Ua fa’amaonia mai e le Asosi o Fusuaga a Amerika Samoa (ASBF) le toe taliu mai o se tasi o alo o Samoa ua lauiloa i le Pasefika i le ta’aloga o le fusuaga, susuga a Petelo Matagi i laufanua na fa’afailele atu ai lana taleni fusu, ina ua amata ona le toe amanaiaina o ia e le Asosi o Fusuaga a Samoa (SABA).

E ui o se tala e lagona ai le fa’anoanoa pe a mafaufau atu i le tulaga sa i ai le tautua a lenei alo o Samoa, i lona si’i maualuga lea o le igoa o lona atunu’u pele o Samoa i soo se taimi e fai ai o ia ma sui o le atunu’u i ta’amilosaga fa’avaomalo, peita’i na taua e sui o le ASBF i le Samoa News lo latou talia ma le agaga fiafia o le toe fo’i mai o Matagi i laufanua na fa’afailele atu ai lana taleni.

I se fa’atalatalanoaga a le Samoa News ma le sui peresetene o le ASBF, susuga Okesene T. Malala, o ia fo’i o se tasi o Faiaoga, fa’apea ai ma le afioga a Sala Sanele Etuale, o le isi fo’i lea Faiaoga Sinia, sa la taua ai le sauni o Matagi e fusu mo Amerika Samoa i se taimi e le o toe mamao, pe afai ae mautu le fa’agasoloina o ona pepa e tusa ai ma Tulafono tau Femalagaaiga.

“O iinei na amata fa’afailele atu ai le olaga fusu o Matagi a o laititi lava o ia, sa fai fo’i o ia ma sui o Amerika Samoa i ni isi o ta’amilosaga fa’avaomalo e aofia ai fusuaga i le va o Samoa ma Amerika Samoa, ae talu ai fuafuaga fa’aleaiga i na fo’i vaitaimi, na mafua ai loa ona toe malaga atu o ia i lona aiga i Samoa ma aumau ai ma fusu ai loa i lalo o le fu’a a Samoa”, o le saunoaga lea a Sala, le faiaoga sa ia fa’a faileleina mai le olaga fusu o Matagi.

A o fusu ai Matagi mo Samoa, e tele ni matati’a na mafai ona ausia e lenei alo fusu o le atunu’u, e pei o le avanoa na ia maua e fai ai ma sui o Samoa i Ta’aloga a le Olimipeka i Rio i le 2016, ma lona fa’ato’ilaloina ai o le siamupini a Tonga sa manumalo i le pine siliva i ta’aloga a Malo o le Taupulega i le tausaga fo’i na te’a nei (2016 Commonwealth Games), le ali’i o Kanongata’a Atonio i le tu’ioti (TKO), ma ia manumalo ai i le fusuaga sa fa’aigoaina o le “Battle in the Pacific” i le tausaga na te’a nei.

E ese mai i matati’a e pei ona taua i luga sa ausia e Matagi, sa ia manumalo fo’i i le tele o pine mo Samoa e aofia ai pine auro mai ta’amilosaga eseese a le Pasefika fa’apea ai Malo o le Taupulega, ae o le tausaga na te’a nei ina ua ese le silasila a le SABA i le tulaga o le taleni a lenei alo fusu o le atunu’u, na ia filifili ai loa e toe fo’i mai i Amerika Samoa e fa’aolaola atili ai lana taleni, e pei ona saunoa Sala.

“O lea la ua toe fo’i mai Matagi i laufanua na amata fa’afailele atu ai lana taleni, ma ua ma fiafia fo’i ma le susuga i le ali’i faiaoga ia Malala e talia o ia ina ia matou koleni fa’atasi”, o le saunoaga lea a Sala.

Ae na saunoa Malala e fa’apea, e le na o Matagi le alo fusu o Samoa ua tupu ai le fa’afitauli lea, ae sa a’afia ai fo’i le isi alo fusu o Samoa ua tele tausaga o fai ma sui o Samoa i ta’aloga fa’avaomalo, a o lea ua malaga mai ma fusu mo Amerika Samoa, le susuga ia Kaisa Ioane.

Na taua e Malala e fa’apea, na fa’ateia le Asosi o Fusuaga a Samoa ina ua malaga atu Ioane i le ta’amilosaga a le Samoa Games sa faia i Apia i le masina o Tesema o le tausaga na te’a nei i lalo o le fu’a a Amerika Samoa, ma ia manumalo ai i le pine auro ina ua ia fa’ato’ilaloina le to’atele o tama fusu lelei mo Samoa.

Na toe pine auro fo’i Ioane i le ta’amilosaga a le Pasefika lea na talimalo ai Samoa i le masina o Fepuari o le tausaga nei, lea na aofia ai aufusu mai isi atunu’u e pei o Ausetalia, Fiti, Niu Sila, Tonga ma Samoa, ina ua ia fa’ato’ilaloina le to’atele o ali’i fusu lelei e aofia ai le ali’i Ausetalia sa la sailia le pine auro.

O le masina o Iuni o le tausaga nei lea ua fa’amoemoe e malaga atu ai Ioane e fai ma sui o Amerika Samoa i le ta’amilosaga a le Oceania i Ausetalia, ma ua molimauina fo’i le si’itia o le tulaga ua i ai lana tapenaga i le taimi nei.