Pago Pago, AMERIKA SAMOA - O le a fa’aaogaina e Amerika Samoa tulafono tau tagala vaea mai galuega a le Setete o Hawaii e avea ma tatou tulafono e mafai ai ona maua penefiti mai le fetarale mo i tagata faigaluega i le teritori ua a’afia a latou galuega o le o le COVID-19.

Ua fa’ailoa mai e le Matagaluega o Leipa a le Malo Tele, e tatau ona fa’aaogaina e le Malo o Amerika Samoa le tulafono lea a Hawaii e talia ai e ana tagata faigaluega a’afia a latou penefiti mai le Feterale, i polokalama nei e lua -  Pandemic Unemployment Assistance (PUA) ma le Federal Pandemic Unemployment Compensation (FPUC). 

I se poloaiga a Kovana Lolo Matalasi, ua ia fa’atonuina ai le Matagaluega o Tagata Faigaluega a le malo o Amerika latou te fa’afoeina i le teritori polokalama o le PUA ma le FPUC - e mua ai e tagata faigaluega i Amerika Samoa penefit fetarale ona ua afaina a latou galuega i le COVID-19.

O le aso Faraile na te’a na fa’alauiloa ai e Lolo mae’a taua’aoina le $16.2 miliona mai le fetarale mo le PUA ma le FPUC. O lea vaega tupe o loo toina mai lea i le CARES Act e fa’agaoiaoia e pei o se inisiua mo galuega na vaea mai ai i latou galuega.

E tusa ai ma se fa’amatalaga mai a le taitai o le Komiti Fa’afoe o le Coronavirus, Iulogologo Joseph Pereira, o le a fa’alauiloa mai e le matagaluega o tagata faigaluega a le tatou malo a latou aiaiga tamau nei mo e talosagaina le penefiti i le vaiaso nei, ona fa’atautaia loa le o talosaga.

“O le PUA ma le FUPC, poo polokalama nei e lua mo i latou ua vaea mai galuega, ua aofia fa’atasi ai le puipuia o latou avanoa faigaluega, ma toe fa’afo’i mai o latou totogi na to’esea ona o a’afiaga o lenei fa’amai pipisi,” o se tala lea a Iulogologo.

O le a talia talosaga mai ia i latou o sitiseni o Amerika, Amerika Samoa ma i latou o e ua nonofo tumau i Amerika Samoa. O isi ituaiga o tagata faigaluega uma i le atunuu ua latou talanoaina fo’i pe mata e mafai ona fa’ao’o atu i ai lea alamanuia.