Ads by Google Ads by Google

Ulua’i taimi ua fa’atautoina ai se Komesina o Leoleo a le malo


Le taimi na fa’atauto ai e le Loia Sili a le malo, afioga Talauega Eleasalo Ale le Komesina o Leoleo a le malo, tofa Le’i Sonny Thompson, e aloaia ai i lalo o le Tulafono le fa’atinoina o ona tiute fa’a Komesina. [ata AF]

Le Komesina o Leoleo ia Le’i Sonny Thompson ina ua mae’a ona fa’atautoina o ia i le fa’aiuga o le vaiaso na te’a nei e le Loia Sili, fa’atasi ai ma Sui Komesina e to’alua a le Matagagaluega o Leoleo, e aofia ai le afioga ia Falana’ipupu Ta’ase Sagapolutele ma Vaimaga Maiava. [ata AF]
ausage@samoanews.com

O le fa’atautoina ai o le Komesina o Leoleo e le Loia Sili a le malo i le fa’aiuga o le vaiaso na te’a nei, ina ia tusa ai ma ala o le Tulafono le fa’atinoina o ona tiute fa’a Komesina, ua tula’i mai ai o se ulua’i taimi lea ua fa’atinoina ai se sauniga fa’apitoa i le atunu’u.

 

O le faaiuga o le vaiaso na te’a nei i le potu fono a le Ofisa o le Komesina o Leoleo, na fa’ataunu’uina ai se sauniga puupuu e ala i le fa’atautoina o le tofa Le’i Sonny Thompson e le Loia Sili a le malo ia Talauega Eleasao Ale, e aloaia ai le fa’atinoina o ona tiute fa’a Komesina e pei ona fa’atulaga mai i lalo o le tulafono.

 

O lenei sauniga sa molimauina e sui o le Ofisa o Leoleo a le malo, e aofia ai Sui Komesina e to’alua a le Matagaluega ia Falana’ipupu Ta’ase Sagapolutele ma Vaimaga Maiava, fa’apea ai ma le Ta’ita’i o le Ofisa o Leoleo Su’esu’e ia Capt. Pou Supapo.

 

O le mae’a ai o le sauniga mo le fa’atautoina o le afioga i le ali’i Komesina o Leoleo, na ia fa’amalamalama ai loa i tusitala le autu moni o lenei fa’amoemoe taua.

 

“O le autu o le sauniga e pei ona i ai le fa’atautoina o le Komesina o Leoleo i lenei taeao ina ia silafia e le atunu’u, o lea ua mae’a ona tofia aloaia a’u e le Kovana ma fa’amaonia e le Fono Faitulafono mo le tofi Komesina o le Ofisa o Leoleo a Amerika Samoa, o le mafua’aga lena ua fa’ataunu’uina ai lenei sauniga, o le taumafai lea ina ia fa’aatoatoa tulaga uma e pei ona fautua mai ai le Tulafono atoa ai ma le Fa’avae o Amerika Samoa, e pei ona tusitusia i le Ulutala 46 o le Tulafono Toe Teuteu a Amerika Samoa, e aumai ai i le Komesina le malosiaga e fa’atino ai ona tiute fa’a Komesina, atoa ai ma le fa’ataunu’uina o ona tiute fa’a Ta’ita’i o le Ofisa o Leoleo”, o se vaega lea o le saunoaga a Le’i.

 

Saunoa atili le tofa Le’i e fa’apea, e taua tele i lalo o le Tulafono ma le Fa’avae o Amerika Samoa le tiute tauave o le Komesina, o le mafu’aaga lea e tatau ai ona aloaia le fa’atautoina o ia, ina ia tu’u atu ai le malosi e fa’atino ai ona tiute atoa ai ma fa’aiuga e faia i soo se taimi e galulue ai ma le vaega o ali’i ma tama’ita’i Leoleo.

 

“O se tasi fo’i o itu ua mafua ai lenei fa’amoemoe, ona ua manatu fo’i le Matagaluega o Leoleo e aloaia fo’i le fautuaga mai le afioga i le ali’i Fa’amasino o le Fa’amasinoga Fa’aitumalo ia Fiti Sunia, ina ia mautinoa e atoatoa le fa’atinoina o ona tiute i lalo o le Tulafono”, o le saunoaga lea a Le’i.

 

O se iloiloga sa faia i luma o le fa’amasinoga fa’aitumalo i le vaiaso na te’a nei, sa fautuaina ai e le afioga i le ali’i fa’amasino ia Sunia le Komesina o Leoleo i auala e fa’aleleia atili ai le fa’atinoina o ona tiute tauave, aemaise ai o le fa’amalosia atili lea o fa’aiuga e faia e le Ofisa o Leoleo.