Ads by Google Ads by Google

Taoto atu i se fa’aiuga Fa’amasinoga le talosaga Ekalesia EFKAS

ausage@samoanews.com

Ua taoto atu nei i se fa’aiuga a le Vaega Iloilo o le Fa’amasinoga Maualuga a Amerika Samoa le talosaga a le Ekalesia Faapotopotoga Kerisiano i Amerika Samoa (EFKAS), e talosagaina ai se fa’aiuga a le fa’amasinoga e fa’aleaoga ai le talosaga lea ua fa’aulu e le itu a le susuga i le ali’i Faifeau ia Rev. Amaama Tofaeono, fa’asaga i le Ekalesia ma le susuga ia Rev. Elder Fa’aeteete Saifoloi.

 

O le vaiaso na te’a nei na fa’afofoga ai le fa’amasinoga i fa’afinauga a itu e lua fa’asaga i lenei mataupu.

 

O le afioga i le ali’i fa’amasino ia Elvis P. Patea o lo o iloiloina se fa’aiuga o lenei mataupu, ae lagolagosua i ai afioga i Fa’amasino Lagolago ia Suapaia Pereira ma Satele L. Ali’itai.

 

O le ali’i loia ia Toetasi Tuiteleleapaga o lo o tula’i mo Rev. Amaama ma lona faletua, ae o Gwen Tauiliili-Langkilde o lo o tula’i mo le Ekalesia EFKAS, o le Ta’ita’ifono ia Rev. Elder. Eveni Mamoe, Rev. Elder Fiti Aofia, ma Rev. Elder Leatulagi Fa’alevao.

 

O le talosaga a le EFKAS e fa’aleaoga le talosaga a le itu tete’e, na afua mai ina ua faila e le itu tete’e la latou fa’afinauga i le fa’amasinoga, fa’asaga i tu’uaiga ua fa’aleaga ai le suafa o le susuga a Rev. Amaama, o ia fo’i lea o lo o umia le tofiga o le Failautusi Aoao a le Ekalesia EFKAS, atoa ai ma le molimau a le ali’i faifeau ia Rev. Saifoloi sa tu’uina atu i luma o le fa’amasinoga e fa’atatau i le mataupu sa tula’i mai i le va o Rev. Amaama ma lona faletua, lea ua avea ma mafua’aga o le fa’aiuga a le Au Toeaiina e aveese ai le tofi Faifeau fa’au’u mai ia Rev. Amaama.

 

Na taua e le itu tete’e i le latou talosaga e fa’apea, o le autu atoa o le mataupu ua mafua ai le fa’aiuga a le Au Toeaiina fa’asaga ia Rev. Amaama, na mafua mai i le molimau a Rev. Saifoloi, ma faia ai loa le fa’aiuga ua ta’uleagaina ai le suafa o Rev. Amaama, e aofia ai le aveesea o lona tofiga o le faifeau fa’au’u atoa ai ma le tofi o le Failautusi Aoao, ae o tofiga ia e na o le Fonotele a le Ekalesia e i ai le malosi e aveese ai.

 

O lo o fa’aauau pea le fa’afinauga a le itu tete’e, e leai se malosi a le Au Toeaiina latou te aveesea ai le tofi o le faifeau fa’au’u mai ia Rev. Amaama poo lona tofiga o le Failautusi Aoao. O le tofiga foi o le Failautusi Aoao, o le tofiga na tofia faapitoa e le Fonotele a le Ekalesia mo le 4 tausaga.

 

Afai ae talia e le Faamasinoga le talosaga a le itu tete’e, lona uiga o le isi la’asaga o le mataupu a le Ekalesia EFKAS o le a sosoo ai nei, o le amata aloaia lea o le fa’amasinoga autu e saili ai fa’amatalaga ma tu’uaiga ua salalau solo fa’asaga ia Rev. Amaama.

 

I le talosaga a le itu tagi, na taua ai e le loia a le Ekalesia ia Tauiliili-Langkilde le tatau lea i le Fa’amasinoga ona fa’aleaoga talosaga ua tu’uina atu e le itu tete’e, ona o ituaiga mataupu ia e le au i ai le malosi o le Fa’amasinoga latou te iloiloina.

 

Na taua atili e le itu tagi i le latou fa’afinauga le leai o ni mau maumaututu e lagolagoina ai le tagi a le itu tete’e, aua o mataupu uma nei sa talanoaina i le taimi na iloiloina ai e le fa’amasinoga lenei mataupu, ma ua mae’a fo’i ona latou folasia tulaga uma e fa’atatau i le latou talosaga i le ulua’i taimi.

 

I le mataupu e pei ona taua ai le suafa o le ali’i faifeau ia Rev. Saifoloi ma lana molimau, na taua ai e le itu tagi e fa’apea, e le tatau ona aofia le suafa o Rev. Saifoloi i lenei mataupu, e le o i ai lona igoa i le lisi o tagata o lo o autu i ai le tagi.

 

Na siitia e itu e lua le tele o iuga o fa’amasinoga ua mae’a ona faia o lo o atagia mai ai mataupu e foliga tutusa ma le mataupu o lo o finauina i le va o le Ekalesia ma Rev. Amaama, e fesoasoani ai i a latou fa’afinauga.