Ads by Google Ads by Google

Tofia e Satele le afioga Tuiasina Esera avea ma Kovana Itumalo Falelima Sisifo


Le afioga i le Alo o Salamasina, le ali’i Senatoa ia Satele Galu Satele ma ni isi o lona Itumalo ina ua mae’a le fono a le Falelima i Sisifo i le taeao ananafi i le malae i Asotau, mo le sailiina o se tasi na te fa’aauauina le tofi o le Kovana Itumalo sa nofoia e le afioga a Lualemaga E. Faoa ua tu’umalo. [ata AF]
ausage@samoanews.com

E ui i le tulaga si’isi’i o le tai sa i ai le fonotaga a le Falelima i Sisifo i le taeao ananafi, i le tau sailiina o se tasi na te fa’aauauina le tofi o le Kovana Itumalo sa nofoia e le afioga a Lualemaga E. Faoa ua tu’umalo, ae na talia lava e le to’atele le fa’aiuga sa tu’uina atu e le afioga i le Alo o Salamasina, le afioga i le ali’i Senatoa ia Satele Galu Satele, ina ia taoto atu le tofi o le Kovana Itumalo e fa’aauau e le itumalo o Tualatai.

 

Ae ina ua fesiligia e le Samoa News le afioga a Satele po o ai o le itumalo o Tualatai lea ua ia filifilia na te fa’aauauina le tofi, na saunoa le Alo o Salamasina e fa’apea, “O le afioga i le Sa’o ia Tuiasina Sosene Esera lea ua ou tofia e avea ma Kovana Itumalo o le Falelima i Sisifo”.

 

O le taeao ananafi na fonoa ai le Falelima i Sisifo i le maota o Satele i Asotau, mo le tau sailiina o se tasi e avea ma Kovana Itumalo o le Falelima, lea fo’i sa fa’atumulia i fa’auluuluga ma ponao’o o itumalo ta’itasi o le Falelima.

 

O ulua’i saunoaga lava o le fono ina ua tatala le avanoa mo tuleiga ma saunoaga, ina ua mae’a ona fa’afeiloaia le mamalu o le Falelima i le saunoaga a le susuga i le Tama Matua, le afioga i le Senatoa ia Tuiagamoa Tavai, na fa’atula’i ai e le afioga i le Sa’o ia Tuiasina Laumoli le mau ina ia lafo le tofi o le Kovana Itumalo ia Satele na te tauaveina, toe lava o ia le Fa’asuaga o le Falelima i Sisifo o lo o nofoa’i mai i le taimi lea, lea fo’i na lagolagoina uma e le Falelima.

 

Na fetalai le Tautootoo ia Savali Talavou Ale, le afioga i le Fofoga Fetalai o le maota o sui e fa’aleo lona lagolagoina o le mau ua fa’atula’i, ae afai e le taliaina e Satele le tofi, e talosaga atu i le Falelima ia ia lafo le tofi i le afioga i le Alala i Matuatala ia Fuamatu J.V Fuamatu mai le itumalo o Alataua, ua loa lana tautua, e fia tautua fo’i le itumalo o Alataua i le tofi, ae na saunoa le afioga i le Malu a le Fale, le afioga i le ali’i Senatoa ia Faiivae Godinet e fa’apea, na te lagolagoina le tofi ina ia tu’u atu ia Satele, ae afai e teena e Satele, ona toe liuliu lea o se tofa i le Falelima e saili ai se tasi na te tauaveina le tofi, ma ia fa’aluaina ai le suafa o le afioga a Fuamatu.

 

Na maua le avanoa o le afioga i le Sa’o, le afioga i le Senatoa ia Magalei Logovi’i na te lagolagoina ai le mau, peita’i afai e teena e Satele, ona lafo atu lea o le tofi e tauave e Tualauta, ua fia tautua fo’i lona itumalo.

 

I le saunoaga a Satele, sa ia taua ai e faapea, e sili ai pe a ia tauaveina uma tofi e lua e filemu ai le Falelima, o le tofiga o le Senatoa atoa ai ma le Kovana Itumalo, ae i le si’ui o lana saunoaga, sa ia fa’afetaia ai le Falelima mo le fa’aaloalo, ae sili pe a saili se tasi na te fa’aauauina le tofi.

 

O le mae’a ai o le tuleiga a Satele, na talosaga ai loa Tuiagamoa ina ia lafo atu le tofi e toe fa’aauau e le itumalo o Leasina/Aitulagi, ina ia fa’amae’a lelei ai le taimi sa tauave mai ai e Lualemaga le nofoa, peita’i na fa’aoloolomaau Savali ina ia lafo atu le tofi ia Alataua e nofoia e Fuamatu, lea fo’i na lagolagoina e Faiivae, ae fa’ai’u ai i le toe talosaga mai o Magalei ina ia lafo atu le tofi e fa’aauau e Tualauta.

 

Ina ua le maua se tasi o le tofa saili mo se isi na te nofoia le nofoa, na lafo atu ai loa e Tuiagamoa le fa’aiuga e saunoa i ai Satele, ma saunoa ai loa le afioga i le Alo o Salamasina e fa’apea, “O le fa’aiuga lenei, pe tou te taliaina pe leai, ae o le fa’aiuga lea o le a tu’uina atu, taoto mai le tofi o le Kovana Itumalo e fa’aauau e lo’u itumalo o Tualatai, ae o le isi nofoaiga i le lumana’i, o le a tatala atu i le tatou Falelima”.

 

Na fa’auilavea Savali ma ia saunoa e fa’apea, o se mea matavale tele lea ua faia e Satele, o lona teena o le tofi sa lafo atu ia te ia ao lea ua ia finagalo e lafo atu le nofoa i lona itumalo. Na taua e Savali lona le fiafia i le fa’aiuga ua faia e Satele, atoa ai ma lana folafolaga sa tu’uina atu, e le uma ai ii le mataupu, ae na fa’aoloolomaau Tuiagamoa ma saunoa e fa’apea, “O le fa’a Samoa, e saunoa loa le Sa’o o le aiga i se fa’aiuga, o le iuga lena, pe fiafia i ai le aiga pe leai, o le iuga lava lena, o le fautuaga, tatou talia le fa’aiuga ua saunoa i ai Satele, pe sa’o pe leai, tatou talia, o loo silasila le Atua, e fifi lava i luga ia Satele lana fa’aiuga ua faia, aua e oo fo’i ia te a’u, ou te le o fiafia fo’i i le fa’aiuga, ae ua talia lava ona o le tatou va fealoa’i ma le tatou va nonofo fa’a Samoa”.

 

Sa fa’aauau pea le saunoaga a Savali e fa’ailoa ai lona le lagolagoina o le fa’aiuga a Satele, ma ia taua ai lona fa’anoanoa tele i le finagalo o Satele e tu’u le tofi i lona itumalo, e ui o lea ua ia le taliaina le fa’aaloalo sa lafo atu i ai na te tauaveina le tofi.

 

Na fa’afetaia Fuamatu le mataupu e pei ona finauina e Savali, atoa ai ma le fa’aiuga ua tu’uina mai e Satele. Saunoa Fuamatu e fa’apea, e le taua le tofi ae taua le tautua i le atunu’u. Sa fa’aleo fo’i e Magalei lona finagalo e fa’afetaia ai tofiga a Satele, atoa ai ma lona naunau ina ia nonofo filemu le Falelima, ae aua ne’i avea lo latou nofoaiga ma taimi e sili ai ona feaina’i le Falelima.

 

Sa ia fautuaina fo’i Savali ina ia tuutuu loloto le tofa ma le fa’autaga, ma ia silasila mamao i lo latou va nonofo ma Fa’asuaga o le itumalo. Na fa’amanatu fo’i e Magalei ia Savali lona tulaga, o ia o le Fofoga Fetalai o le maota o sui i le Fono Faitulafono a le atunu’u, o a lelei ma leaga, e lafo uma atu lava ia te ia o le ta’ita’i.

 

E ui na taape le fiafia ni isi o sui o le Falelima ina ua mae’a le fonotaga, ae o le itu taua e pei ona saunoa Satele, ua mae’a ona faia tofiga mo le Itumalo.