Ads by Google Ads by Google

Tuai na amata aloaia tautua MV Manu’atele mo Manu’a


Faatonusili filifilia o le Pulega o Uafu ma Malaevaalele ia Taimalelagi Dr. Claire Poumele. [ata AF]

Se vaaiga i se vaega to’atele o le aufaigaluega a le Pulega o Uafu ma Malaevaalele i le taimi na tapuaia ai le iloiloga a le latou Fa’atonusili i luma o le maota o sui i le aso Lulu na te’a nei. [ata AF]
ausage@samoanews.com

Ao tu’u fesili ai le to’atele o le atunu’u aemaise lava i tagata o le itumalo o Manu’a, poo fea se taimi e amata aloaia ai le tatua a le va’a fou a le malo lea na taunu’u mai i le amataga o le tausaga nei, ma le fa’amoemoe e tatua ai le itumalo o Manu’a, o le aso Lulu o le vaiaso nei na fa’amaonia ai e le Faatonusili tonfai o le Pulega o Cafu ma Malaeva’alele ia Taimalelagi Dr. Claire Poumele, le fa’atoa amata aloaia o le tatua a le va’a fou i se taimi o le masina o Mati.

 

O le malaga a le va’a lea o loo fuafua e fa’ataunuuina i le vaiaso fou mo Manu’a e pei ona saunoa Taimalelagi, o le malaga lea e fa’ata’ita’i ai le aga’i atu o le va’a i Manu’a, aemaise lava le taumafai e fa’ata’ita’i ona ulufale atu i le uafu i Faleasao lea o loo tula’i soo mai ai le fa’aletonu i le MV Sili pe a oo ina leaga le tau ma si’isi’i le tai.

 

“E leai se fuafuaga sa i ai faapea e taunu’u mai loa le va’a ona fa’atinoina loa lea o ana malaga mo le la’uina o uta ma pases i Manu’a, pau le fuafuaga sa i ai, a taunu’u mai le va’a i le atunu’u, ona fuafua lea o sana malaga fa’ata’ita’i i Manu’a, ina ia fa’amasani ai fo’i le au va’a, aua e ui ua leva ona galulue latou i luge o le MV Sili, peita’i e i ai lava fo’i ni nai eseesega laiti i le va’a tuai a le malo ma le va’a fou lea ua taunu’u mai”, o le saunoaga lea a Taimalelagi i luma o le matou o sui, i le taimi o lana iloiloga e fesiligia ai tofiga a le kovana e pei ona toe filifilia ai o ia e aves ma Fa’atonusili o le Matagaluega o Uafu ma Malaeva’alele.

 

Na fa’ailoa e Taimalelagi i luma o le fonotaga a le Kapeneta i le vaiaso na te’a nei e fa’apea, o lo o i ai le fuafuaga a taunu’u mai loa to toga o le va’a o loo oka i fafo ma fa’apipi’i, lona uiga o le isi fonotaga a le Kapeneta lea o le a soso’o nei, e tatau ona usuia i Manu’a.

 

I le fa’aleleia o le tautua a le malaeva’alele a le atunu’u, na fautuaina ai e le afioga i le ali’i faipule ia Vailoata E. Amituana’i ia Taimalelagi, ina ia vaavaai mo le fausiaina o se Olo e fa’atonutonuina malaga a va’alele (Tower), ina ia aua ai nei toe tula’i mai le tulaga lea o loo maitauina i le taimi nei, o le vaavaai mai lea i fafo femalagaaiga tau va’alele i Amerika Samoa.

 

Saunoa fo’i Vailoata e fa’apea, o lea ua silia i le 2 tausaga talu ona taunu’u mai le va’a a le malo o le Segaula, lea sa fa’amoemoe e tautuaina femalagaaiga i le va o motu o Manu’a, peita’i e oo mai lava i le taimi nei o loo fa’aaoga pea e tagata o le itumalo va’a alia e feoa’i ai i le va o le Faletolu ma le Luanu’u, ma tau tula’i mai ai le tele o le mau fesili i le mafua’aga na fa’atau mai ai le va’a o le Segaula ao lenen e le o fa’aaogaina.

 

Saunoa Taimalelagi e fa’apea, o lea ua taunu’u mai le ali’i papalagi mai Hawaii lea ua fa’amoemoe e avea ma Kapeteni o le Segaula, ma ua fa’amoemoe o se taimi o i luma e amata aloaia ai le tautua a le Segaula mo Manu’a.

 

I le fa’aiuga o le iloiloga, sa fautuaina ai e afioga i Faipule ia Taimalelagi ina ia galulue fa’atasi ma lana aufaigaluega, ma ia fa’amalosia fo’i tulafono mo le avina mai o lafoga o oloa i luga o le uafu, e fesoasoani ai i tupe mala a le malo.