Na si’isi’i le si’ufofoga o le afioga i le ali’i Fa’amasino ia Elvis P. Patea i le aso Lulu na te’a nei, a o ia fesiligia loia i le mafua’aga ua tuai ai ona fa’amautu taualumaga uma o le mataupu fa’asaga i ali’i e to’afa mai le pisinisi o Le Aute, lea o lo o tu’uaia i le fa’alavelave lea na tafana ai le lala o le Ofisa o Leoleo i Leone i le fa’aiuga o le tausaga 2014.

Na taua e Patea i loia a le malo fa’apea ai loia e to’afa o lo o tula’i mo i latou e to’afa o lo o tu’uaia e fa’apea, o le vaiaso nei lea na fa’atulaga e faia ai le fa’amasinoga autu o le isi to’atasi o le to’afa lea, a o lea fo’i ua toe tolopo, ma ua umi ai ma le taimi e toso ai i tua le fa’agasoloina o le iloiloina o nei mataupu.

“O lea ua uma ona fa’atulaga e le fa’amasinoga le aso 6 Tesema 2016 e faia ai fa’amasinoga autu o ali’i uma nei e to’afa, e tatau ona o o atu i le aso lea ua mae’a tulaga uma e mana’omia ma fa’ataunu’u loa le fa’amasinoga autu”, o le saunoaga lea a Patea i loia ma lona si’ufofoga ua si’isi’i i luga.

“Ou te le mana’o e o o atu i le aso lea ae outou o mai ma fa’apea mai i le fa’amasinoga e le i sauni outou mo le fa’amasinoga”.

O ali’i e to’afa mai le pisinisi a Le Aute o lo o tu’uaia i le tafanaina o le Ofisa o Leoleo i Tafuna e aofia ai Manu Lefatia, Sinapati Tu’ufaanatu, Tuliese Taliu ma Solia Mosegi Jr, lea o lo o tu’uaia i moliaga mamafa e lua o le fesoasoani lea e fa’atino le moliaga o le fa’aoolima i le tulaga lua, atoa ai ma le fesoasoani e fa’atino le moliaga o le faaleaga meatotino i le tulaga muamua.

E ese mai i moliaga e pei ona taua, o lo o tu’uaia fo’i e le malo ia Mosegi Jr i le moliaga mamafa o lona umia fa’asolitulafono o vaega o le pauta fa’asaina o le aisa, atoa ai ma le moliaga mama o le tete’e i leoleo a o taumafai e pu’e fa’apagota o ia, e mafua mai ina ua pu’e fa’apagota e Leoleo o ia e mafua mai i le fa’alavelave lea na tafana ai le Ofisa o Leoleo i Leone, ae maua ai e leoleo ia te ia se vaega o le pauta fa’asaina o le aisa, i le mae’a ai lea ona faia o se latou tuliga ma Leoleo.

O le aso Lua o le vaiaso nei na fa’atulaga e faia ai le fa’amasinoga autu a Mosegi Jr mo le mataupu o lo o tu’uaia ai o ia i le umia fa’asolitulafono o fualaau fa’asaina, peita’i ua toe tolopo lea fa’amasinoga autu, ona o ni isi o mataupu fai mai Loia e le i mautu mo le fa’amasinoga.

O le mae’a ai la o le iloiloga sa faia i le vaiaso nei e uiga i lenei mataupu, na poloaia ai loa e le fa’amasinoga loia ina ia sauni e fa’ataunu’u le fa’amasinoga autu i le aso 6 Tesema mo le mataupu e fa’atatau i le tafanaina o le Ofisa o Leoleo i Leone, sosoo atu ai lava ma le fa’amasinoga autu o le mataupu o lo o tu’uaia ai Mosegi Jr i lona umia fa’asolitulafono o fualaau fa’asaina o le pauta.

Na fa’amaonia e loia a itu e lua i luma o le fa’amasinoga, lo latou tauaaoina uma o mau fa’amaonia o le mataupu, ma ua latou sauni mo le fa’amasinoga.

Afai e i ai ni isi talosaga mai loia a i latou o lo o molia e toe fia fa’aulu i luma o le fa’amasinoga, ua poloaina e Patea le tatau lea ona faila uma ia talosaga i le aso 14 Novema, ae o le aso 18 Novema e tatau ona o o atu i ai ua mae’a ona faila e le malo sa latou tali e tusa ai o ia talosaga, ona fa’atulaga ai loa lea o le iloiloga i le aso 25 Novema e finauina ai talosaga a itu e lua.

O le aso 25 fo’i lea o Novema ua poloaina e le fa’amasinoga e tatau ona o o atu i ai, ua mautu uma lisi o molimau a itu a lua mo le fa’amasinoga, atoa ai ma isi uma mau fa’amaonia e manatu itu e lua e fa’aaoga i le taimi o le fa’amasinoga.

“Afai fo’i e i ai se maliliega e fuafua itu e lua e faia a o lumana’i ai le aso o le fa’amasinoga autu, e tatau ona faila uma fa’amatalaga mo ia maliliega i le aso 25 Novema, e le toe i ai se isi poloaiga e toe tu’uina atu e le fa’amasinoga e ese mai i le poloaiga lenei”, o le saunoaga fa’ai’u lea a Patea.