E 3 moliaga mamafa ua faila e le malo fa’asaga i se Tama matua e 87 tausaga, ona o se fa’alavelave o lo o tu’uaia na tula’i mai i le tausaga na te’a nei, lea o lo o tu’uaia ai o ia i lona faia ai o uiga mataga i ni tama’ita’i se to’alua.

O moliaga e pei ona tu’uaia ai e le malo le susuga a Joseph Yandall e aofia ai le moliaga pito sili ona mamafa o le faia o uiga mataga i se teineititi e i lalo o le 12 tausaga le matua (child molesting), o le vaega A lea o solitulafono mamafa, lea e mafai ona fa’asala ai se tasi i le toese mo le umi e le itiiti ifo i le 10 tausaga ae le sili atu fo’i i le 30 tausaga le umi, fa’apea ai ma isi moliaga mamafa e lua, o le taumafai e ave fa’amalosi se tama’ita’i (attempted kidnapping) atoa ai ma le taumafai e tagofia itutinosa o se tama’ita’i i le tulaga muamua (attempted sexual abuse 1st degree).

E pei ona taua i fa’amaumauga a le fa’amasinoga, o tama’ita’i e to’alua o lo o tu’uaia na a’afia i lenei fa’alavelave, e aofia ai se teineititi e 12 tausaga le matua fa’apea ai ma se tama’ita’i e 16 gausaga le matua.

O le afioga i le ali’i fa’amasino ia Elvis P. Patea na taulimaina le ulua’i iloiloga o le mataupu a Yandall i le taeao ananafi, o le tama’ita’i loia ia Gwen Tauiliili_Langkilde sa avea ma ana loia, ae o le ali’i loia ia Woodrow Pengelly sa tula’i mo le itu a le malo.

I le taimi o le iloiloga a Yandall, na fa’aalia ai e Tauiliili-Langkilde le tauaaoina lea e le ua molia o le kopi o le tagi a le malo ua fa’aulu fa’asaga ia te ia, ma o lo o tete’e i ai o ia i tu’uaiga uma a le malo.

Na talosagaina e Tauiliili-Langkilde le fa’amasinoga mo se avanoa e iloilo ai fa’amaumauga o lenei mataupu, ma aia ai loa se fa’aiuga e tatau ona fa’ataunu’u le ulua’i iloiloga e fesiligia ai mau fa’amaonia a le malo (preliminary examination), ma fa’atulaga ai loa e Patea le itula e 8:30 i le taeao o le aso Gafua, aso 15 Me, 2017, o le a toe valaau ai le mataupu a Yandall ma iloa ai loa le taimi tonu e faia ai lana ulua’i iloiloga.

I le tulaga o le tupe e tatala ai Yandall i tua, na teena e le fa’amasinoga le talosaga a Tauiliili-Langkilde ina ia fa’aitiitia le tupe e tatala ai le ua molia mai le aofaiga e $75,000 lea ua mae’a ona fa’atulaga e le malo.

Na taua e le loia a Yandall e fa’apea, o le ua molia, o se Tama matua e 87 ona tausaga, na soifua ma tupu a’e i Amerika Samoa, le atunu’u o lo o fa’aauau pea ona aumau ai o ia mo lona soifuaga atoa.

Na taua atili e Tauiliili-Langkilde le tele o tausaga o tautua Yandall i le malo o Amerika Samoa, lea fo’i ua malolo litaea mai ai, o ia fo’i o se tasi sa tautua i ni isi o Fa’alapotopotoga Tuamoti i le atunu’u e pei o le Rotary Club ma le Shriners Club, e le o ia fo’i o se tagata e ono sola ese mai le atunu’u, aua o ia o se Tama ua matua lona soifua, e le gafatia fo’i ona ia totogiina le tupe e $75,000 lea ua fa’atulaga e le fa’amasinoga e tatala ai o ia i tua.

Na finau malosi le loia a le malo ia Pengelly i le fa’amasinoga ina ia teena le talosaga a le itu tete’e mo se avanoa e fa’aitiitia ai le tupe e tatala ai Yandall i tua, ona o le tulaga matuia o tu’uaiga o lo o faia fa’asaga ia te ia, lea ua mafua ai ona molia o ia i le moliaga A o solitulafono mamafa, lea fo’i o lo o tu’uaia le a’afia ai o ni tama’ita’i e talavou i lalo o le tulafono.

I le mae’a ai ona fa’afofoga o le fa’amasinoga i fa’afinauga a itu e lua, na fa’ailoa ai loa e Patea lona teena o le talosaga ina ia fa’aitiitia le tupe e tatala ai Yandall i le taimi nei, ae mafai ona toe iloilo se isi talosaga i se taimi o i luma.

Saunoa atili Patea e fa’apea, o lo o aofia i moliaga o lo o tu’uaia ai e le malo le ua molia le moliaga mamafa o le vaega A, lea e mafai ona fa’asala ai se tasi i le toese mo le umi e le itiiti ifo i le 10 tausaga ae le sili atu i le 30 tausaga pe afai ae fa’amaonia e le fa’amasinoga.

Ae afai e mafai ona tatala le ua molia i tua, ua poloaina o ia e le fa’amasinoga e aua ne’i ona toe solia se tulafono a le malo, auai i soo se taimi e valaau ai lana mataupu i luma o le fa’amasinoga, fesoota’i vavalalata ma lana loia, ma ia tu’uina atu ona pepa malaga e taofia e le malo.

Ua poloaina fo’i o ia ina ia aua ne’i ona taumafai e fa’afeso’ota’i molimau a le malo o lo o taua i fa’amaumauga a le fa’amasinoga, lea e aofia ai ma i latou o lo o tu’uaia sa a’afia i gaioiga e pei ona tu’uaia ai o ia, afai fo’i latou te fetaui mai i latou nei i soo se nofoaga, o lona tiute o le alu ese mai ai.

O le mae’a ai o le ulua’i iloiloga a Yandall i le taeao ananafi, na toe taofia ai loa o ia i le toese i Tafuna e fa’atali ai lana iloiloga lea ua fa’atulaga mo le taeao o le aso Gafua o le vaiaso fou.