TO’ALUA TAOFIA E LEOLEO FUSUAGA I PAGO PAGO

E to’alua ni ali’i na taofia e Leoleo i le po o le aso Lua na te’a nei, e mafua mai i se misa na tula’i mai i Pago Pago i le va o tupulaga talavou a Pago Pago ma tupulaga talavou mai Fagasa ma Fagatogo.

O ali’i e to’alua na taofia e aofia ai Divine Laina, lea ua tu’uaia e le malo i moliaga mama e 4, o lo o taofia pea o ia i le toese i Tafuna se’i vagana ua totogi le $200, ma le ali’i o Garfield Himphill lea ua tu’uaia i le moliaga mama e tasi, ma ua toe tatalaina nei o ia i tua e aunoa ma se tupe na totogi e fa’atalitali ai le aso lea ua fa’atulaga e toe valaau ai lana matuapu.

E pei ona taua i fa’amaumauga a le fa’amasinoga, o le vevesi na tula’i mai ina ua togi e Laina se apa pia i se tasi o alii talavou mai Fagasa, sosoo ai loa ma lona savali atu ma tu’i le ali’i na ia togiina i le apa pia, ma tau fai tulioso atu ai loa ma isi tupulaga mai Pago Pago e aofia ai ma Himphill ma amata ona latou fa’aoolima i tupulaga talavou mai Fagasa ma Fagatogo sa i luma o se faleoloa i Pago Pago, ma i’u ina manu’a ai le isi ali’i talavou.

O lo o tu’uaia e le malo ia Himphill i lona tu’iina lea o se ali’i talavou fa’apea ai ma le ave ta’avale o le pikiapu na alu atu e piki mai i latou na a’afia.

E tusa ai ma fa’amaumauga a le fa’amasinoga, e tofu uma Laina ma Himphill ma solitulafono sa ta’uala ai i laua i luma o le fa’amasinoga, atoa ai ma salatupe e oo mai lava i le taimi nei e le’i mae’a ona totogi.

O Himphill na ta’usala e le fa’amasinoga fa’aitumalo i le 2013 i le moliaga o le faatupu vevesi, ma o lo o i ai fo’i lana salatupe e $70 e lei mae’a ona totogi, ae o Laina, e le gata na amata solitulafono mai lava o ia ao laititi, ae o lo o nofovaavaaia fo’i o ia i le taimi nei.

Na finau le ali’i loia fautua ia Douglas Fiaui i le fa’amasinoga ina ia tatala uma i laua nei i tua e aunoa ma se tupe e totogi, peita’i na talia e le afioga i le ali’i fa’amasino ia Elvis P. Patea le fautuaga a le malo, ina ia tatala na o Himphill i tua e aunoa ma se tupe e totogi, fuafua i le mama o lona a’afiaga i le fa’alavelave sa tula’i mai i Pago Pago, ae tatau ona totogi e Laina se tupe e tatala ai o ia i tua, ona o ia lea o lo o tu’uaia na amataina le vevesi.

O tuutuuga a le fa’amasinoga ua tu’uina atu i ali’i talavou nei e to’alua e usita’i i ai, ae fa’atalitali ai le aso 11 Ianuari 2017 lea ua fa’atulaga e toe valaau ai le la mataupu, e aofia ai le fa’asa lea ona o la toe soliina se tulafono, fa’asa ona la toe taumafai e fa’afeso’ota’i i latou sa a’afia i lenei mataupu, a ia avea i laua ma tagatanu’u lelei e tausisi i tulafono a le malo.

Mo le ali’i o Laina, ua fa’asa e le fa’amasinoga ona ia toe tagofia le ‘ava malosi poo fualaau fa’asaina, o le a mafai fo’i ona su’esu’eina lona tino i soo se taimi ina ia mautinoa ai na te le o toe tagofia le ‘ava malosi.

O moliaga mama e 4 o lo o tu’uaia ai Laina e aofia ai moliaga e lua o le fa’ao’olima i le tulaga tolu, moliaga o le fa’atupu vevesi i nofoaga faitele, atoa ai ma le moliaga o lona tagofia o le ‘ava malosi ae lei atoa lona 21 tausaga, ae mo le ali’i o Himphill, e na o le moliaga mama o le fa’ao’olima i le tulaga tolu o lo o tu’uaia ai o ia e le malo.

AFITU MAPUSUA

O le aso 6 o Ianuari 2017 lea ua fa’atulaga e toe valaau ai le mataupu a le ali’i o Afitu Mapusua, i le mae’a ai lea ona ia teena o moliaga mama e 2 ua tu’uaia ai o ia e le malo, e mafua mai i le fa’alavelave lea na tula’i mai i le maketi i Fagatogo i le aso Gafua na te’a nei, lea na ia fa’ao’olima ai i se isi ali’i na la tau upu.

O le vevesi na mafua mai ina ua poloka e le ta’avale a le ali’i na a’afia le auala e ui atu ai le ta’avale a Mapusua, ma mafua ai loa ona tula’i mai se feeseeseaiga i le va o ali’i ia e to’alua, ae talu ai o le malolosi o upu na lafo e le ali’i na a’afia ia Mapusua, na mafua ai loa ona tu’i e Mapusua o ia ma tifa atu ai ua fetoai lona ulu ma le sima o le maketi.

O ni isi o tuutuuga ua tatala ai Mapusua i tua e aofia ai le fa’asa lea ona ia toe fa’afesootaiina le ali’i na a’afia i lana solitulafono, aua nei ona toe solia se tulafono a le malo, a ia avea o ia ma tagatanu’u e tausi i tulafono a le malo i taimi uma.

O moliaga mama e lua ua tu’uaia ai e le malo le ua molia e aofia ai le faaoolima i le tulaga tolu ma le fa’atupu vevesi i nofoaga faitele.