Ads by Google Ads by Google

Fautuaga suiga o le poloaiga o le fa'asa Coronavirus


[ata: SN]

 

Pago Pago, AMERIKA SAMOA - Ua fa’afofogaina nisi o fautuaga ua fa’aofi mai e le vasega o le fa’auluuluga o le Matagaluega o le Soifua Maloloina, le pulega o le Falema’i LBJ Medical Center ma le vasega foi o foma’i a le VA, mo suiga i le fa’asa o le COVID-19.

 

O se tasi o fautuaga ua tuuina atu i le malo ina ia tapunia pea alava’a mo Amerika Samoa se ia o’o atu ia Iuni 30 ma ia fa’aopoopo nisi itula e tatala ai pisinisi mo le mamalu lautele mai le 6:00 i le taeao se’ia oo i le 8:00 i le afiafi. I le taimi nei ua tamau le taimi e tatala ai pisinisi mai le itula e 6:00 i le taeao se’ia oo i le 6:00 i le afiafi.

 

Na fa’aulu atu nei aiaiga fou o le fa’asa i le fonotaga a le Komiti Fa’afoe  ma le komiti galulue a le Coronavirus lea na matua fa’atumulia ai le EOC. Ona ua fa’aopoopo atu fo’i ma sui iloga o le Komiti e iloiloa le fa’aaogaina tatau o tupe uma ua foa’ia mai e le Malo Tele i le fonotaga ua atili ai ona tumu le nofoaga sa faia ai lea fono.

 

O le komisi fou lenei ua fa’atulaga latou te va’aia toto’a aiaiga o nei tupe ua fa’auia mai e le Malo tele ina ia fa’aaoga i gaoioiga uma mo le coronavirus, galuega e tete’e atili atu i le ulufale mai o lea ma’i pipisi, atoa ai ma le taua’aoina sa’o atu o nei penefiti ua foa’ia mai mo le mamalu o i latou uma na lafo lafoga i le Malo. 

 

Ina ua fa’afofogaina fo’i e le Komesina o Leoleo le suiga lea ua fa’ailoa mai o le a tatala umi ai pisinisi, ua fa’ailoa atu e ia i le fonotaga, “Ia mautinoa lava ua fa’asoasoa lelei le to’atele o tagata e ulufale i nei pisinisi i le taimi e tasi. O lo’o matua tigaina lava le vasega o leoleo i le taumafaiga e fa’amamalu le aiaiga lea o le vavamamao o tagata i so’o se tautua e aga’i atu i ai. E tatau ona va’ai toto’a i le aofai o tagata e mafai ona faia fa’atauga i totonu o le faleoloa i le taimi e tasi.”

Ua ia fa’amanatu atu i le mamalu o le fonotaga, “I le faleoloa lava ia o le PX, ua na’o le to’a sefulu i latou e mafai ona fa’atau i totonu i le taimi e tasi, e tatau la ona faia lea aiaiga i so’o se faleoloa e fuafua lava i lona tele.”

 

“O le faigata o i ai nei, ona a taumafai atu leoleo e fa’amalosia lea aiaiga o le fa’asa, ae finau mai le vasega o faipisinisi tetele ma tagata fa’atau, e leai se aiaiga fa’apea o i ai a le Coronavirus.”

 

O le fa’apupulaga a le Dr Iotamo Saleapaga sa ia fa’ailoa mai ai, “E ao ina fuafua le aofai o tagata e ulufale mo fa’atauga e fa’ataga i totonu i le taimi e tasi. Afai e tele le faleoloa e pei o le Cost U Less e toatele atu fo’i tagata e mafai ona fa’ataga i totonu.”

 

I le fonotaga lava lea, ua toe tofia ai foi e Kovana Lolo se isi vaega o ana Komiti fa’apitoa e tolu mo le Coronavirus, ina ia latou toe va’aia toto’a le fa’asa o lo’o fa’amamalu nei ma toe fo’i mai ma ni suiga e tatau ona toe fa’aofi i ai, ao le mea e ao ina fa’ataua lava, o mea e ao ina suia o lenei fa’asa atoa.

 

Ua tuuina mai le aso Sa ina ia oo atu i le latou fonotaga lea, ua fo’i mai ma nei suiga e tatau ona faia, a’o le’i oo atu ia Me 31, 2020. O i latou nei ua toe tofia mo lea faiva ua aofia ai le Loia Sili, fa’atonu o le DOH, CEO o le falema’i LBJ, taitaifo o o le Komiti fa’afoe o le Coronavirus, ma le sui filifilia mo le Kovana Sili. Na toe fa’aopoopo atu i ai ma le Fa’atonu o Foma’i a le VA Clinic i le vaega lea.

 

I le folasaga na tapena a le ali’i foma’i fa’apitoa mo fa’ama’i pipisi Dr Aifili John Tufa, sa ia fa’amanino atili ai mea o lo’o sili ona fa’amamafaina i atunuu o lo ua lutia ma ua aafia fo’i i le saua tele o le Coronavirus, “Ua fa’amuamua lava le taofia lea o le fa’atasitasi o tagata e to’atele, ma le latou feoa’i solo e fetaui ma isi poo latou aiga pe o latou uo mamae fo’i, ma le taofia lea o femalaga’iga i le va o latou malo ma o latou malo tuaoi.”

Ua ia toe fa’ailoa mai, “E le tatau lava ona vave tuumamaina le fa’amamafaina pea o le fa’asa lenei, aua ua iloga ona toe afaina  le lautele o atunuu na amata fa’ama’amulu i a latou fa’asa. Na matua toe lutia lava i le toe fa’aopoopoga tele o e ua toe maua i le covid -19 ma e na toe maumau le soifua ina ua toe fa’amamulu atu i a latou aiaiga o le fa’asa.”

 

“Ua aoga lava le va’ai toto’a i mea ua fa’afeagai ma isi malo uma na lutia i lenei fa’ama’i pipisi ina ia aoaoina ai i tatou i aiaiga o tatou fa’asa e ao lava ona taofiofi mamau ma nisi o aiaiga e mafai muamua tau faamamaina ina ia toe fa’agasolo olaga masani o tagata uma.”