MALIU TEINEITITI 9 TAUSAGA LAVEA I LE TAAVALE

E iva tausaga o se teineititi mai le afioaga o Saleilua, Falealili ua maliu ina ua lavea i se taavale ao agai atu o ia e fai sana faatau i se faleoloa i lo latou afioaga. O lenei faalavelave na tulai mai i le aso Sa na sei mavae atu nei. Na lipotia mai e faapea, o lea teineititi o Liutino Tanya Osa Uelese Ainuu, o lo o aoga i le aoga tulaga lua a lo latou afioaga, ma e lei leva ona savali atu o ia mai lo latou fale ae lavea loa i le taavale. Na faaalia, o lea teineititi o lo o i Samoa ma lona tina ao malaga atu lona tama i Niu Sila e faamautu a latou pepa nofomau i lea atunuu. O lo o taofia nei e leoleo le ave taavale o le taavale na lavea ai lenei alualutoto e talia ai lona faamasinoga. E le o mautinoa i le taimi nei pe na faasua’ava lea alii ae pe na saoasaoa foi le taavale i le taimi na tupu ai le faalavelave.

TAPUNIA FALEMAI TUAI I MOTOOTUA

Na tapunia aloaia i le poo le aso Sa na sei mavae atu nei le vaega mo gasegase tausavali (outpatient) i le maota gasegase tuai o le Tupua Tamasese Meaole i Motootua, ae tapena le aufaigaluega i le nofoaga fou i le fogafale pito i lalo o le falemai fogafale tolu fou i Motootua lava. O le vaega mo gasegase tausavali ma le vaega mo gasegase tuga ma faalavelave faafuasei sa totoe ai i le falemai tuai, ma o le po o le aso Sa na vaaia ai le tapena ese o le au faigaluega faapea gasegase sa faataotolia ai i lea taimi i le nofoaga fou ua atofaina i ai i le falemai fou ua maea fausiaina e le malo Saina. O se tasi o faafitauli sa feagai ai ma lea auaunaga o le tele o faasea a le atunuu lautele e autovaa atu mo togafitiga, i le umi o le taimi e faatali ai se fomai. Na saunoa le alii pule o pulega o le Ofisa o Auaunaga Faasoifua Maloloina, le afioga Leota Laki Lamositele Sio, o suiga ua i ai nei e aofia ai le tele toe mama o le nofoaga e faatali ai le mamalu o le atunuu e autovaa atu i le falemai, e le gata i lea, e malu puipuia toe ea malulu.

FAAITITIA NUMERA GASEGASE CHIKUNGUNYA

Ua faamautu mai e le Matagaluega o le Soifua Maloloina le alualu i lalo o le fuainumera o i latou ua aafia i le gasegase o le Chikungunya lea e mafua mai i siama e feaveaia e namu, ae o lo o tumau pea fautuaga ma lapataiga mo le taofia o le pepesi o lea faamai. Na faaalia i le lipoti aupito i lata mai o lea gasegase e faapea, ua oo atu nei i le 4,431 le aofai o tagata o le atunuu ua aafia, ma ua mautu le fai ifo o le fuainumera o tagata ua aafia i lenei taimi pe a faatusatusa atu i le taimi na faato’a molimauina ai lea gasegase. O le pa’u o le fuainumera o i latou ua aafia o se tulaga ua maitauina le tulai mai pea i vaiaso taitasi amata mai lava i le masina o Tesema o le tausaga na tea nei. O i latou i le va o le 15 i le 35 tausaga na aupito i maualuga ia i latou na aafia i le Chikungunya. Peitai na oo lava i pepe e le i atoa le tausaga faasolo atu lava ia i latou e 70 ma ona tupu tausaga na aafia. O lo o faaauau pea galuega a le matagaluega e ala i le lapataia o le atunuu lautele i luga o televise, leitio e oo lava i fesootaiga i luga o telefoni feaveai, i auala e tetee atu ai i lea faamai, aemaise i lenei vaitaimi o le mamafa o timuga.

TAPENA LE LOLA PALOTA MO LE TAUSAGA FOU

O lo o faagasolo nei galuega a le Ofisa o Faiga Palota i nuu ma afioaga ina ia mautinoa e oo atu i le taimi o faiga palota lautele i le tausaga fou, ua mautu uma resitala ma faamatalaga moomia o le aofaiga o tagata palota i totonu o le lola palota. O le vaiaso nei o lo o faagasolo ai i afioaga o Letogo, Vailele ma Fagalii i le itumalo o le Vaimauga ia resitala o le au palota. O lea gaioiga a le Ofisa o Faiga Palota o se auala e faamalamalama atili ai ia suiga faaletulafono ua i ai nei le faagasologa o le faiga palota o le tausaga fou. Na saunoa se tasi o sui sinia o le ofisa e faapea, o le autu o a latou galuega o le toe faafouina lea o ata o le au palota sa resitala i le tausaga e 2005 faapea nisi o faamatalaga faaopopo e lei faamauina muamua. Na ia faaalia, ua maitauina le toatele o i latou ua oo atu ma faafouina o latou ata, ma ua maua ai foi le avanoa o nisi o ia afioaga e lei resitala muamua ae ua agavaa e avea ma tagata palota, e resitala ai o latou suafa. Na ia faamamafa, ua faatulafonoina le palota uma o i latou ua atoa le 21 tausaga ma luga atu i le faiga filifiliga a le atunuu ma ua maea foi ona latou faamalamalamaina lea tulaga i le mamalu o tamalii ma failauga o afioaga taitasi o lo o latou galulue ai nei.