Ua toe topolo i le masina o Me le iloiloina e le fa’amasinoga o le mataupu i le tau sailiina lea, pe na fa’apefea ona toe ulufale mai se ali’i na poloa’i e fa’asa ona toe ulufale mai i le teritori, ae ua poloa’i e le fa’amasino sili ia Micahel Kruse le Ofisa o Femalagaaiga a le malo, ina ia tu’uina atu fa’amaumauga e fa’atatau i le ali’i ua molia se’i iloilo e le fa’amasinoga.

O le taeao ananafi na toe fofogaina ai i luma o le fa’amasinoga le mataupu a Pelenato Maiava, po o Pelenato Lino fo’i e pei ona silafia ai o ia, ona o lo o tau saili pea e le fa’amasinoga se tali i le tele o le mau fesili o lo o tula’i mai, pe na fa’apefea ona toe ulufale mai lenei ali’i i le atunu’u, a o lea na poloa’i o ia e le fa’amasinoga e aua ne’i toe ulufale mai mo le umi e 7 tausaga, e mafua mai ina ua ta’usala o ia i lona faia o uiga mataga i se tama’ita’i i le 2011.

Na si’i si’i le si’ufofoga o Kruse i le taeao ananafi i le taimi na valaau ai le mataupu a Pelenato, ina ua fesili atu i le loia a le malo ia Mitzie Jessop pe ua avatu faila a Pelenato, ae na tali Jessop, “e na o kopi o pemita na ulufale” mai ai Pelenato i le teritori.

“Ou te mana’o i le faila atoa”, o le toe tali atu lea a Kruse ia Jessop ma lona si’ufofoga ua si’i si’i i luga, ma ia fa’atonu ai loa le Masela o le fa’amasinoga e o ma le Pule o le Ofisa o Femalagaaiga e aumai le faila, ina ua atagia mai e le i avatua le faila atoa i le fa’amasinoga.

“Marshall, ia lua o ma le Pule o le Ofisa o Femalagaaiga e aumai le faila, e i ai le tagata e alu i Tafuna i le aso lenei”, o le fa’atonuga lea a Kruse i le Masela ma ia fa’atonu ai le fa’amasinoga ina ia malolo ae se’i fa’atali le faila.

Sa i ai i totonu o le potu fa’amasino le Pulesili o le Ofisa o Femalagaaiga, afioga Tamasa Dennis Lutu.

Ina ua toe tauaofia le fa’amasinoga i le tuana’i ai o le afa itula e le i taunu’u ane lava le faila, na fa’ailoa ai e Kruse e fa’apea, ua logo mai e le Masela le Failautusi o le Fa’amasinoga, o lo o galulue pea lava le Ofisa o Femalagaaiga e tu’u fa’atasi le faila a Pelenato, ma e le o malamalama ai la lona mafaufau i le uiga o lea tala, po o le mea e i ai se faila pe leai fo’i.

Sa fa’apea fo’i ona saunoa Kruse ia Jessop, ina ia silasila toto’a i le tulafono e fa’atatau i molimau a le malo.

I lea tulafono e pei ona tolaulau e Kruse i luma o le fa’amasinoga, o lo i le Tulafono Toe Teuteu a Amerika Samoa 3.0203, ma, o lo o talanoa mai ai i le malosi o lo o i le fa’amasinoga e mafai ai ona fa’asala i se salatupe po o se fa’asalaga fa’a falepuipui i so o se umi e manatu le fa’amasinoga e talafeagai, mo i latou e le usitaia poloaiga a le fa’amasinoga.

Na saunoa Kruse e fa’apea, na poloa’i e le fa’amasinoga “se ali’i e mata’utia le amio valea i tama’ita’i” e aua ne’i toe ulufale mai i Amerika Samoa, a o lea ua toe ulufale mai.

Saunoa atili Kruse e fa’apea, e le o se taimi muamua lea ua tula’i mai ai se mea fa’apea, o le toe ulufale mai lea i le teritori o se tagata na fa’asa ona toe ulufale mai, peita’i, o le taimi muamua lenei ua maua ai e le fa’amasinoga fa’amaumauga o le fesoasoani lea o le Ofisa o Femalagaaiga o le toe ulufale mai o Pelenato i le teritori.

Na taua fo’i e Kruse e faapea, i le taimi na lau ai le faasalaga a Pelenato, sa taua ai i se ripoti mai le pule o le Ofisa o Femalagaaiga i lea taimi o Ufuti Faafetai Ieremia, e lua igoa sa iloa ai Pelenato, peita’i o le taimi nei, o se tasi o ia igoa ua le iloa mai fa’amaumauga, ma, o le fa’afitauli lea o lo o fia iloa e le fa’amasinoga, pe aisea na mafua ai ae na fa’apefea fo’i ona tupu.

I le mae’a ai o saunoaga a Kruse e fa’atatau i lenei mataupu, sa ia poloaina le tatau lea ona ta le itula e 4:00 i le afiafi ananafi, ua tu’uina atu i le fa’amasinoga le faila atoa o Pelenato o lo o i le Ofisa o Femalagaaiga, e aofia ai ma le pemita o lana pisinisi.