Vaega: 2

Fa’atalofa atu i lou alafa’i mai i fanuga lelei o lenei aso fou i le alofa ma le agalelei o lo tatou Matai oi le lagi, e ao ai ona o tatou fa’apea ifo, “Le Ali’i, ia o matou manatua pea ou puapuaga ma ou mafatiaga, ina ia mafai ai ona o matou lagona lou alofa e le mavae mo i matou, a’o le vi’iga ma le fa’amanu matou te fa’afo’i atu i Lau Afio, Amene.”

E tasi le itula e va ai le lavea o le tama’ita’i o Keisi Masela i le ta’avale lea na so’aina o ia i le saoasaoa e limasefulu maila i le itula, lea na so’a ma lelea ai i luga pe a i le sefulu futu le maualuga i le ea, ma na fa’aleaga uma ai ponaivi o lona tino, ma tau ai lona ulu i le sima, ma koma ai loa.

O le aso lea sa nofonofo ai Keisi Masela ma ana uo mamae e to’alua i totonu o se fale’aiga matagofie i le itu i Sasae o Philadelphia. Fai mai, o se fale’aiga ua sili ona matagofie, ma ua na o tagata milionea e mafai ona a’ai ai, e fa’aaoga mo taimi o fonotaga a tagata maualuluga, e i ai loia, o le aufaigaluega a le Kovana ma le anoano o isi tagata faipisinisi.

Ina ua ma’ea le taumafataga a Keisi ma ana uo e to’alua, na o latou nofonofo ai loa ma matamata i le matagofie ma le ola lauusiusi o la’au o lo’o si’omia ai le fale’aiga atoa. Ua fa’asolosolo lava mafaufuaga o le tagata latou, a’o Keisi Masela, fai mai ua fa’asolosolo ona mafaufauga pe o le a le umi o le a o latou va’ai ai le lauusiusi o la’au, aua o le masina lea, o le masina o Mati.

Ua toe mafaufau fo’i Keisi, pe o le a maua se taimi e mafai ai ona alu e fa’aauau ana tamo’ega lea e masani lava ona fa’atino e le tama’ita’i i aso uma o lona olaga.  O le isi itu na manatu i ai le tama’ita’i, pe o le a fai sana tala i lana uo o Lenina lea o lo’o latou nofonofo fa’atasi, e uiga i le ‘otiina o lona ulu. Fai mai, na iloa lelei lava e Keisi, lona le fiafia i le ‘otiina o le lauulu o lana uo o Lenina, ae ua fa’ataga fai ane i ai, o lo’o fiafia ma matagofie le sitaili lea ua ‘oti ai le ulu o lana uo.

Na liliu nei Keisi ma tilotilo i le isi itu o le fale’aiga ma iloa atu se ‘ata matagofie o lo’o tautau mai i luga tonu lava o le nofoaga o lo’o lotolotoi ai tagata e to’atele. Ae ina ua fa’asolosolo ifo i lalo le matamataga a Keise na fa’ate’ia ai ina ua ona iloa atu, o lo’o nofo nofo mai ai se ali’i lalelei ma o lo’o pupula to’a mai lava i a te ia. Pei o le a noa le vave ona liliu o le ulu o Keisi, ma fai ane i ana uo ia latou te a’ai. “E ese le matagofie o lenei fale, e sa’o a’u.” Na lulu ane i ai le ulu o le isi ana uo e igoa i a Keli ma ‘ata’ata, “Ioe Keisi, o le matua’i matagofie lava ma manaia lenei fale, aua o oe na e teuteuina, e sa’o a’u.”

E faia pea….