’aaoga e Faoa tagata faigaluega a le Fono Faitulafono e fai ma fa’ata’ita’iga o lana saunoaga ma ia taua ai e fa’apea, e ese le totogi e maua e le sui fofoga fetalai, ese fo’i le totogi e maua e le tama pu’eata a le Fono, afai fo’i la e litaea uma i laua, e eseese uma fo’i le aofa’i o a la siaki e maua, o le mafua’aga fo’i lena e mafua ai ona laiti totogi a ni isi o tama ma tina o le atunu’u ua litaea o lo o maua.

 

“O le tiute a matou o lo o galulue i le Ofisa o le Litaea, o le galulue ma va’ava’ai i auala e fa’aleleia ai le teugatupe, matou te naunau fo’i e fai auala uma ina ia tupu ai pea ma ola le teugatupe,” o le saunoaga lea Faoa.

 

Sa ia faamanino fo’i i afioga i Faipule e fa’apea, e lua auala o lo o fa’atupe ai teugatupe a le litaea, o tupe tului o lo o maua mai i tupe o lo o inivesi i fafo, ma tupe o lo o maua mai i saofaga a tagata faigaluega ma le malo.

 

“Afai la ae fa’aletonu le maketi o lo o inivesi ai tupe a le litaea i fafo, ona alu fo’i lea i lalo tupe maua a le litaea, ae afai la e fa’aletonu maketi i fafo toe nofonofo fo’i tagata faigaluega ma le malo e le siia i luga a latou saofaga e tipi mai i totonu o le litaea, e le mafai lava ona tupu le teugatupe, e faigata fo’i ona fa’atino manaoga a tagata litaea,” o le isi lea saunoaga a Faoa.

 

I le mataupu o penefiti e maua e tagata litaea e maliliu ma tagata faigaluega o lo o tipi a latou litaea, na saunoa Faoa e fa’apea, o le isi fesili tele lea o lo o tula’i mai i le Komiti i le taimi nei, pe aisea e eseese ai penefiti ia e maua ae tutusa lava le aofa’i o tupe e moomia mo taimi o lau’ava a i latou nei, ae o se isi lea fautuaga e tatau ona silasila toto’a i ai le fono mo ni suiga pe afai e finagalo i ai.