APELU SAITO LILO

O le aso 14 Iulai o le tausaga nei lea ua fa’atulaga e tu’u atu ai le fa’asalaga a le fa’amasinoga maualuga fa’asaga i se ali’i e 19 tausaga le matua, ina ua ia ta’utino i luma o le fa’amasinoga i le vaiaso na te’a nei sa ia faia uiga mataga i se teineititi e 12 tausaga le matua.

E 6 moliaga mamafa na ulua’i tu’uaia ai e le malo le ali’i o Apelu Saito Lilo, ina ua fa’atoa latou failaina le tagi fa’asaga ia te ia i le masina o Aperila o le tausaga na te’a nei. O moliaga mamafa e aofia ai le moliaga pito mamafa o lona faia o uiga mataga i se teineititi e i lalo o le 12 tausaga le matua (chile molesting), faiaiga ma se teineititi e laititi i lalo o le tulafono (rape), faia o gaioiga mataga fa’afeusuaiga (sexual assault), faia o amioga faasotoma (sodomy), fai uiga mataga fa’afeusuaiga fa’amalie ai lagona tu’inanau (deviate sexual assault), fa’apea ai ma lona tagofia o itutinosa o se teineititi e laititi i lalo o le tulafono (sexual abuse 1st degree).

Ae i lalo o le maliliega lea na sainia e Lilo ma le malo ma ua talia fo’i e le fa’amasinoga, ua ia tali ioe ai i le moliaga lona lima, o lona fai o uiga mataga fa’afeusuaiga fa’amalie ai lagona tu’inanau (deviate sexual assault).

I le tali ioe ai o le ua molia i le moliaga e pei ona ta’usala ai o ia e le fa’amasinoga maualuga, sa ia ta’utino ai e fa’apea, i se taimi o le masina o Aperila i le tausaga na te’a nei, sa ia faia ai ni uiga mataga i se teineititi e 12 ona tausaga i se auala e le fa’atagaina e le tulafono.

Na ta’utino le ua molia e fa’apea, na mafua ona ia faia nei uiga mataga i le teineititi na a’afia, ina ia fa’amalie ai lagona tu’inanau sa ia te ia.

O le moliaga lea ua ta’usala ai le ua molia, e mafai ona fa’asala ai o ia i le toese mo le umi e le silia i le 7 tausaga, pe fa’asala fo’i i se fa’asalaga tupe e le silia i le $5,000, po o le fa’asala fo’i i fa’asalaga uma ia e lua.

Ua malie le malo e finau i le fa’amasinoga mo se fa’asalaga mama mo Lilo, e aofia ai lona tuua o le teritori ae toe fo’i atu i lona aiga i Samoa, pe afai ae mae’a ona ia tuliina se fa’asalaga fa’a falepuipui e tu’uina atu e le fa’amasinoga.

I le taliaina ai e le fa’amasinoga maualuga o tuutuuga o le maliliega a Lilo ma le malo, na talosaga ai loa le malo ina ia solofua isi moliaga mamafa uma o loo i le pepa o tagi sa latou fa’aulu, lea fo’i na talia e le fa’amasinoga.

JOEITA FA’AALIGA

Ua toe taofia nei i le toese i Tafuna le ali’i pagota o Joeita Fa’aaliga e fa’atali ai le aso lea ua fa’atulaga e le fa’amasinoga maualuga e tu’uina atu ai lana fa’asalaga fa’asaga ia te ia, ina ua ta’usala e le fa’amasinoga maualuga o ia i le moliaga mamafa o le talepe fale ma le gaoi, i lalo o se maliliega sa latou sainia ma le malo ma ua talia fo’i e le fa’amasinoga maulauga i le vaiaso na te’a nei.

E 2 tagi na faila e le malo fa’asaga ia Fa’aaliga, lea o lo o tuli sona fa’asalaga fa’a falepuipui i le toese i Tafuna mo le umi e 40 masina, ina ua fa’amaonia e le fa’amasinoga le moliaga o le talepe fale i le tulaga muamua fa’asaga ia te ia i le tausaga e 2013.

O le tagi muamua #49-16 e pei ona tu’uaia ai e le malo ia Fa’aaliga, sa molia ai o ia i moliaga mamafa e lua o le sola ese mai le falepuipui fa’apea ai ma le moliaga o le gaoi, ae i le tagi lona lua #55-16, sa molia ai o ia e le malo i moliaga mamafa e 3 e aofia ai le sola ese mai le toese i Tafuna, talepe fale i le tulaga lua atoa ai ma le moliaga o le gaoi.

I lalo o le maliliega e pei ona sainia e Fa’aaliga ma le malo, ua ia malie ai e tali ioe i moliaga mamafa e lua o lo o tu’uaia ai o ia i le ulua’i mataupu #49-16, le moliaga o le sola ese mai le falepuipui fa’apea ai ma le gaoi. Ua ia malie fo’i e tali ioe i le moliaga o le gaoi e pei ona tu’uaia ai o ia e le malo i le mataupu #55-16.

I le tali ioe ai o Fa’aaliga i moliaga mamafa e lua mai le tagi muamua #49-16 e pei ona tu’uaia ai o ia e le malo, sa ia ta’utino ai i luma o le fa’amasinoga e fa’apea, i se taimi o le aso 30 Iuni 2016 i Amerika Samoa, sa ia sola ese ai mai le toese i Tafuna e aunoa ma se fa’atanaga fa’aletulafono, ma ia osofaia ai se fale o se aiga e aunoa ma se fa’atanaga fa’aletulafono, ma ia gaioia ai se telefoni e tusa lona tau ma le $799.

I le tali ioe ai o Fa’aaliga i le moliaga mamafa o le gaoi e pei ona tu’uaia ai o ia i le mataupu lona lua #55-16, sa ia ta’utino ai i luma o le fa’amasinoga maualuga e fa’apea, i se taimi o le aso 18 Iuni 2016 i Amerika Samoa, na ia sola ese ai i tua mai le toese i Tafuna a o taofia ai o ia, ma ia osofaia ai se faleoloa a se tagata Asia e aunoa ma se fa’atanaga ma le fa’amoemoe e fa’atino ai i totonu le solitulafono o le gaoi.

A o i ai o ia i totonu, sa ia gaoia ai se tinoitupe e tusa ma le $1,500 e aunoa ma se fa’atanaga a le tagata e pulea le faleoloa.

O se tasi o tuutuuga o lenei maliliega e pei ona fa’aalia i luma o le fa’amasinoga, ua malie ai le malo o le a latou le failaina isi tagi e 2 fa’asaga ia Fa’aaliga, e mafua mai i isi fo’i mataupu e lua e fa’atatau i lona sola ese mai totonu o le toese i Tafuna, fa’apea ai ma le mataupu lea na ia fesoasoani ai i le fa’asolaina i tua o le ali’i pagota sa taofia i le toese o Tao Liu.

Ua talosaga le malo i le fa’amasinoga ina ia faia sana poloaiga e toe fa’afo’i ai i lona aiga i Samoa le ua molia, pe afai ae mae’a ona tuliina uma ana fa’asalaga fa’a falepuipui o le a tu’uina atu e le fa’amasinoga, ma ia faia fo’i se poloaiga e matua fa’asa ai o ia ona toe ulufale mai i le teritori i totonu o le taimi atoa o le a fa’anofovaavaaia ai o ia.

O lo o taofia pea Fa’aaliga i le toese i Tafuna e fa’atali ai le aso 14 Iulai o le tausaga nei, lea ua fa’atulaga e lau ai lana fa’asalaga.

O le moliaga o le sola ese mai le toese i Tafuna, e mafai ona fa’asala ai se tasi i le toese mo le umi e le silia i le 5 tausaga, ae o le moliaga o le gaoi, e mafai ona fa’asala ai se tasi i le toese mo le umi e le silia i le 7 tausaga.