Ads by Google Ads by Google

Te’ena le “GEO Explorer” va’a euesue mo le Tui Samoa Cable


O le va’a lea o lo’o fa’atautaia nei le suesuega fa’apitoa o le alititai o Tutuila ma Manu’a pe agava’a mo le ta’atia ai o le uaea o feso’ota’iga i le poloketi mo fesootaiga, ua fa’aigoaina “Tui Samoa.” [ata: foa’i Polynesia Shipping]

I le aso Tofi na te’a sa ulufale mai ai le va’a su’esu’e “Geo Explorer” mo le galuega e sailia le alititai po’o agava’a mo le fa’ata’otoga o le Tui Samoa Submarine Cable mo feso’ota’iga tau telefoni, uaealesi ma le Initeneti i le va le Atu Samoa, Fitti, Wallis ma Futuna, ma Tuvalu e ao ina feso’ota’i ma Ausetalia, Niu Sila ma Iunaite Setete.

 

I le to’ai taunu’u mai o le Geo Explorer, sa fa’ailoa mai le tulaga le fiafia o le Harbor Master Silila Patane, aua e ulufale mai fo’i, e leai se fu’a a Amerika Samoa, ua tapena e le Kamupani Va’a o lo’o latou tautuaina lea va’a iinei, le Kamupani a le Polynesia Shipping.

 

Peita’i, na fesiligia le pulega o le Kamupani va’a lea ma sa fa’ailoa mai, “O lea mataupu ua mae’a soalaupule i le taimi na to’ai taunu’u mai ai le va’a, ma iloa ai ua vave mai le Geo Explorer nai lo le taimi sa atofa e fetaui ai matou ma avatu le Agiagia a le tatou Malo mo le latou ulufale mai. E tusa ma le itula ma le afa na vave mai ai, nai lo le taimi sa fa’ailoa mai e matou te fetaui ai mo lea fa’amoemoe. Peita’i, sa fa’afaigofie le mataupu ona sa i ai le Agiagia a le Malo Tele o Amerika ma sa fa’ataga ai loa e le tatou Harbor Master e fa’alele le fu’a lea e ulufale mai ai ma taua’ao aloa’ia ai loa i ai le fu’a a Amerika Samoa.”

 

Ina ua fesiligia fo’i e tusa o le galuega mo lo’o lisia mai e ao ina fa’atautaia e le “Geo Explorer” i o tatou gataifale, ae fa’ailoa mai, “O le suesuega lea i le mamao ma le umi e ono fa’atino ai le galuega o le fa’ata’atitiaga o uaea o feso’ota’iga i le alititai o le gataifale o malo nei ua mae’a fa’amaonia lo latou auaufa’atasi e fa’aaoga e i latou le Tui Samoa Cable mo feso’ota’iga nei.”

 

E le o mailoa e le Polynesia Shipping i latou na talanoa vavalalata ma le sui na malaga mai fa’apitoa mo talanoaga e tusa o le lua vaiaso ua tuana’i a’o le’i malaga mai le “Geo Explorer” ina ia fa’ataunu’uina le suesuega fa’apitoa lenei.

 

Ua fa’ailoa mai e lea sui iloga o le tatou Pulega o le Uafu i le Taulaga, “Ia alofagia e le o se malo e fa’asamasamanoa ona faia galuega lenei malo o Amerika Samoa, e i’u ina fa’afalepuipuia se kapeteni o se va’a pe sala tupe loa ma le Kamupani Va’a o lo’o faia so’otaga uma a va’a e aga’i ma ulufale mai i le Uafu tele i Pago Pago, ae leai se Fu’a a le Malo o Amerika Samoa e agiagia mai ai. Ua tauau ina tele va’a e faia lea masani. Ua tolu ai lenei o va’a e faia lea tulaga a’o le’i ulufale mai i le tatou Uafu tele ma fa’asala lava e le Harbor Master ona e le o agiagia mai le Fu’a a Amerika Samoa i ona la.”

 

O isi va’a e lua, o va’a fagota. Peita’i, ua fa’asala lava i le taula i fafo atu o le Uafu e le fa’aulufale maia mo sailiiliga a le Tiute ma so’otaga o pepa fa’amaumau e ao ina fa’atautaia pe a ulufale mai va’a i le taulaga.

 

Peita’i, ua saunoa mai le susuga le Harbor Master, “O le a taga’i toto’a mo le isi taimi e toe tupu ai, e fa’asala le va’a toe fa’asala ma le Kamupani Va’a o lo’o avea ma so’otaga a lea va’a i le tatou malo fa’alotoifale. Ua i ai fo’i le lisi o tulafono e ao ina utagia e va’a uma, ma e tatau lava ona usita’ia nei tulafono uma pe afai o le a afea pe sauni fo’i e aga’i mai i totonu o le ogasami ma le Uafu o lena atunu’u.

 

O se mea lelei, ina ua feso’ota’i atu Patane i lea va’a, ae saillie ane, o lo’o i ai le fu’a a Amerika i totonu o latou sapalai o Fu’a o malo ta’itasi, ma sa fa’aaogaina loa e agai mai ai i totonu o le Uafu.

 

O le Geo Explorer o se va’a e aga’i mai le malo o Dominican Republic, peita’i o lo’o fa’afaigaluega i galuega o lo’o agavaa ai ina ia faia suesuega tau le alititai o le gataifale, aua o loo aofia ai i luga ituaiga o masini e mafai ona sailia ai faapitoa ai le alititai.

 

Na mua’i taula le Geo Explorer i le Uafu Suau’u i lea lava taeao o le aso Tofi na te’a nei. E tusa ai o fa’amaumauga ua maua mai i le Poloketi o Feso’ota’iga o le Tui Samoa, o lo ua mae’a ona vala’aulia fa’apitoa Amerika Samoa ina ia auai e avea ma se isi atunu’u e feso’ota’i i lea fo’i auaunaga, ae o le Malo o Tuvalu le tasi malo ua faailoa mai e naunau i latou ina ia avea ma se isi o lea vaega o malo e fia feso’ota’i i le Tui Samoa.