Ads by Google Ads by Google

Tala I Vaifanua


O se va’aiga ia Juliano Giuseppe Falaniko ma lona tina o Divine Iuli Falaniko. O Juliano ua malaga i Honolulu mo le Polynesian Football Bowl i Honolulu i le aso 21 Ianuari 2017. Ua na’o ia le sui mai Amerika Samoa o le a ta’alo i lea ta’aloga. [ata: foa’i]
ausage@samoanews.com

JULIANO FALANIKO O AMERIKA SAMOA I LE “POLYNESIAN BOWL”

 

Ua malaga ese atu mai le territori le ali’i o Juliano Giuseppe Falaniko o Leone, ina ia auai i le ta’aloga football a le Polynesian Bowl, ma o iina foi o le a fa’aeaina ai nisi o alo o Samoa ua fili fa’apitoa e auai i le lisi o alo mai Atumotu Polenisia.  O le Polynesian Bowl o lo’o i lalo o le vaaiga a le Polynesian Hall Fame ma o le uluai taaloga lea a le Polynesian Bowl e faia i Honolulu i le aso 21 o Ianuari.

 

O se fa’aeaga sa le mailloa e nai ona matua, Divine Iuli ma Juliano Mateo Falaniko, peita’i, “Ua talia mo’omo’oga sa talosia mo lenei alo o le atunu’u, e sii ai le fa’afetai i le Atua o mea uma.” O le fautuaga sa molita’i e le tina i sana toe fa’amanatu i lona alo ae le’i tuua lona aiga, “Ia e iloa lelei, o lo’o e tau’avea lou aiga, lau aoga, lou nu’u ae maise o lou malo atoa o Amerika Samoa. Fai le mea sili pe a e ta’alo, ae ia lua feoa’i ma lou Atua ma le loto fa’amaulalo, ia e agamalu.”

 

Sa aoga Juliano i Midkiff Elementary, soso’o ai ma le Aoga Maualuga a Leone mo le fa tausaga ma ua tele fo’i avanoa ua filifila ai o ia e malaga atu ai i fafo mo ta’aloga football, ma e alga lana taumafaiga i lea fo’i fa’agatama i le tatou atunu’u.

 

O le Polynesian Bowl ua fa’amoemoe e ta’a’alo ai le fanau a’oga maualuluga ua matauina le tulaga lelei o latou ta’a’alo i le Football, ma ua filifilia i latou e Team Marcus Mariota o le Tennessee Titans ma Team Ronnie Stanley mai le Baltimore Ravens ae faia i le Aloha Stadium i le itula e 6:00 i le afiafi.

 

I le taimi nei ua fa’agasolo koleniga a tama ta’a’alo ua mae’a ona pikia mo ‘au e lua, ma e fa’asolo lava e tusa ma le latou faatulagaga o mea e fai i aso ta’itasi seria oo i le aso fa’amoemoeina o le ta’aloga faitaulia.

 

O le Head Coach a le Team Mariota  o June Jones a’o le Head Coach mo Team Stanley o Dick Tomey.

 

TAOFIA SAPALAI FOU O FA’AASU NAMU E LE ASEPA

 

Ua savalia le 6 vaiaso o lo’o gapatia pea le mamalu o le atunu’u e tau saillia ni fa’aasu namu i totonu o le atunu’u. Sa fesiligia le vaega o le ASEPA i le toe talia o fa’aasu namu.

 

“E moni lava, sa faia le galuega e ao ina fa’atino e le ASEPA ina ua taumafai le Kamupani Oloa a le Aveina Brothers e fa’aulu mai se isi ituaiga o fa’aasu namu fou. O lea o lo’o taofia uma nei uta o fa’aasu namu, seia mae’a ona kilia mai, ma ua usita’ia fo’i e le Au fai oloa, tulafono tau fefa’ataua’iga ma malo e i lalo o le puipuiga a le USEPA,” o se faamalamalamaga lea a le susuga a Tuiasosopo i le vaega a le Pesticides a le ASEPA.

 

Ina ua fesiligia le Kamupani Oloa a le Aveina Brothers, sa faailoa mai e sona sui sinia i le Ofisa auto, “O lo ua tatalia nei le oo mai o se sui o le ASEPA ina ia toe taga’i i le taumafaiga ua fa’atino nei ina ia fa’asa’o ai lea fa’atauga, ma fa’aulu mai loa lea oloa mo le fa’atauina. O lo ua iinei le fa’atauga, ae o le gaoioiga sa fa’ailoa mai e ao ina faia mo le saogalemu o le soifua o le mamalu o le atunu’u e fa’aaogaina, lea ua mae’a fo’i ona fa’atino ma tatalia sui o le ASEPA e fa’atagaina pe leai lava.”