SUAFA ‘FAUMUINA’ MO LE AIGA SA FAUMUINA

I le fa’apotopotoga o le pa’ia maualuga o le Aiga Sa Faumuina i Leloaloa i le latou maota talimalo, sa latou filifili ai se suli o Aiga o le a tula’i mai e tau’avea le suafa “Faumuina”.

Ua fa’afiafiaina le aiga potopoto i ona fuaiala eseese i le latou tofiga ua mae’a ona autasia i ai, Taufete’e John Faumuina, e nofo i le suafa. O le suafa na fa’ato’a avanoa ina ua faiilagi le folauga a le afioga Faumuina Tagisiaalii, o se tasi foi na filifili fa’apitoa e le pa’ia o Aiga. Peita’i, i tua atu o lena nofoa’iga, sa tau’avea mai fo’i e le tua’a o le tofa Taufete’e, le afioga Faumuina Ioane, sa tele fo’i tofi o le itumalo sa tutula’i mai ai e aofia ai ma le tofi Senatoa i le Fono Faitulafono.

O le tofa Taufete’e o lo’o avea ma pulesili i le falema’i i Fagaalu, le LBJ. O lo ua loma nei se aso e filifilia fa’apitoa e le fa’anofonofo ma le pa’ia o aiga e tapa ipu ai le fa’anofotupu ai lana afioga, itumalo ma Samoa atoa.

FANAU A’OGA FAIGALUEGA FA’ATA’ITA’I I TOOL SHOP

E to’afa sui mai le aoga maualuga a le Nuuuli VocTech ua avea ma tamaiti a’oga fa’aa’oa’o ona faigaluega i le kamupani a le Tool Shop Inc. i Tafuna.

O le vaega lenei o le tausaga a’oga e masani ona fa’aofi ai e le A’oga o Matata Estese tamaiti a’oga o le vasega fa’ai’uaso ina ia a’otauina i totonu o kamupani po’o matagaluega eseese o le malo, ina ia fa’amautu atili lo latou tomai i matata ua a’oa’oina ai i potu a’oga.

O le to’afa lea o sui nei o le Matata Tau Inisinia i Masini Laiti ma ua talia e le Tool Shop e tau’avea a latou galuega fa’atino e pei lava o lo ua faigaluega, ae le totogia foi i latou. I le aso Faraile, e le’i amatalia latou galuega, ae ua faia se talanoaga ma sui o le Tool Shop o le a latou fesaga’i i taimi o le a faigaluega ai i latou.

“O le galuega lenei, e le mana’omia lava ona tupu mai ni fa’alavelave fa’afuase’i, va’ai toto’a i galuega e toe mafai ona fa’atino, ma ia mautinoa foi tou te iloa ona fa’aaoga meafaigaluega e fa’atino ai tiute o le a tuuina atu e tou te faia. Ia mautinoa muamua lou saogalemu, e amata mai i lou ofu faigaluega e tatau ona la’ei ma ituaiga o se’evae e tou te se’ea i taimi e faigaluega ai,”o se fa’amatalaga lea mai le pule o le Tool Shop i le fanau.

E le gata i lena, “Ua outou iloa le ituaiga fa’alavelave lea na tupu i le pisinisi tuai, e le mana’omia ona tupu fo’i i le tatou galuega nei. Ia mautinoa e te fesili pe afai e te le o malamalama i se mea o le a fa’atonuina ai oe. E tou te o mai, pani lau pepa faigaluega, afai fo’i e tou te manava i le afiafi, toe pani fo’i lau pepa. E moni, e foliga mai o e faigaluega, ae leai sou totogi, o lou totogi o lou togi o le a maua i lau faigaluega o le lipoti o le a taua’aoina atu i le mae’a ai o lau faigaluega i inei.”

Sa fa’ailoa i le fanau a’oga, o i latou e faigaluega i le itu o le faleoloa o lo’o toe siakia ai masini laiti e ao ina toe lipea pe fa’aleleia, e pei lava o se faleinisinia o masini laiti, ma o le matata tonu lea, o loo aoaoina ai i latou nei i le potu aoga.

O Wudrough Tommy, se tasi o tama a’oga, sa ia fa’ailoa mai, “E aoga fo’i le oo i ai, pe mata ua maua se mea i nei tausaga e lua sa a’oa’o mai ai i le ‘Small Engines’ afai e le o i ai, ia sui loa e amo le fana i le US Army.” Tula’i mai o lea atali’i, o lo’o i ai ana filifiliga e ao ina faia mo lona lumana’i pe afai e le ski ia te ia le Inisinia i masini laiti.

A’AFIA TAAVALE A LE PUBLIC WORKS I SE FA’ALAVELAVE

O se fa’alavelave tau ta’avale sa aafia ai se tasi o ta’avale a le Matagaluega o Galuega Lautele (DPW) a le malo sa poloka ai le alatele i Nu’uuli i le taeao o le aso Faraile ua te’a. Sa vaaia le manumi o foliga o le ta’avale pikiapu a le DPW ae leai se afaina o le loli sa tosi ai tane kesi a se kamupani tua.

Sa matauina le aafia o tamaloloa e to’alua a le DPW sa i totonu o le pikiapu ma auina atu i le falema’i o le LBJ.

O se faamatalaga a le ali’i leoleo sa i ai i lea taimi, e fa’apea, “E le o tigaina tele i la’ua nei, ae tatau lava ona faia se siakiga i le falema’i.”