tusia: Leua Aiono Frost

“O le aotelega o taumafaiga a Autalavou Fa’a-Sone a le Pule’aga Samoa Pago Pago, o le a fa’ato’a maua tonu lava pe a o’o ina mae’a lelei ta’aloga faitaulia o le Liki o Ta’aloga Eseese o loo faatautaia pea.” O se tala ma’oti lea mai le Komiti o lo’o Liki Kirikiti a le Pule’aga o lo ua toe toe lava mae’a.

I le ta’aloga Kirkiti o le aso ananafi i Faga’alu na fetaui ai le ‘au a le Sone Tutotonu ma le Sone i Sisifo, na muamua tata le sone i Sisifo o le liki a tama’ita’i ma sa maua latou ‘ai e 39 ae atoa loa pe e 19.

Tulia e le Tutotonu ma sa va’aia le fita tele o le ta’aloga aua sa o fa’atasi lava ‘ai ma pe i le amataga. E ono ‘ai ae ono fo’i pe. Peita’i, ina ua o’o atu i le vaega mulimuli o lea ta’aloga finau tele, ua maua ‘ai e 39 o Tutotonu ae na’o le 38 ai sa latou tulia. O le manumalo i lea ta’aloga o le Sone Tutotonu.

O’o ane i le ta’aloga a ali’i, na muamua fo’i tata le ‘au malosi mai sisifo, maua o latou ‘ai e 50, peita’i o lo’o tulia pea i le taimi nei.

Ina ua fesiliga fo’i le laulau a le Komiti i ‘au o lo’o malolosi mai i le latou Liki Kirikiti, ae fa’ailoa mai o le ‘au a le Sone i Sasa’e lea e malosi tele. “I latou ta’aloga ma le sone a e Fagaloa i le aso Faraile o le vaiaso na te’a, sa matua ese fo’i le malolosi o latou ‘au ma sa manumalo uma ‘ai a le Sone Sasa’e i au a tama ma teine a le Sone a le Fagaloa.”

O lo ua fa’ailoa mai o le Liki Soka lea o le a amatalia ta’aloga i le Malae i Gagamoe i le aso, Aukuso 2, 2017 ma e amata fo’i e ta’ilua ta’aloga i le aso, tama’ita’i ma ali’i.

O loo ua fa’ai’ui’u ane fo’i le Liki Pasiketi polo, ae le maua mai se tala i ni au o lo’o malolosi i le Liki Basketball ma le Volley Ball.

Peita’i, mo le samiga ma le toe aso o lenei Liki o Ta’aloga Eseese a le Pule’aga, ua fa’ai’u lea ia Aukuso 11, 2017 i le Malae Ta’alo Veterans Memorial i Tafuna. O lea taeao o le a amatalia ai se Malafoni e amata atu i le Maketi i Fagatogo i le ta tonu o le 5:00 i le vaveao, ae fa’atini i le Malae Ta’alo i Tafuna, ma amata ai loa ma toe ta’aloga Fa’a-Afeleti e mae’a ai le fa’amoemoe mo talavou uma a le Pule’aga Samoa Pago Pago.

 E lei fa’ailoa maia ni ituaiga o fa’ailoga o le a maua e le Autalavou e manumalo a’ia’i pe a tu’ufa’atasia nei togi uma, ae o le mea mautinoa lava, e le o fa’avaivai fo’i le Komiti a le Fa’atonu o Autalavou, Patele Asalemo Asalemo, i le latou fo’i vaega e ao ina fai.