Ads by Google Ads by Google

Tatala alaoaia le “solar system” mo le Luanu’u i Manu’a


Le taimi na tauaao ai e le afioga i le ali’i kovana ia Lolo Matalasi Moliga le meaalofa mai le peresetene o le Konekarate a le Pacific Innovations, Inc sa latou fausia le galuega o le solar system i Ofu, susuga John C. Miller. [ata AF]

Tama fanau a Ofu, Olosega ma Sili na fesoasoani i le fausiaina o le galuega a le solar system i Ofu: Wayne Eliu, Leitufia Ili, Aaron Mekuli, Lindel Moliga, Tupou Utuone, Mikaele Taua'i, Fuanu'u Sitaua, Pulou Tauanu'u, Naisina Aloese, Taimietasi Isaako. [ata AF]
ausage@samoanews.com

O le taeao ananafi na molimauina ai e Ta’ita’i o le malo fa’apea le mamalu o le Luanu’u i Ofu ma Olosega/Sili le tatalaina o se tasi o galuega tele i ona laufanua, o le galuega lea sa fausiaina e le Pulega o le Eletise ma le Suavai a Amerika Samoa (ASPA), e fa’aaoga ai le malosi o le La e maua ai le eletise.

 

O lenei galuega sa fausia e le Konekarate a le Pacific Solar Innovations, Inc, i lalo o le ta’ita’iga a le susuga John C Miller, o ia lea o le Peresetene o le Konekarate.

 

O se sauniga puupuu na taitaia Rev. Elder To’oto’o Seanoa mai le Ekalesia EFKAS mai Ofu e tatala aloaia ai le sauniga, ona sosoo ai loa lea ma saunoaga faapitoa o le aso, lea na saunoa i ai le afioga i le ali’i kovana ia Lolo Matalasi Moliga, o le susuga a Miller, fa’apea le Pulesili o le ASPA, le afioga i le Matua ia Utu Abe Malae.

 

E tusa ma le $2.5 miliona le tau atoa o lenei galuega, lea sa fa’atupe mai e le Initeria le $1.3 miliona ae fa’atupe e le ASPA le isi $1.2 miliona e pei ona fa’amanino e Utu i lana saunoaga.

 

Na fa’afetaia e Utu le lagolago a le Luanu’u mai lava i le amataga o lenei galuega seia oo mai i le taimi na mae’a aloaia ai, e le gata o le tausiga o le aufaigaluega ae o le fesoasoani fo’i i le fa’aleleia atoa ai ma le fa’atinoina o ni isi o vaega sa moomia i le galuega.

 

E tusa ma le 80% o lenei galuega ua mafai ona maua mai ai le eletise ma le malosiaga o le La, ae o le isi 20% o lo o fa’aaogaina ai pea le suau’u, ma le fa’amoemoe e tatau ona oo atu i le tausaga fou ua 100% le ola o le eletise i Manu’a atoa i le malosiaga mai le La.

 

I le saunoaga a le afioga i le ali’i Kovana, sa ia toe fa’atepa ai le amataga o lenei galuega, ina ua la fa’asoa ma le afioga ia Utu i le amataga o le tausaga e 2013, ma ia talanoa i ai i le fa’afitauli o loo fetaia’i pea ma le atunu’u, o le taugata lea o le tau o le eletise, ma ua avea ma mafu’aaga ua tele ai fa’afitauli ua fetaia’i ma tagata.

 

“Sa ou le mautonu pe toe fia fo’i mai Utu e tautua i le ASPA i le taimi lea, peita’i sa ou talosaga i ai ina ia fesoasoani e saili se auala e mafai ai ona fa’ataugofie le tau o le eletise i le atunu’u, ae ina ua talia e Utu la’u talosaga ma ia fa’ailoa mai lona naunau e toe fia tautua i le ASPA, sa ou tofia ai loa ma le Komiti Fa’afoe e i ai le tomai i auala e fesoasoani ai i le fa’ataugofieina o le eletise”, o le saunoaga lea a Lolo.

 

Sa ia fa’afetaia le aufaigaluega atoa sa galulue i le fa’atinoina o lenei galuega tele, lea ua mafai ai ona tino le fa’amoemoe e pei ona naunau i ai le malo.

 

Na taua e le peresetene o le Konekarate sa gafa ma le fausiaina o lenei galuega ia Miller le tele o le tomai ma le agava’a ua mafai ona maua e tama fanau a le atunu’u na auai i le fa’atinoina o lenei galuega, ona o le avanoa sa mafai ai ona latou galulue fa’atasi ma ali’i mai fafo sa fa’atinoina le galuega.

 

O le faletua o le susuga Rev. Elder Seanoa ma le faletua o le afioga i le ali’i senatoa ia Misaalefua J. Hudson na ootiina le lipine, ma fa’ai’u ai loa i meaalofa na mafai ona foa’i atu e le Konekarate i le afioga i le ali’i kovana, fa’apea ai fo’i ma isi sui e pei o le afioga a Utu le pulesili o le ASPA.

 

I le agaga fa’afetai o le ASPA i le Luanu’u e tusa ai o lenei galuega tele, na foa’i ai loa e le ASPA le meaalofa tupe e $10,000 mo Ofu e tusa ai o lo latou fesoasoani i lenei galuega tele.