O le mae’a ai o le fonotaga a le Litaea lea sa usuia i le setete o Hawaii i le vaiaso na te’a nei, lea fo’i na fa’atasi atu i ai sui o Komiti a maota e lua o le Fono Faitulafono a le atunu’u, na fa’atula’i ai loa e afioga i Senatoa ma Faipule se fautuaga ina ia si’i i le 15% le saofaga e totogi e tagata faigaluega totogi saofaga i totonu o le teugatupe, ina ia mautinoa e tupu ma malosi pea le teugatupe o le litaea a le malo mo le lumana’i.

O lea fautuaga e pei ona tu’uina atu e sui o le Fono Faitulafono, na fa’avae mai lea i le tulaga o loo i ai le teugatupe o le Litaea a le malo, e ala i le ripoti sa saunia e i latou o lo o vaavaaia ma tausia tupe inivesi a le litaea i maketi o fefa’atauaiga i fafo, lea ua latou valoia ai e fa’apea, afai e leai se suiga i le tulaga o loo i ai saofaga i le teugatupe i le taimi nei, o le a tula’i mai se tulaga fa’aletonu i le teugatupe i le isi 30 tausaga o lumana’i nei, poo se taimi fo’i o le 2040.

“O le ripoti lea na saunia e i latou o loo vaavaaia le teugatupe a le litaea e pei o le susuga ia William Reid ma William Down, na a’e ai loa se manatu i sui o le Fono Faitulafono sa malaga i lenei fonotaga ina ia ave se fautuaga i le Komiti Fa’afoe ina ia si’itia le maualuga o saofaga a tagata totogi saofaga o le litaea i le 15%, mai le 11% o loo i ai i le taimi nei”, o le saunoaga lea a le afioga i le ali’i faipule ia Vesi Talalelei Fautanu Jr, o se tasi lea o totino o le Komiti o le Litaea a le maota o sui na malaga i le fonotaga i Hawaii.

Saunoa atili le afioga a Vesi e fa’apea, e tele isi itu o loo vaavaai i ai le Komiti Fa’afoe a le Litaea fa’apea ai le Fono Faitulafono, i auala e fa’aleleia ai tulaga o le teugatupe o le litaea a le malo.

“O ni isi o itu o loo vaavaai i ai le Fono e pei ona tu’u atu ai fautuaga i le Komiti Fa’afoe, ia vaavaai i le gafatia lea e tagata totogi saofaga ona totogi le si’i lea ua fa’amoemoe e sii i ai saofaga a tagata faigaluega i le taimi nei, ina ia aua ne’i avea ma avega mamafa i tagata faigaluega le tipi o le saofaga o le litaea, ae o loo tele foi isi vaega tupe o loo tipi mai i le siaki e pei o le lafoga e 2% o loo tipi mo le falema’i o le LBJ, atoa ai ma vaega tupe masani o loo tipi i taimi uma e maua ai siaki a tagata faigaluega”, o le saunoaga lea a Vesi.

Na taua e le afioga i le ali’i Faipule mai Manu’a #1 e fa’apea, e le faigofie le mataupu e fa’atatau i le si’itia lea o le pasene o le saofaga e totogi mo le litaea, ina ia mama ai le avega mo tagata faigaluega.

“E taua le vaavaai i auala e si’itia ma fa’aleleia atili ai le teugatupe o le litaea a le malo i le lumana’i, ae tatau fo’i ona vaai alofa le malo i le soifua manuia o tagata faigaluega”, o le saunoaga lea a Vesi.

O le mae’a ai o le fonotaga sa faia i Hawaii, na fa’aalia ai loa i ripoti le tulaga lelei o loo i ai le teugatupe o le litaea a le malo i maketi o fefa’atauaiga i fafo, e na o Amerika Samoa lava i le pasefika atoa o loo lelei ma malosi lana teugatupe o le litaea, e pei ona saunoa Vesi.

Sa ia taua atili fo’i e fa’apea, talu ai o loo tu’u fesili ni isi o tagata totogi soafaga o le litaea i le tele o tupe o loo fa’aalu mo malaga i fonotaga i Hawaii, ae sili ai pe a aumai fonotaga e faia i Amerika Samoa, na te fia fa’ailoa e fa’apea, e sili atu le taugofie o fonotaga a le litaea pe a fai i Hawaii nai lo le aumai e usuia i Amerika Samoa nei.

O le a mafai ona talanoaina atili e senatoa ma faipule isi tulaga e fa’atatau i le ripoti a le litaea, pe afai ae toe tauaofia galuega a le Fono Faitulafono i le aso Gafua, Mati 13, i le mae’a ai lea o lana malologa e 3 vaiaso o loo fa’agasolo i le taimi nei.