Ua fa’amanino i folasaga a vaega o lo o tausia i latou e a’afia i le gasegase o le mafaufau i Samoa ma Amerika Samoa, lea na mafai ona fa’alauiloa i le aso lona lua o le Fonotaga lona 7 a Vaega o le Soifua Maloloina o lo o talimalo ai Amerika Samoa i le vaiaso nei, le tutusa o taumafaiga a atunu’u e lua e tau saili se auala e foia ai le fa’afitauli o le gasegase o le mafaufau.

E pei ona taua e le Foma’i o le mafaufau o lo o galue i le Matagaluega a le Soifua Maloloina a Amerika Samoa, susuga Dr. Peni Biukoto i lana folasaga, le mana’omia o le faia o ni a’oa’oga i le atunu’u ma tagata faigaluega a le Soifua Maloloina ma le Falema’i, ina ia latou silafia ai auala e mafai ai ona fesoasoani atu i tagata ua a’afia i lenei gasegase.

Ae na taua e le afioga a Leiataua Dr. Ben Matalavea, o le Foma’i Sili lea a le malo o Samoa i lana folasaga e fa’apea, e le mafai ona foia le fa’afitauli i le fa’atupulaia o tagata e a’afia i le gasegase o le mafaufau i Samoa, pe afai e le fa’amalosia tulaga o a’oa’oga i le va o tagata faigaluega a le Soifua Maloloina ma tagata lautele o le atunu’u, ina ia fetufaa’i fa’amatalaga ma metotia e mafai ai ona fesoasoani atu le Soifua Maloloina ia i latou o lo o a’afia i lenei gasegase.

Na taua e Dr. Biukoto i lana folasaga le fa’afitauli o lo o tula’i mai i le taimi nei i le auala o lo o ofo atu ai fesoasoani mo tagata lautele, e foliga mai o lo o vaivai le taula’i atu o le fesoasoani i tagata lautele, ae o lo o mamafa i se vaega fa’apitoa o lo o i ai ni manaoga, peita’i i lona talitonuga, afai e fa’atuatuana’i e le Soifua Maloloina ma le Falema’i le ofoina atu o le fesoasoani i tagata lautele, e mafai ona atili fa’atupuina ai le to’atele o i latou e a’afia i le gasegase o le mafaufau.

“O se tasi o itu taua o lo o lu’itauina ai vaega o lo o galulue i le tausiaina o le soifua maloloina o tagata i Amerika Samoa, ia fiafia e tufa fa’amatalaga ma fa’ailoa ‘auga o lo o a’afia ai fanau ma tagata o aiga, ina ia mafai ai ona silafia fa’afitauli o lo o tutupu ma maua ai loa se fesoasoani i se taimi vave”, o le fautuaga lea a Dr. Biukoto.

Ae na taua e Leiataua mai Samoa i lana folasaga e fa’apea, o se tasi o itu o lo o maitauina i le taimi nei i Samoa, e foliga mai o le to’atele o tagata e le o manatu mamafa i le fa’ailoaina o a’afiaga o lo o a’afia ai o latou aiga.

“O le to’atele o Tina e mafua ona o i le falema’i pe afai ua fiva ma ma’i lana tama, ae leai lava se isi e alu i le falema’i ona ua manatu ua ova le inupia o lona to’alua, pe ona ua malosi fo’i lona tagofia o le tapa ma isi lava fa’afitauli o le olaga, ina ia mafai ai ona saili se fofo, ae o ituaiga fa’afitauli na e atagia mai ai le a’afia o le tagata i fa’afitauli o le mafaufau”, o le saunoaga lea a Leiataua.

Sa ia fa’ataoto fo’i e fua fa’ata’ita’i o lo o fa’ailoa i fa’amaumauga a le Soifua Maloloina a le lalolagi, o le to’atasi mai tagata e to’afa, e i ai le avanoa e a’afia ai lea tagata i le gasegase o le mafaufau.

Na ia fa’amanino atili i lana folasaga e fa’apea, e le o le taofia i le falepuipui le tali e faia mo le tagata o lo o a’afia i le gasegase o le mafaufau, ae tatau ona faia i ai togafitiga ma tausi lelei o ia i le nofoaga e tatau ona tausi lelei ai.

I le fa’aiuga o lana folasaga, sa ia fautuaina ai le tatau lea ona iloilo toto’a i totonu o le atunu’u atoa ai tu ma agaifanua a Samoa auala eseese e mafai ai ona fesoasoani i le fa’afitauli o le mafaufau ua tuputele i le atunu’u i le taimi nei.