Ua manino i le fa’aiuga a le Fa’amasinoga Fa’aitumalo Feterale i Honolulu le taliaina lea o le talosaga sa fa’aulu e le malo o Amerika Samoa fa’asaga i le Ofisa o le Puipuiga o Ogasami a le malo tele (NOAA), e fa’aleaoga ai le suiga sa faia ina ia fa’aitiitia le mamao o ogasami a le atunu’u e mafai ona fagogota ai va’a fagota lapopo’a, mai le 50 maila sa i ai i le 12 maila e pei ona suia i ai e le NOAA, tauala mai i le Komiti Fa’afoe e vaavaaia auala e fa’aleleia ai faiga faiva i le pasefika (WPFRMC).

I le fa’aiuga sa tu’uina mai e le afioga i le tama’ita’i Fa’amasino o le Feterale ia Leslie E. Kobayshi, ua ia teena ai suiga a le NOAA e pei ona faia, o le fa’ataga lea o va’a fagota lapopo’a e fagogota i totonu o le 50 maila i ogasami fa’asao o Amerika Samoa, le LVPA, lea sa na o va’a fagota alia sa masani ona fagogota ai.

O Mati 2016 na faila ai e le malo o Amerika Samoa lana tagi i luma o le fa’amasinoga feterale, lea fo’i na mafai ai e le NOAA ona faila lana tali i le tausaga ua te’a, ma amata ai loa le iloiloga o lenei mataupu i le aso 13 Fepuari 2017, lea fo’i na auai atu i ai le Loia Sili a le malo ia Talauega Eleasalo Ale, ma galulue fa’atasi ma loia a le malo ma isi i Hawai’i, mo le finauina o lenei mataupu.

Na taua e le malo o Amerika Samoa i lana fa’afinauga e fa’apea, o le gaioiga ua faia e fa’ataga ai va’a fagota lapopo’a ona fagogota i totonu o ogasami fa’asao a Amerika Samoa e 50 faila mai le matafaga, ua atagia mai ai le le usitaia o se vaega o le Feagaiga sa sainia e Amerika ma Amerika Samoa i le 1900, ina ia puipuia e le malo tele tulaga o ogasami ma faiga faiva i Amerika Samoa.

I le fa’aiuga o le talosaga a Amerika Samoa, sa talosagaina ai loa le fa’amasinoga ina ia fa’aleaoga le fa’aiuga sa faia e le LVPA i le 2016, ma ia tuuina mai se fa’aiuga a le fa’amasinoiga e atagia mai ai le soli o le Feagaiga sa sainia e puipuia ai_ ogasami ma faiga faiva i le teritori.

Ae na taua e le itu tete’e i le latou tali sa fa’aulu le i ai lea o le malosi ma le aia i le feterale e pulea ai ma fa’atonutonu tulaga uma tau faiga faiva i ogasami uma o loo i lalo o le pulega a le malo tele, lea e aofia ai setete ma teritori.

Na fa’amanino atili e le feterale i lana tali tulaga uma e fa’atatau i le maliliega sa sainia e Amerika ma ta’ita’i o Tutuila, Aunu’u i le 1990, atoa ai ma le Feagaiga sa sainia e Amerika ma ta’ita’i o Manu’a i le 1904, lea o loo taua ai vaega uma e pei ona taumafai Amerika Samoa e puipuia.

I le mae’a ai ona iloilo toto’a e le fa’amasinoga o fa’afinauga uma mai itu e lua e uiga i lenei mataupu, na fa’amanino ai loa e le tama’ita’i fa’amasino le taua tele o le tausisia o vaega ta’itasi uma o le Feagaiga sa sainia i le va o Amerika ma ta’ita’i o Tutuila ma Aunu’u, e aofia ai le puipuia o aia tatau o tagata, atoa ai ma le taumafai e puipuia ogasami ma faiga faiva.

Na talia e le fa’amasinoga le fa’afinauga a le itu tete’e e fa’apea, o Amerika Samoa o le teritori ae le o ni tagata na tupuga mai i Amerika, peita’i i le isi itu, e ioe le fa’amasinoga e tatau fo’i ia Amerika ona faia faaiuga talafeagai uma e atagia mai ai le amanaia o aia tatau o tagata Amerika Samoa.

Na taua e le fa’amasinoga le manino o aiaiga o le Feagaiga sa sainia i le va o Amerika ma Tutuila ma Aunu’u, ae maise Manu’a, lea e tatau ai ia Amerika ona fa’aaloalogia tulaga tau faiga faiva i motu e pei ona taua, ona o ni isi ia o ana tu ma aga masani sa soifua mai ai ona tagata mai le tele o tausaga ua mavae ao le’i sainia lenei Feagaiga.

I le mae’a ai la ona iloilo e le fa’amasinoga o aiaiga uma o lenei mataupu, na fa’amanino ai loa e le fa’amasinoga i lana fa’aiuga, e lei iloiloina e le itu tete’e tulaga uma e fa’atatau i le Feagaiga sa osia e Amerika ma Tutuila ma Aunu’u, ma Manu’a aemaise lava i tulaga o ana faiga faiva.

I le taliaina ai e le fa’amasinoga o le talosaga a Amerika Samoa, ua poloaina ai le fa’aleaogaina o le fa’aiuga sa faia e le feterale, ina ia faataga va’a fagota lapopo’a ona fagogota i ogasami fa’asao o Amerika Samoa e 50 maila le mamao.

I se tusi sa tu’uina atu e le afioga i le ali’i kovana ia Lolo Matalasi Moliga i ta’ita’i o le fono i le aso ananafi, sa ia taua ai lona fiafia tele ina ua mafai ona talia e le fa’amasinoga feterale le talosaga a le atunu’u e puipuia ai ona aia i tulaga tau faiga faiva, ina ua fa’amalieina le fa’amasinoga, e lei amanaia e le feterale tuutuuga ma aiaiga o le Feagaiga e puipuia ai faiga faiva a Amerika Samoa.

Na taua atili e le ali’i kovana i se pepa o fa’amatalaga sa ia tu’uina atu i le Fono Faitulafono, e manino o le fa’aiuga a le fa’amasinoga ua tu’uina mai, e fa’amalosia ai tuutuuga o le Feagaiga, e pei o le puipuia lea e Amerika o ogasami ma tulaga tau faiga faiva i Amerika Samoa.

“E taua tele i tagata Amerika Samoa vaega ta’itasi uma o le Feagaiga sa sainia e o tatou matua ma ta’ita’i o le malo tele i tausaga ua mavae, lea sa latou fa’atula’i mai ai se fa’avae malosi atoa ai ma se sootaga mautu ma le malo tele. E le fesiligia le puipuia lea e le Feagaiga o aia tatau o tatou tagata, sa lava ma totoe fo’i le tofa ma le atamai i o tatou tuaa i le taimi na latou sainia ai lenei Feagaiga, ina ia malu puipuia soifua ma ola o fanau i le lumana’i”, o se vaega lea o le saunoaga a Lolo.

Na taua e ni isi o afioga i Faipule i le taeao ananafi lo latou fa’afetaia o le faigamalo ma ona ta’ita’i, ona o le finau malosi e puipuia measina a le atunu’u o loo fa’alagolago i ai le soifua manuia o tagata i aso ta’itasi.