Ads by Google Ads by Google

Toe fasi fa’amo’amo’a fo’i le isi ali’i pagota i totonu o le Toese


Le ali’i o Muaiga Siatiu poo Povi fo’i e pei ona iloa ai o ia e le to’atele. [ata AF]
ausage@samoanews.com

E silia laititi lava ma le vaiaso talu ona tuana’i le fa’alavelave lea o lo o tu’uaia ai ni ali’i pagota se to’alua, i lo la fa’ao’olima lea i se isi ali’i pagota i totonu o le toese, a o lea fo’i ua toe tula’i mai le isi fo’i fa’alavelave ina ua fasi fa’amo’amo’a e ni ali’i pagota se to’alua se isi fo’i ali’i pagota ma manu’a tigaina ai ona foliga.

 

E le matuia tele manu’a na a’afia ai le ali’i pagota na a’afia i le fa’alavelave muamua, le susuga ia Larry Samatua, peita’i o le fa’alavelave lea na tula’i mai i le aoauli o le aso Lulu o le vaiaso nei, ua matua molimauina ai le tuga o manu’a na a’afia ai le ali’i pagota na a’afia ia Muaiga Siatiu.

 

O le aso Gafua o le vaiaso nei ina ua tula’i Siatiu i luma o le fa’amasinoga fa’aitumalo mo lana ulua’i iloiloga, e mafua mai i se fa’alavelave o lo o tu’uaia ai o ia, sa maitauina e le fa’amasinoga ona foliga aulelei, peita’i ina ua toe tula’i o ia mo lana iloiloga lona lua i le taeao ananafi, sa vaaia ai e le fa’amasinoga se suiga i ona foliga, e le gata i le saisai o lona ulu i le ie pa’epa’e a le falema’i, ae o lona mata taumatau e tau le pupula ona o loo fula.

 

O manu’a i le tino o Siatiu e aofia ai se ta’e i le itu taumatau o lona ulu, lea sa mana’omia ai filo e 3 e toe tapuni ai lea manu’a, ma se ta’e i le pito i lalo o lona mata agavale, lea fo’i na mana’omia ai ni filo se 4 e tapuni ai lea manu’a.

 

O le matuia o manu’a na a’afia ai Siatiu atoa ai ma le le toe malupuipuia o lona saogalemu i totonu o le toese, na talia ai loa e le afioga i le Tama’ita’i Fa’amasino ia Gwen Tauiliili-Langkilde le talosaga a le ua molia, ina ia aua ne’i toe taofia o ia i le toese i Tafuna, ae saili se isi nofoaga e taofia ai o ia e fa’atalitali ai taualumaga o lana fa’amasinoga.

 

O le fa’alavelave na mafua ai ona manu’a Siatiu na tula’i mai i le aoauli o le aso Lulu na te’a nei, ina ua fa’atonu e le Leoleo o le Falepuipui o ia ma isi pagota sa ta’aalo i fafo e taofi loa a latou ta’aloga ae toe aga’i i totonu o a latou potu o lo o taofia ai o ia.

 

Na taua e Siatiu i le Samoa News e fa’apea, a o la savavali fa’atasi ai ma le ali’i Leoleo e aga’i atu i totonu o le fale o loo taofia ai i latou, sa fa’afuase’i ona savali atu le ali’i pagota o Joe Palagi ma palauvale atu ia te ia, ma fai atu e tu’u le faifaiaga ae tasi le fa’atonuga ma usita’i.

 

O le ali’i o Joe Palagi, o le isi lea igoa o le ali’i o Mosegi Solia Jr, lea na ta’usala e le fa’amasinoga maualuga fa’atasi ma isi ali’i e to’atolu i le fa’alavelave lea na tafana ai le Ofisa o Leoleo i Leone, ae o lo o taofia pea i le toese ona o le mataupu i le umia fa’asolitulafono o fualaau fa’asaina o lo o tu’uaia ai o ia e le malo.

 

O le matuia o palauvale na lafo e Joe Palagi ia Siatiu, na mafua ai loa ona tali i ai le ali’i na a’afia ma fai i ai, e soia le le mafaufau, e le na o ia fo’i se pagota e ulavale.

 

“Ou te ulufale loa i totonu o le potu o lo o loka ai a’u ae fa’ateia loa a’u ina ua tu’i a’u e Joe Palagi, o lea na ma fufusu ai loa seia oo i le taimi na alu ai i le atoa i le isi potu ma aumai le isi ali’i pagota e igoa ia Reti, ma la au fa’atasi ai loa i le fasiga o a’u”, o le fa’amatalaga lea a Siatiu i le Samoa News.

 

Sa ia taua fo’i e fa’apea, na fa’aaoga e ali’i pagota e to’alua na fasia o ia se nofoa e sasa ai ona foliga, ma mafua ai loa ona ia manu’a. O le mae’a ai o le fa’alavelave na auina atu ai loa Siatiu i le falema’i mo togafitiga.

 

Na fa’amaonia e le loia a Siatiu o Douglas Fiaui i luma o le fa’amasinoga le mae’a lea ona faila o le tagi a le ua molia i le Ofisa o Leoleo e tusa ai o le fa’alavelave sa tula’i mai, ae na taua e le loia a le malo e fa’apea, o lo o i ai le su’esu’ega o lo o faia e uiga i lenei mataupu.

 

E talitonu le Samoa News, ua taofia nei Siatiu i le potu taofia o lo o i ai i le Ofisa autu o Leoleo i Fagatogo, e fa’atalitali ai taualumaga o lana mataupu.