Ads by Google Ads by Google

Ulua’i a’oga tulaga muamua fausia lona faleta’alo


O se va’aiga i le faleta’alo tele fausia nei e le Nana’s Construction ma e toe tolu vaiaso ona mae’a lelei lea e pei ona naunau i ai le agaga o lea Kamupani ma lona Pulega. [ata: Leua Aiono Frost]

O se va’aiga lea i le fa’atina Nana Fiapa’ipa’i Fruean ma le aufaigaluega o lo’o latou fa’atautaia le galuega tele lea. Ua latou naunau ina ia motu lava le galuega lea i le isi 3 vaiaso o lumana’i nei. [ata: Leua Aiono Frost]

O lo ua tutula’i le auivi o le faleta’alo i le ogatotonugalemu o le A’oga Tulaga Muamua i Aua, ma o se galuega ua tula’i mai le matagofie, pe afai fo’i ae tatalaina, o se fiafiaga o le fanau a’oga.

 

“Ou te fiafia tele aua o lea ua ou maua se avanoa ou te ta’alo ai i totonu o se faleta’alo, e tele ina le ta’a’alo matou pe a timuga ae a fai matou PE. Lea la e le toe taofia matou ta’aloga, o le a sauni e fai lava aua ua malu le matou fale ta’alo,” o le tala fiafia lea a le tama’ita’i o Segia Peniamina i le Vasega 2.

 

“O lenei faleta’alo na ala ona fausia, aua sa lu’i ai a’u e le fa’aululuga o le tatou malo. O le mae’a o le falea’oga lona lua o lenei a’oga, lea sa matou fausia ia Oketopa 2016, ae togi fa’aataata mai ma le fesili a le afioga Kovana Lolo Moliga ia te a’u, pe ua ou mafaia ona fausia se Fale Ta’alo U’amea atoa. E ui la ou te le’i faia muamua, ae o se lu’i fo’i ia te a’u le taumafai e fa’atino se mea fou,” o se fa’amatalaga aloa’ia lea a Fiapa’ipa’i Tuaolo Fruean, lea e fa’asuafaina e lana fanau ma le aufaigaluega o “Nana,” ma ua avea fo’i ma igoa o a latou pisinisi.

 

“O le amataga o Novema 2016, ae fa’amau loa le okaina i fafo o mea uma lava o le faleta’alo, peita’i na to’ai taunu’u mai pusa oloa tetele nei e lua, ua mea’a fa’atumulia i le u’amea atoa o le auivi ma le apa e ato ai le atoaga o le faleta’alo. O le galuega la lea ua i ai nei, ua na’o le tasi le vaiaso talu ona fa’apipi’i atoa.”

 

“O le atoaga o le galuega lenei, ou te mana’o e na’o le tolu vaiaso, ua tatou ona mae’a loa ae sauni e tatala mo le fanau aoga e fa’aaoga.”

 

Pe afai e te fesili a’e i le maualuga, le anagata ma le faussa lelei ma le mautu o le falea’oga, ae fua atu i le taimi ua tamau i le mafaufau o le tina e ona le Kamupani, ua tauau e le mafaia, peita’i, o le fomula ua fa’ailoa mai e Nana, “Ia e i ai lava i taimi uma e galulue malosi ai si au aufaigaluega, e le tatau ona e tutu mamao ai, aua e mataituina le saogalemu o le aufaigaluega, ma le vave lea e te naunau i ai. E le’i fa’amaina lava so’u mana’o e si a’u fanau faigaluega.” O le tala ata lea a Nana, a’o faafofoga le taita’i kamuta, Logovii Fa’atau ma lona soa e fesoasoani ia te ia o Aganuu Si’a.

 

O le faleta’alo e u’amea atoa e pei ona talosagaina e le afioga le Kovana ia fausia, ua mae’a fa’atulaga mai le CIP Fund mai le Matagaluea o le Initeria e faatupe ai le galuega i lona aofai e  $500,000.

 

Na fa’ailoa mai e Nana, “O le lelei lava fo’i o sailliga ma le u’una’i malosi a le susuga le Faipule Faimealelei Allen ina ia tapena lelei le lotoifale o le laumua i si ona itumalo, ua gaua’i atu ai ma le silasila a le fa’auluuluga o le tatou malo, ina ia faia loa ma le faleta’alo o le latou aoga.

 

O nisi galuega ua fa’atautaia fa’atasi e le Nana’s Construction i le taimi nei e aofia ai ma le fale’aoga o Samoana, e lua i ai falea’oga o lo ua latou fausia nei. O le isi o lo’o latou fa’afouina atoa le Ofisa o le Customs i le Uafu i Fagatogo.

 

I le galuega lea i Samoana, sa le manatu lava Nana latou te mauaina, aua sa maualuga lana ofo nai lo ofo sa taua’aoina atu e nisi kamupani faufale i le taimi o le tauofoga. Peita’i, na fa’ailoa fo’i e Nana, “Ou te fa’afetai, aua e le’i manatu lo’u nei sui fa’atauva’a, e lafo mai ia matou, ae tolu vaiaso talu ona mae’a le tauofoga, ae vala’au mai le Ofisa o Aoga, o matou lea ua pasia mai e fausia le falea’oga lona lua lea e fai nei. Ia o lo’o taumafai lava ina ia fausia fo’i mo le na’o le 7 masina, ae tausaga atoa le matou ofo.”

 

I le taga’i atu i le ala o fa’atino ai e le Nana latou galuega, ua iloga ai, le naunau o le malo e tu’u i ai galuega. O lo’o vave pea na latou fausia falea’oga, o le umi lava e fausia ai e i latou falea’oga o le 8 masina, le faleaoga  muamua o Samoana lea na latou mua’i fausia.

 

Ina ua fesiligia i se isi a’oga o taumafai mai e fausia ni o latou faleta’alo, ae ata le tina ma faailoa mai, “Ua saua lava i le fa’alogo, o Lupelele lea ua amata ona fa’ato’ai mai le latou tu’ufesili, ma e le o taumate lava, ua aga uma fo’i faipule o itumalo ta’itasi e amata ona va’ai toto’a i Laumua i totonu o latou itumalo, ina ia tutula’i ni latou faleta’alo u’amea e le eleagofie i o latou lotoa.”