Ads by Google Ads by Google

Tala Vaifanua


O se va’aiga i sui o le Ofisa Mataupu Tau Samoa filifilia e avea ma Komiti Fa’afoe o le Liki Kirikiti o le Sisigafu’a 2017. O le a latou toe fono fa’atasi ma sui o ‘au e 13 a Alii i le aso ina ia faia le latou se’iga pepa e fa’ailo ai taimi e tata ai lea ‘au ma lea ‘au a’o fa’agasolo le liki lenei i le aso To’onai nei. [ata: Leua Aiono Frost]

‘MATI’ MASINA MO LE KOLUSE MUMU

 

O le masina o Mati o lenei tausaga e avea lava ma masina e fa’ataua ai le Le Koluse Mumu i le teritori ma Amerika atoa. O se mea sili sa taumafai mai i ai le American Samoa Red Cross i nei tausaga e 4 ua tuona’i, o le fa’amae’aina lea o le latou Fale Fou e avea ma Ofisa Autu o le Koluse Mumu i Tafuna.

 

Fa’ailoa mai e le Koluse Mumu, o le vaiaso lenei o lo ua fa’amautu atili ai e le Komiti Fa’afoe a le Koluse Mumu mea uma e ao ina tu’ufa’atasia mo le fa’atauaina o le American Samoa Red Cross Month - Mati 2017. Ua taumafai atili fo’i le Komiti Fa’afoe ia oo atu i ai, ua maa’a uma ona fa’atulaga le Maota fou ua tutula’i nei, mo gaoioiga a le Sosaiete lenei.

 

I le tamia nei, e le’i toe vaaia se sailiga tupe e ese mai atigi apa e momono i ai nai tupe i autafa o kesia i faleoloa e 200 i totonu o le atunu’u.

 

“Fa’afetai lava logologo mai, e moni lava, e itiiti sina foa’i, ae a tuufa’atasia ua maua ai se aotelega tele mo le fa’atupega fa’alotoifale o le tatou Koluse Mumu. O le a toe u’una’i atu fo’i la le tatou atigiapa mo foai i faleoloa i le teritori,” o se tala lea a le susuga Val Tuilefano, lea e avea ma ali’i Ofisa o le Koluse Mumu i Amerika Samoa.

 

Ina ua fesiligia se aso e tatala ai le Ofisa fou, ae fa’ailoa mai, “Masalo lava o le masina o Mati o lenei tausaga e tatau ona tatala ai, peita’i e tu’u pea lava i finagalo ma se fa’aiuga patino mai le Komiti Fa’afoe i le latou fonotaga o loma nei i le fa’aiuga o lenei vaiaso.”

 

E ese mai lea, o mea o le a fa’atautaia i lea masina fa’apitoa, o le a fa’alauiloa atu i le mamalu o le atunu’u, ae maise ai lava o sailiga e fesoasoani i le mamalu o le atunu’u, pe afai e lofia o latou aiga i o latou falenofo, ini fa’alavelave fa’anatura, i lenei vaitau o afa ma lologa o lo’o tatou i ai pea.

 

MAUTU LESITALA AU KIRIKITI ALI’I - TAMAITA’I I LE ASO FARAILE

 

Ua mae’a ona fa’amautu le lisi o ‘au kirikiti a le itupa o Alii o le a auai i le Liki Kirikiti o le Sisigafu’a i lenei tausaga. Ua fa’ailoa mai, e 13 ‘au kirikiti ua mae’a lesitalaina, peita’i, o lo’o teu avanoa i le Liki Kirikiti a Tama’ita’i, ina ia toe tatala le lesitala se’ia oo i le aso Faraile nei. Fa’amoemoe o le a toe fa’aopoopo mai nisi ‘au aua e na’o le to’afa au a tama’ita’i ua lesitala i le taimi nei. O ia ‘au e aofia ai: Teine o le Moso’oipala mai Leone; Teine o Asaga mai Aunuu; Teine Manulele Tausala mai Nuuuli ma le ‘au a le Pago Girls mai Pago Pago.

 

O le vasega o ‘au kirikiti a ali’i, ua 13 ‘au, ma ua mae’a foi le fonotaga a le Komiti Fa’afoe, o le a tasi le malae i Faga’alu, Fetu ole Afiafi, e faia ai le Liki atoa. E le’i fa’ailoa maia se tonu mo le liki sa tama’ita’i pe fa’atautaia i se isi malae, ae vagana ua mae’a maua le lesitala mo ‘au e tauva.

 

O le aso Tofi lea ua fa’atulaga e se’i ai pepa mo le amataga o le Liki ma o le a aufa’atasi uma mai ai Kapeteni poo sui mamalu o ‘au ta’itasi e 13 ina ia auai fa’atasi ma le Komiti Fa’afoe e fa’atulaga mea uma e amatalia ai le Liki i le aso Toonai i le Malae o Faga’alu.

 

Mai le Liki Kirikiti o le Sisigafu’a 2016, sa avea ele Fetulele mai Matatula le Siamupini, tulaga lua ai Poloa, ona soso’o lea ma le Mosiula mai Masefau ma le Pisisami mai Vaitogi. Ua fa’ailoa mai ua aofia uma fo’i nei ‘au malolosi i au nei e 13 ua mai’a fa’amau ma lesitela mo lenei liki o le a toe alofaiva i ai le Ofisa o Mataupu Tau Samoa e fa’atautaia.

 

Ua toe talosaga atu lava le Komiti o le Kirikiti, afio’aga uma e fia fa’aulu latou ‘au Kirikiti a tama’ita’i, ua toe avatu le avanoa mo le aso Faraile, o le vaiaso nei.