A o fa’atalitali ai le malo o Amerika Samoa mo le taunu’u mai o ni fesoasoani mai le malo feterale, e tusa ai o vaega na fa’aleagaina i timuga ma lologa i le aso Lua o le vaiaso na te’a nei, na fa’ailoa ai e le afioga i le alii kovana ia Lolo Matalasi Moliga i se feiloaiga ma lana kapeneta i le aso To’ona’i na te’a nei, a o le i taunu’u mai fesoasoani fa’apea, ua leva na tatau ona silafia e le fa’atonusili lana gaioiga e fai i taimi e tutupu ai fa’alavelave fa’apenei.

“O oe o le fa’atonu, e tatau ona e silasila lelei le mea e tatau ona fai, aua afai tatou te le gaioi i mea laiti fa’apenei, e fa’apefea ona tatou tali atu i fa’alavelave tetele pe a tula’i mai e pei o tsunami po o ni afa tetele”, o le saunoaga lea a Lolo sa tu’uina atu i lana kapeneta.

“O le taimi tonu lenei e tatau ai ona tatou gaioi i taimi e tutupu mai ai fa’alavelave faapenei, ina ia maua ai lo tatou iloa i auala eseese tatou te fesoasoani atu ai i o tatou tagata pe a latou mana’omia se fesoasoani,” o le saunoaga lea a Lolo, ma ia fa’atonuina ai loa le kapeneta ina ia tapena uma a latou ripoti mo mea sa fa’aleagaina ao lei mae’a le vaiaso.

Na taua e le fa’atonusili o le Matagaluega o le Puipuiga o le Saogalemu Lotoifale (DHS), ua mae’a ona fa’ailoa mai e le Koluse Mumu  faapea ai ma le Vaega Fesoasoani a le Feterale mo Fa’alavelave Fa’afuase’i (FEMA), le sauni e ofo mai la latou fesoasoani mo Amerika Samoa.

Saunoa Utuali’i Iuniasolua Savusa, o lo o tau saili mai ni avanoa o sui o le FEMA e malaga mai ai i le teritori, mo le ofoina mai o le latou fesoasoani masani, ae a le maua ni avanoa, lona uiga o le a malaga mai lava latou i se va’alele a le malo, mo le momoliina mai o a latou sui e fesoasoani i taimi e tula’i mai ai fa’alavelave fa’apenei.

Na faamaonia foi e Utualii le maea lea ona faia o fesootaiga ma sui o le Koluse Mumu, ma ua sauni fo’i e ofo mai la latou fesoasoani.

I tulaga o faalavelave faalenatura faapenei, e 30 aso talu mai le aso na maea ai le fa’alavelave, e tatau ona tuu faatasia ai ripoti mo mea sa faaleagaina, e pei ona taua e Utuali’i i le fonotaga ma le alii kovana, ma ua fautuaina ai faatonu o matagaluega ma ofisa ina ia tuu faatasia a latou ripoti mo mea sa faaleagaina, ina ia vave ai ona tuuina atu le ripoti atoa a le malo e tusa ai o vaega sa faaleagaina i totonu o le atunuu.

Ua fautuaina foi e Lolo le loia sili a le malo ma le susuga a Utuali’i, ina ia silasila toto’a i le tulafono, i vaega tonu e tatau ona agava’a ai Amerika Samoa mo vaega ua fa’aleagaina e tatau ona fa’ailoa, ae maise i taimi o fa’alavelave fa’alenatura fa’apenei.