Ads by Google Ads by Google

Tala otooto o Fa’amasinoga

ausage@samoanews.com

IVALE VANUVANU

 

O le ali’i lea na ia fa’aaoga se mele’i e fa’ao’o ai manu’a i le to’alua a lona tuafafine, ua fa’asala e le fa’amasinoga maualuga o ia ina ia taofia i le toese i Tafuna mo le umi e 20 masina, o se tasi lea o tuutuuga o lana nofovaavaaia e 5 tausaga, ina ua ta’usala o ia i le moliaga o le fa’ao’olima i le tulaga lua.

 

Na fa’atoese le susuga a Ivale Vanuvanu i le fa’amasinoga e tusa ai o lana solitulafono sa faia, ma ia talosagaina ai se isi avanoa mo ia, e toe fo’i atu ai i tua e mafuta ma le aiga ma fa’aauau le fa’atinoina o ona tiute fa’a Tama i totonu o le aiga. Sa ia fa’atoese fo’i i le to’alua a lona tuafafine na a’afia i lana gaioiga, ina ia alofa ma fa’amagalo o ia.

 

Na molimau le tuafafine a le ua molia i luma o le fa’amasinoga e fai ai o ia ma sui o lona to’alua, ma ia taua ai le maua e lona to’alua o le loto fa’amagalo e fa’amagalo ai i lona tuagane e tusa ai o lana solitulafono sa faia.

 

Na tutu fa’atasi loia a itu e lua e finau i le fa’amasinoga mo se faasalaga fa’anofovaavaaia mo le ua molia, e aofia ai ni nai masina e taofia ai o ia i le toese, ona o le matuia o le gaioiga sa ia faia, aemaise ai o le manu’a na a’afia ai le tino o le ali’i na a’afia i lenei mataupu.

 

Saunoa le afioga i le alii fa’amasino sili ia Michael Kruse e faapea, o le itu e sili ona ogaoga ai lenei mataupu, o le fa’aaoga lea e Ivale o se mele’i e a’oa’i ai le to’alua o lona tuafafine ona o se feeseeseaiga na tula’i mai i lo la va, ma i’u ina manu’a ai o ia.

 

Na taua fo’i e le fa’amasinoga le matuia o le auala sa fa’atinoina ai e le ua molia lenei solitulafono, ina ua ia fa’aaoga se mea faigaluega e fai ma a’upega e fa’aoo ai manu’a i le ali’i na a’afia.

 

E 5 tausaga na manatu le fa’amasinoga e taofia ai Ivale i le toese i Tafuna, ae ina ua mae’a ona iloilo e ali’i fa’amasino fa’afinauga mai loia atoa ai ma molimau sa fa’apea ona tu’uina atu e fa’atatau i lenei mataupu, na manatu ai loa ali’i fa’amasino o le a fa’amalumalu le tuliina e Ivale o le fa’asalaga fa’a falepuipui e 5 tausaga, ae o le a fa’anofovaavaaia o ia mo le 5 tausaga i lalo o poloaiga e ao ona ia usita’i i ai.

 

O ni isi o ia poloaiga e aofia ai le fa’asa lea ona ia toe soli se tulafono, fa’asa ona ia toe taumafai e fa’afeso’ota’i le to’alua a lona tuafafine pe toe alu ai fo’i i lona fale, auai i ni aoaoga e fesoasoani ai i le ita, ma ia ona tuliina masina e 20 i le toese i Tafuna e aunoa ma le tatalaina o ia i tua.

 

O le isi tuutuuga na faaopoopo e le fa’amasinoga i le fa’anofovaavaaia a Ivale, o lona tuua lea o le teritori ae toe fo’i atu i Samoa mo le umi e 5 tausaga, pe afai ae magalo mai o ia mai le toese i Tafuna, peita’i o le a fa’amalumalu lona fa’ataunu’uina o lea fa’asalaga, fuafua lea i lona usitaia o isi uma tuutuuga o lana nofovaavaaia.

 

O le masina o Me 2017 lea ua fa’atulaga e toe faia ai le isi iloiloga o lenei mataupu, i le atoa ai lea o le tausaga talu ona taofia Ivale i le toese i Tafuna.

 

SAUNI SE TAMA 56 TAUSAGA E TALI TU’UAIGA MALO

 

O le Tama e 56 tausaga le matua lea o lo o tu’uaia i lona faia o uiga mataga i lona afafine, ua sauni nei o ia e sainia sa latou maliliega ma le malo ma le fa’amoemoe e fa’amuta ai taualumaga o lana mataupu.

 

Ina ua valaau le mataupu a le ua molia i le taeao ananafi mo lana iloiloga, na fa’ailoa ai e loia e itu e lua le mae’a lea ona o latou taunu’u i se maliliega e fa’amuta ai taualumaga o lenei mataupu, ae o lo o latou mana’omia ni vaiaso se lua e tu’u atu e fa’amae’a ai talanoaga ma sainia ai loa lenei maliliega.

 

Na fesili le afioga i le ali’i fa’amasino ia Michael Kruse le loia a le ali’i o lo o molia o Michael White e tusa ai o feutanaiga ma le malo i le maliliega, ae na taua e White e fa’apea, ua mae’a ona tuuina atu e le malo la latou ofa ma ua taliaina fo’i e le ua molia tuutuuga uma o le ofa, pau le itu o lo o taumafai e fa’amae’a lelei, o tulaga i le gagana e fa’aupu ai le tusiaina o le maliliega pe a o o i le taimi e faila ai i luma o le fa’amasinoga.

 

O tu’uaiga fa’asaga i le ali’i o lo o molia i lenei mataupu na alia’e mai i le 3 masina talu ai, ina ua fa’ailoa e le teineititi na a’afia i sana uo i le aoga uiga mataga o lo o faia e lona tama ia te ia, sosoo ai ma le fa’ailoa e le uo lea i le faiaoga ma logo ai loa Leoleo.

 

Ina ua fesiligia e Leoleo le teineititi na a’afia e tusa ai o lenei mataupu, sa ia taua ai le alu atu o lona tama i le potu o lo o moe ai i le leva o le po, pe a uma fo’i ona ula e lona tama ana fualaau fa’asaina o le aisa, ona ia faia loa lea o uiga mataga ia te ia e ala i lona tagofia o ona itutino sa fa’apea ai ma isi mau gaioiga e tau fa’amalie ai ona lagona tu’inanau.

 

O lo o taofia pea i le toese i Tafuna le ua molia e le o mafai ona tatalaina i tua, ina ua le mafai ona ia totogi le tupe e $50,000 na fa’atulaga e le fa’amasinoga e tatala ai o ia i tua.

 

JOEITA FA’AALIGA

 

O le vaiaso fou lea ua fa’atulaga e faia ai le iloiloga autu o le mataupu a le ali’i o Joeita Fa’aaliga, e mafua mai i tu’uaiga lea ua faia fa’asaga ia te ia, i lona le usitaia lea o tuutuuga o lana nofovaavaaia sa tu’uina atu e le fa’amasinoga e usita’i ma tausisi i ai.

 

O Fa’aaliga na ta’usala e le malo i le tausaga e 2012 i moliaga o le gaoi a le talepe fale, ma fa’asala ai loa o ia i le toese mo le umi e 28 masina, o se tasi lea o tuutuuga o lana nofovaavaaia e 7 tausaga. O isi tuutuuga o lana nofovaavaaia e aofia ai le fa’asa lea ona ia toe soli se tulafono, ae i le tausaga lenei, na toe tu’uaia ai fo’i o ia e le malo i isi fo’i solitulafono e aofia ai le gaoi ma le talepe fale, ma o lo o faaauau pea taualumaga o ia mataupu fou i luma o le fa’amasinoga maualuga i le taimi nei.